Baefeso 1 - INDAGANO INYA:YA

Amabando go mwoyo

¹ Anye Paulo, unu ndi ntumwa ya Yesu Kristo, enibandikira emwe abe:ru banu bari mu Efeso na banu abe:kirisya Kristo Yesu.

² Ecigongo cibe kwimwe no murembe binu ebiso:ka ku Rata Nyamuanga na ku Ratabugenyi Yesu Kristo.

³ Asi:mwe Nyamuanga Esemwene Ratabugenyi Yesu Kristo, unu aciyae amabando go:ne ago Mwoyo mu Kristo, mu bwikaro bwa mu rwire.

⁴ Rwa kutyo acisoree mu mwene, i:si icari kumogwa, eswe cibe be:ru banu batariko esoro imbere yae mu kwenda.

⁵ Aca:uye kara cikorwe ba:na bae kubwa Yesu Kristo, rwa kutyo akondeywe mu kwenda kwae.

⁶ Korereki rikuibwe rikusyo rye cigongo cae cinu aciyae kutyo era mu:yo Omwendwa.

⁷ Mu mwene ciri no kucungurwa kweswe kurwa manyinga gae, nikwo okwiswaririrwa kwe bikayo byeswe, rwo buni:bi bwe cigongo cae kutyo buri.

⁸ Nico ecigongo cinu asagirisisye kwiswe mu bwenge bwone na mu kusombo:kerwa kwone.

⁹ Nace:resya obumbise bwo kwenda kwae, rwa kutyo ariga akondeywe omwene, rwa kutyo ariga akarariye kara mu Kristo,

¹⁰ Korereki mu kuragirira kwo kukumisya kwa magoro, aumbanyisye mu Kristo binu byone biri mu rwire na binu biri ku ca:ro.

¹¹ Mu:yo nimwo eswe cabonee omwandu, okuba casorerwe kara mu bukarae bwa Unu kakora byone rwa kutyo kenda mu kurwaja kwae.

¹² Korereki eswe cibe bo kusi:ma rikusyo ryae, eswe banu catangatire okwiikanya Kristo.

¹³ Nemwe one, wejire mwongwa omusango gwe cimari, nibyo Ebigambo byo bwana ebyo mweruro gwemwe, nemwe one wejire mwamwikirisya, nimutu:rwako ecibarikisyo niwe Mwoyo Mweru mu ariga aragirwe.

¹⁴ Niwe ecigwatirisyo co mwandu gweswe, kukinga obutungi bwa Nyamuanga runu buricungurwa, rikusyo ryae rikuibwega.

Okusabwa kwa Paulo

¹⁵ Nikwo kutyo nanye one kuso:ka anu nonguywe okwikirisya kwemwe ku Ratabugenyi Yesu, no kwenda kunu munakwo ku be:ru bo:ne,

¹⁶ Nitakusiga kusi:ma kubwemwe, nimba: ikako mu kusabwa kwani ati,

¹⁷ Nyamuanga wa Ratabugenyi Yesu Kristo, niwe Rata wa rikusyo, abayane omwoyo gwo bwenge no gwo kuswerurirwa mu kumusombo:kerwa Omwene.

¹⁸ Mwesibwega ame:so ge mitima jemwe, korereki mumenye okwiikanya kwo kubirikira kwae kutyo kuri, no buni:bi bwa rikusyo ryo mwandu gwae mu be:ru kutyo buri.

¹⁹ Mumwenye no bukuru bwafu obwa managa gae kwiswe abe:kirisya kutyo buri, rwo buinga bwa managa gae kutyo agakora,

²⁰ Ganu akoree mu Kristo namusu:rura mu bafu:ye namwiyanja ku kuboko kwae okwe buryo mu rwire,

²¹ namuta inguru muno kukira obutungi bwone no buinga bwone na managa go:ne no bukuru bwone, ne:si:na ryone rinu eritogorwa, tari mu magoro ganu era, nawe na mu ganu gari:ja.

²² Natu:ra byone emwaro ye bigere byae, namutao abe mutwe gwa byone mu kanisa,

²³ nigwo omubiri gwae, nikwo okukumira kwa Oyo kakumisya byone mu byone.