Baeburania 9 - INDAGANO INYA:YA

Iyekaru ne byogo ni bijekekanyo

¹ Mbe, na indagano yo kwamba yariga iri na jintungwa jo kuramyaga jinu jariga jiragiriye, no rubara orweru, mu ca:ro.

² Okuba riyema eryo ryakorerwe rinu emuryango byariga birimo itara, na imeja ne mikate jo kweresya, niyo atogwaga Orubara Orweru.

³ Na munda ya risaenge rya kabiri, arigao anu atogwaga Orubara Orweru kata kata.

⁴ Nimwo byariga birimo i:piki ya ijaabu na risandikwa rya indagano rinu ryariga riswikiyweko ijaabu mbara jo:ne, rinu ryarigamo akabiga aka ijaabu munu emanu yariga, na isimbo ya Aroni inu yafu:kire na mabatra ga ribui aga indagano.

⁵ Na inguru yaryo bariga bariko bakerubi ba rikusyo baswikiye ecitebe ce cigongo. Ebyo citana mwanya gwo kwaikako cimwi-cimwi.

⁶ Mbe ebi:nu ebyo anu byakorerwe, abagabisi bengiraga mwiyema ryo kwamba ku:sa uri, nibakumisya emirimu jo kuramya.

⁷ Nawe mu rya kabiri, omugabisi Omukuru enyere engiraga rugenda rumwi era ku mwaka, nawe atakwingiramo atana rwamba runu kaso:sya kubwae omwene na kurwe bikayo bya ba:nu.

⁸ Mwoyo Mweru ariga ne:resya ati, injira yo kwingira mu rubara orweru yariga icari kubu:risibwa, anu riyema ryo kwamba ryariga rice:mereguyu.

⁹ Eryo niryo orususo rwa jisiku jinu ja wori. Mwiyema eryo bariga nibaso:sya ebiyanwa ne byogo, binu bitakutura kuku:misya unu karamya mu byo mutima.

¹⁰ Ebyo ni ntungwa jo kurya ne jo kunywa ne jo kwosya kwa nyami nyafu, jinu jaragiriywe ejo mubiri, jinu jateyweo kukinga mu magoro go kugorora emisango jo:ne.

Obuku:miye bwe co:go ca Kristo

¹¹ Nawe Kristo wejire aja, naba mugabisi mukuru we misango jo bwana jinu ejenda oku:ja, nengira mwiyema ryo bukuru na rinu riku:miye kukirao, rinu ritakorerwe na maboko, kwo kwaika ati, ritari rya mu:si inu,

¹² Amwi atengiye na rwamba rwa mbusi na rwa binyara, nawe engiye na manyinga gae omwene, nengira kata mu rubara orweru rumwi era, nakora okucungura kwa kajanende.

¹³ Okuba orwamba rwa jimbusi no rwa jindume, na rifu rya iŋafu binu byamijirwaga ku banu bari no bujabi, araba ebyo ebyesya no kucuma omubiri,

¹⁴ Mbe amanyinga ga Kristo, unu e:tegereyo ku Nyamuanga atariko ebara, kurwo Mwoyo wa kajanende, ?mbe amanyinga gae gatarikira muno okwesya emitima jemwe mu bikorwa ebifu:ye korereki mukorerega Nyamuanga omuanga?

Okufwa kwa Kristo kwarumisye indagano

¹⁵ Mbe omwene naba mwaikanya wa indagano inya:ya, korereki banu babirikiywe bayabwe omwandu gwa kajanende gunu baragirwe, okuba okufwa kwabeeo kunu okucungura mu bikayo binu byakorerwe mu ndagano ya kara.

¹⁶ Okuba indagano yo mwandu ikaba iriwo, ni busibusi kubeo okufwa kwa unu aragire.

¹⁷ Okuba omu:nu akafwa, indagano yo mwandu niwo eijira amanaga, okuba indagano eyo itana managa na katyari akaba acari muanga unu aragire.

¹⁸ Mbe na indagano yo kwamba one yateyweo no rwamba ruriwo.

¹⁹ Okuba Musa wejire amara okubwira ba:nu bo:ne ebiragiro byone rwa kutyo aragiriywe, nagega orwamba rwe binyara no rwa jimbusi aamwi na manji no bufufi bwa ina:ma obutukurasi, no mwotwa, namijirira ku citabo ecene na ku ba:nu bo:ne.

²⁰ Na:ika ati, Runu nirwo orwamba rwa indagano inu Nyamuanga abaragiriye.

²¹ Kutyo one namijirira orwamba kwiyema na ku bi:nu byone ebyo kufurubendera.

²² Na mu bira:giro uti bi:nu byone ebyesibwa no rwamba. No rwamba rukarema okwitwa mbe no kwiswaririrwa kutariwo.

Yesu ne:tegayo naba co:go rumwi era

²³ Mbe ji:suso je bi:nu bya mu rwire ni busibusi byesibwe ne byogo ebyo, nawe ebya mu rwire ebyene ni busibusi byesibwe ne byogo bye kisi kukira ebyo.

²⁴ Okuba Kristo atengiye mu rubara orweru runu rwakorerwe na maboko, runu orususana no rwe cimari, nawe engiye mu rwire orwene, korereki abonekega imbere ya Nyamuanga woryanu kurweswe.

²⁵ Amwi atakenere kwiso:syaga kwiya ka:fu, rwa kutyo mugabisi Omukuru kengiraga mu rubara orweru buri mwaka no rwamba rutari rwae.

²⁶ Okuba bikaba kutyo, kwakamwiire okunya:sibwaga kwiya ka:fu kuso:kerera ku kuyangwa kwa i:si. Nawe woryanu ku butero bwa magoro abu:risibwe rumwi era, korereki e:tambe omwene kuba co:go co kuso:sya ebibi:bi.

²⁷ Rwa kutyo aba:nu batereyweo okufwa rumwi era, okumara intambara ni:ja,

²⁸ Na Kristo nyaburiko, unu aso:sibwe rumwi era kuba co:go korereki agege ebibi:bi bya ba:nu ba:fu, ariboneka orwa kabiri atana cibi:bi, korereki akisye banu abamurindirira.