Baeburania 8 - INDAGANO INYA:YA

Obugabisi bwa kara ni:rengesi

¹ Mbe mu misango jinu ca:ikire, omunene ni gunu ati, Ciri no mugabisi Omukuru unu ari kutiyo, unu enyanjire ku kuboko kwe buryo okwe citebe ca iŋoma eco Bukuru, mu rwire,

² Naba mukosi wo rubara rweru, na wa riyema rye cimari, rinu Ratabugenyi ayemere, ritayemerwe na mu:nu.

³ Okuba abagabisi abakuru bo:ne abatu:rwao korereki baso:syega ebiyanwa ne byogo. Kwakorere nikumwiya Oyo one okuba ne co kuso:sya.

⁴ Mbe kumba aja ari ku ca:ro, atakabee mugabisi uri, okuba bario banu abaso:sya ebiyanwa rwa kutyo ebiragiro biri.

⁵ Abo abafurubendera ebyo rususo ne bya rirengesi rye bya mu rwire, rwa kutyo Musa aragiriywe na Nyamuanga, anu ariga nenda okukora riyema, okuba a:ikire ati, Kabuka, ukorega byone rwo rususo runu weresibwe ku ci:ma.

⁶ Nawe woryanu abwene okufurubenda kwe kisi muno, okuba abee ntumwa ya indagano ye kisi muno, binu biri ne mirago je kisi muno.

Indagano inyaya ikirire eya kara

⁷ Okuba indagano iriya eyo kwamba yakabee itariko esoro, gutakayenjerwe mwanya kwiyo eya kabiri.

⁸ Kwo kuba wejire a:ika amasoro gebwe na:ika ati, Ratabugenyi ka:ika ati, Rora jisiku eji:ja, Anu ndiragana indagano inyaya na inyumba ya Israeli na inyumba ya Yuda.

⁹ Tari rwa indagano inu naragene na basaja wabo, Ku rusiku ruriya nabagwatire okuboko nimbaso:sya mu:si ya Misiri, Okuba abo batagumire mu ndagano yani, Nanye one nitabakaraywe, nikwo kutyo Ratabugenyi ka:ika.

¹⁰ Okuba inu niyo indagano inu ndiragana na inyumba ya Israeli, Nikwo kutyo Ratabugenyi ka:ika, Jisiku jiriya ariba je:ya, Nditu:ra ebiragiro byani mu kwiganirisya kwebwe, Na ka ndibyandika mu mitima jebwe. Anye niribaga Nyamuanga webwe Na bene baribaga ba:nu bani.

¹¹ Amwi mu:nu wo:ne atarisuba kwiigisya we:ja:bo, Amwi mu:nu wo:ne atari:igisya mwana wabo, ati, Numenye Ratabugenyi, Okuba bo:ne bari:menya anye, Okuso:ka ku muto:to okukinga ku mukuru.

¹² Okuba ndibafwira ecigongo obunyamusi bwebwe, Na ka nitarisuba kwicuka bibi:bi byebwe rindi.

¹³ Okuba a:ikire ati, Indagano inyaya, mbe na:ikokosya indagano yo kwamba. Nawe eci:nu ca kara cinu cakokoe, eciba ciri yei no kucweka.