Baeburania 6 - INDAGANO INYA:YA

¹ Mbe cisige emisango jo kwamba eja Kristo, cikome:rega okukinga mu buku:miye. Cisige kusuba kutao orufuka rwo kuta mu bikorwa ebifu:ye, no kumwikirisya Nyamuanga,

² no kwiigisya kwo kubatija, no kwo kutako amaboko, no kwo kusu:ka kwa bafu:ye, na intambara inyatawao.

³ Mbe jecikore kutyo, Nyamuanga ake:kirisya.

Obwikoti kutyo buri

⁴ Okuba banu barabwene obweru, nibaraba ku ciyanwa ca mu rwire, nibasangira no Mwoyo Mweru,

⁵ Nibaraba ku musango gwo bwana ogwa Nyamuanga na ku managa ga magoro ganu agendo:ku:ja,

⁶ Kumara nibaso:kamo, jitamisye abo okubasubya rindi mu kuta, okuba abasuba okumubamba Omwana wa Nyamuanga ku musaraba abene:ra, nibamuswasya bukwenukwenu.

⁷ Okuba i:si einywa iŋuba inu eiigwagako, nimesya emikubi jinu jibe:ire banu abairimaga, ni:bona ribando rya Nyamuanga.

⁸ Nawe ikamesya amawa na maso:koro, eiremwa myenda okwiimwa. Obute:ro bwayo ni kwocibwa.

⁹ Nawe, abendwa, norwo kutyo eca:ika ebyo, ci:kirisisye ati ebyemwe ni bya kisi kukira ebyo, ka ni binu bi:ire omweruro.

¹⁰ Okuba Nyamuanga atari murangirangi okuba atakurabirwa omurimu gwemwe, no kwenda kwemwe kurwa risi:na ryae, kunu mweresisye mu kukorera abe:ru, rwa kutyo mucakora.

¹¹ Neswe ecenda emwe bo:ne mweresyega okwikome:sya okwo kukinga ku butero, mu kwiikanya kunu kuku:miye.

¹² Musigega kurengaara, nawe mubaroreregako banu abarya omwandu gwa binu byaragirwe kurwo kwikirisya no kwigumirisya.

Eci:airo ca Nyamuanga

¹³ Okuba, Nyamuanga wejire araga Iburaimu omurago, ne:raisya omwene, okuba ariga atario unu kamukira obukuru unu katura okumwirairira.

¹⁴ Na:ika ati, Ni cimari ndakuyanaga ribando ryafu, na ka ndakufufyaga.

¹⁵ Nikwo kutyo wejire e:gumirisya nayabwa omurago.

¹⁶ Okuba aba:nu abe:raisya unu kabakira obukuru, ne cirairo nico ecimara jimamba jebwe jo:ne.

¹⁷ Nyamuanga kwakorere natao eci:rairo, nenda okweresya abari bo mwandu gwo murago ati, okurumya obwiikanyo bunu buteyweo imbere yeswe, cibega na cinu ecicikome:sya na managa,

¹⁸ kurwe bigambo bibiri ebyo bitakucu:ka, binu Nyamuanga atakutura kubeeramo.

¹⁹ Nibwo obwiikanyo bunu ciri nabwo rwa risikyo ryo mwoyo, ni bwiikanyo bunu butakwitima:twa, nawe burumire, ni bunu obwingira munda ya risaenge,

²⁰ munu omutangasi weswe Yesu engiye kubweswe, naba mugabisi mukuru wa kajanende rwa kutyo ariga:ri Melikisedeki.