Baeburania 5 - INDAGANO INYA:YA

Omurimu gwo mugabisi

¹ Okuba omugabisi Omukuru wo:ne unu ke:torwa mu ba:nu, katu:rwao kurwa ba:nu mu misango ja Nyamuanga, korereki aso:sye ebiyanwa ne byogo kurwe bibi:bi.

² Oyo katura okwigumirisya na banu batakumenya na banu abayaba, okuba omwene one asingiywe oburenga.

³ Kwokakora nikumwiya okutamba ebyogo kurwe bibi:bi byae omwene, rwa kutyo katambira abandi.

⁴ Amwi atariwo mu:nu wo:ne unu ke:yana ecibaro eco, tari Nyamuanga amubirikiye, rwa Aroni.

Kristo ni mugabisi mukuru unu asorerwe Nyamuanga

⁵ Nikwo kutyo Kristo one ate:ku:isye omwene kuba mugabisi mukuru, nawe ateyweo na Unu amubwiriye ati, Awe uri Mwana wani Rero nakwibura.

⁶ Rwa kutyo ka:ika aandi ati, Awe uri mugabisi wa kajanende, Rwa kutyo ariga:ri Melikisedeki.

⁷ Oyo mu siku jae jo kwikara mu mubiri, wejire asabwa no kuremberesya Oyo a:turire okumuonya mu kufwa, nasabwa narira muno na masiga, nongwibwa okuba o:bayire Nyamuanga.

⁸ Nakabee ariga:ri Mwana, nawe engiye okworoba mu binu anya:sibwe.

⁹ Mbe wejire amara okukumisibwa, naba Mwambi wo mweruro gwa kajanende ku bo:ne banu abamworobera.

¹⁰ Niwe Oyo Nyamuanga atogere omugabisi Omukuru rwa kutyo arigairi Melikisedeki.

Banu batakukura abakengibwa

¹¹ Oyo ciriko ne misango myafu ejo kwaika, jinu jikome:e okutonda okuba mutakungwa kisi.

¹² Okuba nakabee kube:ire emwe mube be:igisya okuba omwanya gwaturire mure:ra, nawe mukenere omu:nu asube okube:igisya obwambiro bwo kwiigisya kwe misango ja Nyamuanga. Mwabee banu mukenere amata, aamwi bitari biryo bikome:e.

¹³ Okuba unu kanywa mata, kaba acari kumenya muno omusango gwo burenge:resi, okuba ni mwana muto:to.

¹⁴ Nawe ebiryo ebikome:e nibya bakuru, banu bari no bwenge bunu babunasisye nibunara okwaura eje kisi ne mibi:bi.