Baeburania 4 - INDAGANO INYA:YA

Okufuyama kwa be:kirisya

¹ Mbe eswe, nakabee gucasigae omurago gwo kwingira mu kufukama kwae, cu:baega mu:nu wo:ne kwimwe asiga kuboneka uti agurebereko.

² Okuba eswe one casimuriywe Ebigambo byo bwana, rwa bene, nawe omusango gunu bonguywe gutabare:tee muri:ro, okuba gutasasikene no kwikirisya mu banu bonguywe.

³ Okuba eswe banu ce:kirisisye ecingira mu kufukama okwo, rwa kutyo a:ikire ati, Rwa kutyo naraiye mwisungu ryani, Bataringira mu kufuŋama kwani, nakabee aramarire emirimu jae kuso:kerera anu i:si yamogerwe.

⁴ Okuba a:ikire arebe ku rusiku rwa kata:nu na kabiri ati, Ku rusiku rwa kata:nu na kabiri, Nyamuanga ne:sya omwoyo mu mirimu jae jo:ne.

⁵ Na andi na:ika ati, Abo bataringira mu kufuŋama kwani.

⁶ Mbe okuba omusango gunu gusigaeyo ati, abandi abengiramo, na banu bambire okubwirwa ebigambo byo bwana nibarema okwingira kurwo butongwa,

⁷ Mbe na:ura orusiku orurebe, wejire omwanya mure:ra gwatura, na:ika mu Daudi ati, Rero, rwa kutyo a:ikire kara, ati, Rero mukongwa oburaka bwae Mwasiga kukome:sya emitima jemwe.

⁸ Okuba, aja Yosua abafuŋamya, atakasubire kwaika rusiku rundi.

⁹ Mbe casigaeo ecifuŋamo ca isabato ku ba:nu ba Nyamuanga.

¹⁰ Okuba unu engiye mu kufuŋama kwae, niwe afuŋamire mu mirimu jae, rwa Nyamuanga kutyo afuŋamire mu jae.

¹¹ Mbe cikome:rega okwingira mu kufuŋama okwo, omu:nu wo:ne asiga kugwa mu butongwa bweja:bo obwo.

¹² Okuba omusango gwa Nyamuanga ni muanga, na ka guri na managa, guri no bu:gi kukira ecimari ca mo:gi agabiri, ogusoma ndijei nigwaura obuanga no mwoyo, ne byungo no musono:koro, ka ni mwangu okusombo:kerwa obwiganirisya no bukarae bwo mutima.

¹³ Amwi citario ciyangwa co:ne cinu cibisire imbere yae, nawe ebi:nu byone biri abweru, bisweruywe mu me:so ga Gamare we misango jeswe.

Kristo ni Mugabisi Mukuru

¹⁴ Mbe cirumyega binu ce:kirisisye, okuba ciri no mugabisi Omukuru unu engiye mu rwire, niwe Yesu Omwana wa Nyamuanga.

¹⁵ Okuba Omugabisi weswe atari unu atakutura kucirumwa mu burenga bweswe, nawe asakwaga rweswe mu byone, nawe atakorere bibi:bi.

¹⁶ Mbe cifugere no buba:si ku citebe ce cigongo, korereki cifwirwega ecigongo, na ka cibone ecigongo co kucisakira mu mwanya gwo bukene.