Baeburania 3 - INDAGANO INYA:YA

Kristo akirire Musa

¹ Mbe ba:na ba:su abe:ru, banu musangiye okubirikirwa kwa mu rwire, mwiganirisyega Yesu, unu ari Intumwa no Mugabisi Omukuru owe bigambo binu eci:kirisya.

² Oyo ariga:ri mwiikanyibwa ku Unu amusorere, rwa Musa kutyo ariga:ri mwiikanyibwa mu nyumba yo:ne ya Nyamuanga.

³ Okuba Oyo abariywe ati e:ire rikusyo kukira erya Musa, rwa kutyo unu kombaka inyumba kaba na rikusyo kukira erya inyumba.

⁴ Okuba inyumba yo:ne iri na unu ayumbakire, nawe Unu ombakire byone ni Nyamuanga.

⁵ Ni cimari Musa ariga:ri mwiikanyibwa mu nyumba yae yo:ne rwo mukosi, abe rusingiro ku binu byariga nibyenda okwaikwa.

⁶ Nawe Kristo abee mwiikanyibwa mu nyumba yabo rwo Mwana, neswe ciri nyumba eyo, cikaba cirumisye obuba:si bweswe, no kwiku:ya kwo kwiikanya kweswe kukinga ku bute:ro.

Ebya banyatongwa

⁷ Mbe, rwo Mwoyo Mweru kutyo ka:ika ati, Rero mukongwa oburaka bwae,

⁸ Mwasiga kukome:sya emitima jemwe, Rwa mu mwanya gwa risungu, Rwa mu rusiku rwo kusakwa mwibara.

⁹ Anu basaja wanyu bansakaga, nibandegeja, Nibaroraga ebikorwa byani myaka makumi gana.

¹⁰ Kwonakorere nimbiirirwa riimbo eryo, Ninauka ati, Abayaba kusiku mu mitima jebwe, Ka batamenyere jinjira jani.

¹¹ Rwa kutyo naraiye mwisungu ryani ati, Bataringira mu kufukama kwani.

¹² Mwirinde, ba:na ba:su. Mu munu wo:ne mwimwe gwasiga kubao omutima omubi:bi ogwo bute:kirisya, ogwo kuso:ka ku Nyamuanga omuanga.

¹³ Nawe mukomeresyanyega kusiku:siku, anu omwanya gucariwo gunu ogutogwa ati, rero, korereki munu wo:ne kwimwe asige kukome:sibwa no bubebeya bwe bibi:bi.

¹⁴ Okuba cirabee banu asangiye mu Kristo, cikaba cirumisye okwiikanya kweswe kwo kwamba kukinga ku bute:ro.

¹⁵ Anu a:ikire ati, Rero mukongwa oburaka bwae, Mwasiga kukome:sya emitima jemwe Rwa mu mwanya gwa risungu.

¹⁶ ?Mbe ni baga banu wejire bongwa nibamujisya risungu? ?Batari bo:ne banu baso:kere mu Misiri kubwa Musa?

¹⁷ ?Ka ni baga banu ajiriye risungu myaka makumi gana? ?Tari nibo banu banyamuye, ne bitundu byebwe nibigwa mwibara?

¹⁸ ?Ka ni baga banu e:raisisisye obutengira mu kufukama kwae? ?Tari nibo banu bato:robere?

¹⁹ Mbe, ecirora ati bata:urire kwingira okuba baremere okwikirisya.