Baeburania 2 - INDAGANO INYA:YA

Amasika go kurema omweruro

¹ Nikwo kutyo kuci:ire eswe okwikomeresya kata jinu conguywe, casiga kwifura niciyeywa okubiso:kamo.

² ?Okuba omusango ogwo gwaikirwe na ba:naraika araba gwariga gurumire, na buri cikayo no butongwa byabwene intambara inu i:mire,

³ mbe eswe ciriona kutiki cike:seranya omweruro munene rwa gunu? Nigwo gunu Ratabugenyi atangatire okwaika, nigurumibwa kwiswe na banu bonguywe.

⁴ Nyamuanga omwene na:ika aamwi nabo mu bibarikisyo na mu biruguro na mu bya managa bindi na bindi, na mu biyanwa byo Mwoyo Mweru, rwa kutyo endaga omwene.

Kristo naba mu:nu ucikisye

⁵ Okuba atatungisye ba:naraika i:si inu eyenda oku:ja, inu eca:ikako,

⁶ Nawe omu:nu oumwi a:ikire arebe, na:ika ati, ?Omu:nu ni ci:nu ki korereki umwicuke? ?No mwana wo mu:nu ni ci:nu ki korereki umukararwe?

⁷ Wamukorere arebereo kuto:to ku ba:naraika, Numufwafya orutenga rwa rikusyo ne cibaro, Numutungya ku mirimu ja maboko gao,

⁸ Nuta ebi:nu byone emwaro ye bigere byae. Kwo kutu:ra ebi:nu byone emwaro yae, atasagisye ci:nu co:ne cinu atatee emwaro yae. Nawe woryanu cicari kurora ebi:nu byone nibiru:rwa emwaro yae.

⁹ Nawe ecirore:rera Yesu oyo akorerwe are:bereo kuto:to ku ba:naraika kurwa jinyako jo kufwa, nafwafibwa orutenga rwa rikusyo ne cibaro, korereki arabe orufu kurwa ba:nu bo:ne, kurwe cigongo ca Nyamuanga.

¹⁰ Okuba kwariga kumwiire Oyo akorere bi:nu byone na ka biriwo kubwae, ejire enda okure:ta aba:na ba:fu mwikusyo, kwariga kumwiire okuku:misya Omukuru wo mweruro gwebwe mu kunya:sibwa.

¹¹ Okuba unu ke:sya na banu abesibwa ni ba umwi bo:ne. Kwakorere narema okujira jiswaro okubatogaga aba:na ba:bo,

¹² na:ika ati, Ndibabwira aba:na ba:su risi:na ryao, Ndikwimbira aagati yo kwikofyanya.

¹³ Na rindi na:ika ati, Anye ndamwiikanyaga Oyo. Na rindi ati, Rora, anye na ba:na banu Nyamuanga anae.

¹⁴ Mbe okuba aba:na basangiye amanyinga no mubiri, no Mwene one nyaburiko asangiye ebyo, korereki mu njira yo kufwa asimagisye oyo ariga:ri na managa go kufwa, niwe Syetani,

¹⁵ korereki abasurumure bo:ne banu bariga mu bugaya kurwo ku:baya orufu, siku jo:ne jo buanga bwebwe.

¹⁶ Okuba ni cimari atagegere rususo rwa ba:naraika, nawe naba mu rwiburo rwa Iburaimu.

¹⁷ Kwakorere nikumwiya okususanyibwa na ba:na ba:bo mu byone, korereki abega Mugabisi Mukuru owe cigongo no mwiikanyibwa mu bya Nyamuanga, korereki akore eco:go ce bibi:bi bya ba:nu.

¹⁸ Omwene katura okusakira banu abasakwa, okuba ariga nanyasibwa no kusakwa omwene.