Baeburania 13 - INDAGANO INYA:YA

¹ Mugumega okwendana na ba:na be:ja:su.

² Mutarabirwaga okukuma abagenyi, okuba abandi kurwo kukora kutyo barakumire ba:naraika kumenya uri.

³ Mwicukega ababoywa muri ati muboerwe aamwi nabo. Mwicuke na banu abakorwa kubi:bi, okuba emwe one muri mu mubiri.

⁴ Okutwarana kukusibwe na bo:ne, no buriri bube bweru, okuba abaromesi na basengi Nyamuanga aribatemera ecima.

⁵ Mutabaga na jintungwa jo kurigira jimpirya, nawe binu munabyo biba:narega, okuba Omwene arikire ati, Nitarikusiga na katyari, amwi nitarikweseranya na katyari.

⁶ Kwecikora nica:ika no buba:si ati, Ratabugenyi niwe omusakisi wani. Nitaryubaya. ?Omu:nu arinkora atiki?

⁷ Mwicukega banu babatungire banu bababwiriye omusango gwa Nyamuanga. Murorega jintungwa jebwe ku bute:ro, murorerega ku kwikirisya kwebwe.

⁸ Yesu Kristo rwa kutyo ariga rigoro nikwo kutyo ari rero, na kukinga kajanende.

⁹ Mutagegwagegwaga na kwiigisya kundi na kundi okwe cigenyi, okuba ni kwa bwana omutima gurumibwe ne cigongo, amwi gutakurumibwa na ntungwa ja kurya, jinu banu abaribatiramo batakubonamo muri:ro.

¹⁰ Eswe ciri ne cisyengerero cinu bataragiriywe kuri:rako banu abafurubenda mwiyema.

¹¹ Okuba ebitunganwa biriya, orwamba rwabyo nirwo omugabisi Omukuru kasira mu rubara orweru kurwe bibi:bi, jinyama jabyo nijorcerwa ku mwira gwo busumbiro.

¹² Yesu kwakorere nanya:sibwa ku mwira kwirango, korereki e:sye aba:nu na manyinga gae omwene.

¹³ Mbe ciuruke cimuje:ko ku mwira gwo busumbiro, cigege ecifumo cae.

¹⁴ Okuba anu citana musi mwikara, nawe eciyenja gunu ogwenda oku:ja.

¹⁵ Mbe kurwoyo ciso:sisye Nyamuanga eco:go co kuku:ya kusiku, niryo ritwasyo rye minwa jinu eja:ika risi:na ryae.

¹⁶ Nawe mutarabirwaga okukora ebyo bwana no kugaba, okuba ebyogo byejabo ebyo bikondee Nyamuanga.

¹⁷ Mungwega banu babatungire, mubo:roberega, okuba abo abe:gana emyoyo jemwe, rwa banu abajo:bu:sibwa binu barakorere, korereki bakore kutyo no kukonderwa, tari mu busurumbae, okuba emwe mutakabwenemo muri:ro.

¹⁸ Mucisabirwega, okuba cimenyere ati, riri no mutima gwe kisi, cendere okukora byone na jintungwa jo bwana.

¹⁹ Enibaremberesya muno okukoraga kutyo, korereki nisubibwe kwimwe bwangu.

Nabasabirwa ribando

²⁰ Nyamuanga wo murembe unu amuso:sisye mu bafu:ye omure:fi Omukuru wa jina:ma kurwa manyinga ga indagano ya kajanende, niwe Ratabugenyi Yesu,

²¹ abaku:misye mu misango jo:ne ejo bwana, korereki mukorega binu kenda. Akorega mwiswe binu ebimukondera mu me:so gae kubwa Yesu Kristo. Oyo akusibwega kajanende na kajanende. Amina.

Ebyo kuraga

²² Mbe enibaremberesya, ba:na ba:su, mwigumirisye omusango gunu mwakomeresibwe, okuba nabandikira mu misango mito:to era.

²³ Mumenyere ati Omwana wa:su Timoteo arasurumuywe. Akaja bwangwe, enibabona emwe aamwi nage.

²⁴ Muke:sye bo:ne banu ababatangasya, na be:ru bo:ne. Abende Italia ababake:sya.

²⁵ Ecigongo cibega nemwe bo:ne.