Baeburania 12 - INDAGANO INYA:YA

Jintungwa jo katangirana kweswe

¹ Mbe neswe one, okuba ciri na ba:fu banu abacirora bacisingiye rwe ri:re rinene kutyo, citure kura eci:nu co:ne ecisito, ne cibi:bi cinu cicirumataniyeko, cibirimega okutangirana kunu kuri imbere yeswe no kwigumirisya.

² Nicirore:era Yesu, niwe Omwambi no Mukumisya wo kwikirisya kweswe, Unu okuba akondereywe binu byateywe imbere yae, ne:gumirisya omusaraba, nagaya amaswaro, nenyanja ku kuboko kwe buryo okwe citebe ca iŋoma eca Nyamuanga.

Nyamuanga kacitongera rwa ba:na

³ Mbe mwiganirisyega Oyo e:gumirisisye jimamba jinyafu ja be bibi:bi, jinu bamubambasisye, korereki musige kuigwa no kufwa omutima.

⁴ Mucariga kuyajana na bibi:bi nimurwana ndijei amanyinga ngafwa.

⁵ Rindi mwarabiywe okukomeresibwa okwo, rwa kutyo mwabwiriywe rwa ba:na ati, Mwana wani, utagayaga okutongera kwa Ratabugenyi Amwi akakugonya, wasiga kufwa mutima.

⁶ Okuba Ratabugenyi unu endere kamutongera, Kabuma Omwana wo:ne unu karamira.

⁷ Mwigumirisyega mu kutongerwa, okuba Nyamuanga kabakora rwa ba:na. ?Okuba ni mwana ki unu esemwene atakutongera?

⁸ Nawe mukaba mutana kutongerwa kunu bo:ne basangiye, muri ba:na be mwira amwi mutari ba:na.

⁹ Rindi cariga na barata bo mubiri, banu bacitongeraga, nicibayanaga ecibaro. ?Mbe kutaci:ire muno okworobera Esemwene myoyo jeswe, cibe baanga?

¹⁰ Okuba ni cimari abo bacitongeraga siku no:to rwa kutyo bendaga, nawe Oyo kacitongera cibonemo omuri:ro korereki cisangire obweru bwae.

¹¹ Okutongerwa kwone okwa woryanu, citakwiganirisya ati ni kwa kukonderwa, nawe ni kwa busurumbae. Nawe wora kweya, nikutwasya amatwasyo go murembe ku banu be:igisibwe mukwo, nigo amatwasyo go burengeresi.

¹² Mbe mukome:sye amaboko ganu gareremae, na jiriokora jinu jikomborikire.

¹³ Mbe, mugororerega amaguru gemwe jinjira, korereki unu katigi:ra asige kuyu:kira rubara, nawe akiri aonyibwe.

¹⁴ Muru:bega omurembe na ba:nu bo:ne, no bweru bunu omu:nu akaba atanabwo atarirora Ratabugenyi.

¹⁵ Mukabukega mu:nu wo:ne asige kureba ku cigongo ca Nyaumanga, risigega kufu:ka risina ryone eryo bururu rinu erinya:sya no kujabiasya ba:fu.

¹⁶ Asigega kubao muromesi, amwi unu ataku:kaya Nyamuanga, rwa Esau unu agusisye obukuru bwae obwo kwiburwa, nabugusya biryo bityari.

¹⁷ Okuba mumenyere ati, wejire asuba okwenda okurya omwandu gwa ribando, naremwa, okuba atabwene mwanya gwo kuta nakabee ariyenjere narira na masiga mogomogo.

Ecima ca Sinai ne ca Sayuni

¹⁸ Okuba mutajiye ku ci:ma cinu ecigwatwako, na cinu eca:ka omuriro, amwi mutajiye mu kwirabusya, amwi ku cisu:te ne ciure.

¹⁹ Amwi ku kurira kwa iŋombi amwi ku buraka bwe misango. Ebyo aba:nu wejire bongwa, nibaremberesya basige kubwirwa musango gundi gwone.

²⁰ Okuba bataguturire gunu gwaragiriywe ati, Nakabee ciri citunganwa cikaku:nia ku ci:ma eco, ci:tirwe mabui.

²¹ Na ebyo byabonekere byariga bya makanyo muno, ndijei Musa na:ika ati, No:baya muno no kuyarara.

²² Nawe mwejire ku ci:ma ca Sayuni, na ku musi gwa Nyamuanga omuanga, na ku Yerusalemi ya mu rwire, na ku bise bya ba:naraika banu batakubarwa,

²³ na ku kwikofyanya okunene na ikanisa ya bo bubere banu bandikirwe mu rwire, na ka mwejire ku Nyamuanga unu karamura bo:ne, na ku myoyo ja barengeresi banu baku:misibwe,

²⁴ na ku Yesu omwaikanya wa indagano inyaya, na ku manyinga go kumijira ganu aga:ika kisi kukira aga Abeli.

Bakomeresibwa okungwa Unu ka:ika

²⁵ Mukabuke musigega kurema Unu ka:ika. Okuba, banu bamuremere oyo ababwiriye ari mu ca:ro, araba bataonere, kukira muno eswe citariona cikafutatira Oyo ka:ika okuso:ka mu rwire.

²⁶ Oyo atikimisye i:si no buraka bwae mu magoro gariya. Nawe woryanu aragire omurago ati, Rucasigaeo rumwi ndisingisya tari i:si era, nawe no rwire one.

²⁷ Omusango gunu arikire ati, Rucasigaeo rumwi, ogweresya ati, binu ebisingisibwa biriso:sibwao, rwa binu byakorerwe, korereki binu bitakusingisibwa bi:kareo.

²⁸ Mbe okuba cayanirwe obukama bunu butakusingisibwa, cisi:mega Nyamuanga, nikwo cimukorere mu binu ebimukondera, na mu ku:baya no kumuyana ecibaro.

²⁹ Okuba Nyamuanga weswe ni muriro gunu ogwoca.