Baeburania 10 - INDAGANO INYA:YA

Ebyogo bya kara bitakumarao bibi:bi

¹ Okuba ebiragiro biri rwa rirengesi era erye bi:nu byo bwana binu byariga nibyenda oku:ja, amwi bitari rususo rwe bi:nu ebyo cimari, ebyogo ebyo kwebikora mbiremo:tura okuku:misya banu abafugera no kubiso:sya siku jo:ne ne myaka jo:ne.

² ?Okuba byakabee biri kutyo, bitakasigiywe okuso:sibwa? Okuba banu abaramya, wejire be:sibwa kata rumwi batakabee na kwimenyako bibi:bi rindi.

³ Nawe ebyogo ebyo ebi:cukyaga ebibi:bi buri mwaka.

⁴ Okuba jitamisye orwamba rwa jindume no rwa jimbusi okuso:syako ebibi:bi.

⁵ Wejire aja mu ca:ro, kwakorere na:ika ati, Ebyogo ne byo kuso:sya utabyendere, Nawe wancumacumiye omubiri.

⁶ Utakondereywe ebyo kwoca ebikobe, ne byo kuso:sya kurwe bibi:bi.

⁷ Mbe niwo nina:ika ati, Rora ne:jire okukora binu owenda, awe Nyamuanga Rwa kutyo nandikiywe mu mufunjo gwe citabo.

Eco:go ca Kristo camarire ebibi:bi

⁸ Anu a:ikire inguru ati, Ebyogo ne byo kuso:sya ne byo kwoca bikobe na binu ebiso:sibwa kurwe bibi:bi utabyendere, amwi utabikondereywe, rwa kutyo ebiso:sibwa mu biragiro.

⁹ Niwo na:ika ati, Rora ne:jire okukora binu owenda. Kaso:syao eco kwamba korereki arumye eca kabiri.

¹⁰ Kurwo kwenda okwo eswe ce:sibwe kurwo kuso:sibwa kwo mubiri gwa Kristo rumwi era.

¹¹ Na bagabisi bo:ne abe:mereguru kusiku nibatamba kwiya ka:fu ebyogo ebyebyo, binu bitaritura kuso:syao bibi:bi na katyari.

¹² Nawe Oyo wejire amara okutamba eco:go cimwi era eca kajanende kurwe bibi:bi, mbe niwo nenyanja ku kuboko kwe buryo okwa Nyamuanga.

¹³ Kuso:kerera ao arindiriye kukinga abaremo bae ariba batu:rwa emwaro ye bigere byae.

¹⁴ Okuba abaku:misisye banu abe:sibwa kukinga kajanende kurwo kutamba eco:go cimwi.

¹⁵ Mbe no Mwoyo Mweru niwe kaci:mako, okuba wejire amara okwaika ati,

¹⁶ Inu niyo indagano inu ndiragana nabo, Nikwo kutyo ka:ika Ratabugenyi, Jisiku jiriya ariba je:ya, Nditu:ra ebiragiro byani mu mitima jebwe Na ka ndibyandika mu kwiganirisya kwebwe.

¹⁷ Niwo na:ika ati, Ne bibi:bi byebwe ne bikayo byebwe nitarisuba kubi:cuka.

¹⁸ Mbe ebyo bikaba bi:swaririywe, ebyo:go bitaca-so:sibwa kurwe bibi:bi. Injira yo kufugera ku Nyamuanga

¹⁹ Kwecikora, ba:na ba:su, niciba no buba:si okwingira mu rubara orweru kurwa manyinga ga Kristo,

²⁰ Nicingira mu njira inu acikoree inya:ya na i:manga, inu eitiŋana mwisaenge, nigwo omubiri gwae.

²¹ Na ka ciri no mugabisi Omukuru unu atungire inyumba ya Nyamuanga.

²² Mbe cifugere no mutima gwe cimari kurwo kwikirisya kunu kuku:miye, cibe ne mitima jeswe jimijiyweko obute:menyako cibi:bi, ne mibiri jeswe jo:si:bwe na manji ge kisi.

²³ Cirumyega binu eci:kirisya no kwiikanya, kuteratera uri, okuba unu aragire omurago ni mwiikanyibwa.

²⁴ Na ci:ganirisyanyega eswe abene:ra korereki cikome:syanye okwenda no kukora ebyo bwana.

²⁵ Citasigaga kwikofyanya aamwi, rwa jintungwa ja bandi kutyo jiri, nawe cikomeresyanyega niciyongesya muno okukora kutyo, rwa kutyo omurora orusiku ruriya rwajo:fugera.

Intambara ya be:koti

²⁶ Okuba cikanyamurira cigundu ke:nu camarire okuyabwa okusombo:kerwa ebye cimari, mbe eciba citacasigaeo co:go cindi ca bibi:bi,

²⁷ nawe bwasigae obu:ba bwo kurindirira ntambara no bururu bwo muriro gunu ogu:jo:kwoca abaremo.

²⁸ Unu ariga nagaya ebiragiro bya Musa nafwa, kurwo kwaika kwa banu barorere babiri amwi basatu, cigongo uri.

²⁹ ?Omwiganirisya kutiki? Unu atajire Omwana wa Nyamuanga, nabara amanyinga ga indagano ganu gamwesisye ati, ni cinu ca kutyo era, namwima:turira Omwoyo we cigongo, ?mbe oyo ate:ire intambara nene muno?

³⁰ Okuba amumenyere unu a:ikire ati, Orusima ndwani, anye ndisubya orusima, Na rindi ati, Ratabugenyi aritemera aba:nu bae ecima.

³¹ Ni musango gwo ku:baya muno okugwa mu maboko ga Nyamuanga omuanga.

³² Nawe mwicuke jisiku ja kara ati, wejire mwase:ka:nirwa obweru, nimwigumirisya mu kurwana okwafu kwo kunya:sibwa.

³³ Orundi runu mwabee ciku:mo kurwo kufumwa no kunya:sibwa, no rundi anu mwasangiye na banu bakoreywe ebyo.

³⁴ Okuba mwafwiriye ababoywa ecigongo, nimwikirisya okusa:kurwa ebi:nu byemwe nimukonderwa, okuba mumenyere ati muri ne bi:nu bye kisi na binu ebi:karao.

³⁵ Mbe mutesaga bubasi bwemwe, bunu obure:ta omuye:ro mwafu.

³⁶ Okuba mukenere okwigumirisya, korereki ariba mwamara okukora binu Nyamuanga kenda, niwo muyabwe omurago.

³⁷ Okuba kacasigaeo kasinjeke era. Na Unu ka:ja ari:ja, atariko:ra.

³⁸ Nawe omurenge:resi arabaga muanga kurwo kwikirisya. Nawe omu:nu akasuba inyuma, Omwoyo gwani gutakumukondererwa.

³⁹ Nawe eswe citari ba kusuba inyuma mu kusimagira, nawe ciri banu abe:kirisya kukinga mu mweruro gwo mwoyo.