2 Timoteo 4 - INDAGANO INYA:YA

Okukomeresya kwa ku butetro

¹ Enikukomeresya imbere ya Nyamuanga na Kristo Yesu, unu ariramura abaanga na bafu:ye, na kurwo kuboneka kwae no bukama bwae, ati,

² Simuraga omusango, ubega umaririye mu mwanya gunu gwiire na mu mwanya gunu gute:ire. Ganyaga, gonyaga, komeresyaga no kwigumirisya kwone no kwiigisya.

³ Okuba omwanya guri:ja anu barirema okungwa okwikirisya kunu kwimire, nawe amatwi garibanyegera, barikofya abe:igisya ŋumo, rwa kutyo baririgira abene.

⁴ Bariindura amatwi gebwe basige kungwa ebye cimari, nibaindukira ji:sumo jo rurimi.

⁵ Nawe awe kengaga mu byone. Nya:kaga, ukorega omurimu gwo kusimuraga Ebigambo byo bwana, ku:misyaga okukora kwao.

Paulo ka:jo:marisya murimu gwae

⁶ Okuba obuanga bwani obwitururwa woryanu, no mwanya gwo kuta:tirwa kwani gwafugee.

⁷ Ndarwanire oburemo bwo bwana, namarire okutangirana, ndarumisye okwikirisya.

⁸ Cinu casigaeo, nibi:kiywe orutenga rwo burenge:resi, runu Ratabugenyi arinanira ku rusiku ruriya, niwe unu katema eci:na cirengere. Amwi atari anye era, nawe aribayana bo:ne banu abenda okuboneka kwae.

⁹ Wikome:sye oku:ja kwanye bwangu.

¹⁰ Okuba Dema ansigire, nenda ebya mu ca:ro cinu, nagenda Tesalonika. Kireseke nagenda Galatia, Tito nagenda Dalimatia.

¹¹ Luka niwe cinage enyere:ra. Gega Mariko, u:je aamwi nage, okuba kansakira mu mirimu.

¹² Nawe Tukiko namutumire Efeso.

¹³ Rigoti rinu nasigire Tiroa ewa Karipo, ariba waja, u:je naryo, ne bitabo one, nawe kukirao ure:te ebitabo bya jinjai.

¹⁴ Alekisanda omuyesi we bikomo ankorere kubi:bi muno. Ratabugenyi arimuriya rwe bikorwa byae kutyo biri.

¹⁵ Awe one umwikengega oyo, okuba aremere emisango jeswe muno muno.

¹⁶ Mu kuromanwa kwani okwo kwamba ariga atario mu:nu unu anyimireko, nawe bo:ne bamoeko. Enisabwa basige kubarirwa cikayo.

¹⁷ Nawe Ratabugenyi e:mereguyu aamwi nanye, nantamo amanaga, korereki niku:misye binu nariga ninsimura, na ba:maanga bo:ne korereki bongwe, naonyibwe mu kanwa ka i:ntare.

¹⁸ Ratabugenyi aramonyaga mu cikorwa co:ne cibi:bi, ka arandindaga okukinga mu bukama bwae obwa mu rwire. Akusibwega kajanende na kajanende. Amina.

¹⁹ Ke:sya Pirisika na Akula, na ba inyumba ya Onesiforo.

²⁰ Erasito asigae Korinto, nawe Tirofimo namusigire Mileto arwae.

²¹ Wikome:sye oku:ja ji:siku ja imbeo jicari ku:ja. Euburo kakuke:sya, aamwi na Pudente na Lino, na Kilaudia, na ba:su bo:ne.

²² Ratabugenyi abega no mwoyo gwao. Ecigongo cibega nemwe.