2 Timoteo 2 - INDAGANO INYA:YA

Timoteo abega musirikare wa Kristo

¹ Mbe awe, mwana wani, kome:raga mu cigongo cinu ciri mu Kristo Yesu.

² Binu wongwaga kwanye aamwi na banu bariga nibarora bari ba:fu, ejo ujibi:kisyega aba:nu banu abe:ikanyibwa, banu baritura okwiigisya na bandi one.

³ Usangire mu nya:ko jani, rwo musirikare we kisi owa Yesu Kristo.

⁴ Musirikare wo:ne unu kajo:rwana, atakwinyasya emirimu ejindi ejo buanga bunu, korereki akondisye unu amwandikire okuba musirikare.

⁵ Omu:nu unu kaki:byanya mu bwenywa, atakuyabwa rutenga akaba ataki:byanyisye rwa kutyo buragiriywe.

⁶ Omurimi unu kanyaka kumwiire abe wo kwamba okugega amatwasyo.

⁷ Iganirisyaga binu ena:ika, okuba Ratabugenyi arakuyanaga okusombo:kerwa mu byone.

⁸ Icuka Yesu Kristo, unu asu:kire mu bafu:ye, owa mu rwiburo rwa Daudi, rwe Bigambo byani ebyo bwana kutyo ebyaika.

⁹ Nibyo Ebigambo binu eninya:kira okukinga mu buboywa, rwo munyamusi. Nawe omusango gwa Nyamuanga gutakuboywa.

¹⁰ Kwenikora ninigumirisya byone kurwa basorwa, korereki abene one babone omweruro gunu guri mu Kristo Yesu aamwi na rikusyo rya kajanende.

¹¹ Omusango gunu ni mwiikanyibwa ati, Araba cafu:ye aamwi nage, mbe ciriba baanga aamwi nage.

¹² Cike:gumirisya, ciritunga aamwi nage. Cikamwiga:na, no Mwene arici:ga:na eswe.

¹³ Cikaba citari be:ikanyibwa, Omwene kaba ari mwiikanyibwa:ra. Atakutura kwirema omwene.

¹⁴ Ube:cukyega ebyo, namukomeresya imbere ya Nyamuanga ati, basigega kubambasyanya emisango okuba kutakure:ta muri:ro, nawe okuyabya banu abongwa.

¹⁵ Ikome:sya okwiyeresya ku Nyamuanga ati, uri mukosi unu wikirisibwe, ka unu utakwiswara, unu kakorera bwima omusango gwe cimari.

¹⁶ Nawe wikengega emisango ja kutyo era jinu jite:ire okuba ejongesya obunyamusi.

¹⁷ No musango gwebwe guraryaga rwa riko:koro, kwabo nibo Umenayo na Fileto,

¹⁸ banu bayabire mu bye cimari, niba:ika ati, okusu:ka kwa bafu:ye kurabeeo, nibacu:sya okwikirisya kwa bandi.

¹⁹ Nawe omusingi gwa Nyamuanga guri ao gurumire, guriko ecibarikisyo cinu ati, Ratabugenyi amenyere abae, na rindi ati, Unu wo:ne katogora risi:na rya Ratabugenyi, asige byo burangirangi.

²⁰ Nawe mu nyumba inene bitakubamo bi:nu bya jaabu na mpirya era, nawe ne bya mati ne bya rimoga. Ebindi ni bye cibaro, ne bindi bitari bya cibaro.

²¹ Mbe, omu:nu ake:cumako ebyo, arabaga ci:nu ce cibaro, cinu ce:sibwe, na cinu ci:ire omwenenyumba okukoreraga, cinu cicumacumiywe omurimu gwone ogwo bwana.

²² Nawe irukaga inamba yo bumura, mubega ebyo burenge:resi, no kwikirisya, no kwenda, no murembe, aamwi na banu abamusabwa Ratabugenyi no mwoyo gunu gwerere.

²³ Nawe usigega jimamba jo bumu:mu no butamenya, okuba umenyere ati, eji:bura inyombo.

²⁴ Nawe omugaya wa Ratabugenyi ate:ire kuyomba, nawe abega nfura ku bo:ne, na unu katura okwiigisya, no mwigumirisya.

²⁵ Atongerega mu bufura banu abayajana, e:fura amwi Nyamuanga aribayana okuta, bamenyegesye ebye cimari,

²⁶ bakabaruke okuso:ka mu muye:to gwa Syetani, oyo abagwasisye korereki bakore binu kenda.