2 Petero 2 - INDAGANO INYA:YA

Ebya be:igisya bo rurimi

¹ Nawe bariga bario abaragi bo rurimi mu ba:nu, na ka mwimwe one baribao abe:igisya bo rurimi, banu barire:ta okwiigisya kunu okusimagisya mu burigerige. Barirema Ratabugenyi unu abagurire, nibe:re:tera okusimagisibwa bwangu.

² Na ba:fu bariru:ba orukubo rwebwe, banu injira ye cimari kufumwa kurwebwe.

³ Abo baribona amabona mwimwe kurwo kurigira kwebwe, niba:ika emisango jo rurimi. Intambara yebwe kuso:ka kara itakuko:ra, no kusimagisibwa kwebwe kutakuongerera.

⁴ Okuba araba Nyamuanga ate:swaririye bamaraika banu banyamuye nawe nabe:sa mu ryobo, nabatu:ra mu mo:bo ge cisu:te, barindisibwe intambara.

⁵ Narema okwiswaririra i:si ya kara, nawe naonya Nuu, niwe omusimusi wo burenge:resi, na be:ja:bo bata:nu na babiri benyere:ra, nare:ta induruma ku:si ya banyamusi.

⁶ Naindura emisi ja Sodoma na Gomora kuba efu, najitemera eci:na najisimagisya, najitao kuba cirorero ku banyamusi.

⁷ Naonya Lutu omurenge:resi, unu ariga nawa omwoyo muno kurwa jintungwa jo rukubo rwa banyamusi.

⁸ Okuba omu:nu:yo omurenge:resi unu ariga abe:kaemo nabarora no kubongwa anya:sibwaga omwoyo gwae omurenge:resi kusiku kurwe bikorwa byebwe ebyo bwikoti.

⁹ Ratabugenyi amenyere okuonya abeyami mu kusakwa, no kurinda abanyamusi kukinga ku rusiku rwo kutema eci:na,

¹⁰ nawe okukira bo:ne, ni banu abaribatira mu byo mubiri, mu kurigira kwo bujabi, nibagaya abatungi. Ni baba:si na ba kasinye nibagaya abe cibaao, ku:baya uri.

¹¹ Nawe bamaraika, nakabee babakirire amanaga no buinga, nawe batakubabu:ra amwi kubafuma imbere ya Ratabugenyi.

¹² Nawe abo bari rwa jintyanyi jinu jitana bwenge mu busimuka bwajo, niji:burwa korereki jigwatwe no kusimagira. Abafuma mu misango jinu batamenyere. Nikwo kutyo barisimagisibwa mu kusimagira.

¹³ Abajo:bona omuye:ro gwo bunyamusi bwebwe. Abatoga ati, orumura rwa kusiku nikwo okukonderwa. Ni mabara na masoro anu abarya aamwi nemwe nibaru:ba orumura mu kubebeya kwebwe.

¹⁴ Ame:so gebwe ge:juye oburomesi, nigarema okusiga ebibi:bi, nibakongyakongya emyoyo ja banu batarumire. Bari ne mitima jinu jinarire okurigira, ni ba:na be ci:imo.

¹⁵ Abo basigire injira yo bwima nibayaba, nibaru:ba injira ya Balaamu omwana wa Beori, unu ariga endere omuye:ro gwo bunyamusi.

¹⁶ Nawe nagonyibwa kurwo bunyamusi bwae, isikiri inu itakwaika niya:ika no buraka bwo mu:nu, ni:ingirira orusaro rwo muragi.

¹⁷ Abo nibo ebinyo binu bitarimo manji, ni me:re ganu agagegwa no muyaga gwe ciure. Nibo abarindisibwa ecisu:te eci:rafuru pi.

¹⁸ Okuba aba:ika emisango minene muno eja kutyo era, nibakongyakongya banu abe:ruka abo nibabakongyakongya mu kurigira kwo mubiri na mu rukubo.

¹⁹ Ababaraga omurago ati ababa be:bure, ke:nu abene bari bagaya bo bunyamuke. Okuba omu:nu akaigwa owe:ja:bo, mbe naba mugaya wo:yo kamuiga.

²⁰ Okuba araba bambire okwiruka obujabi bwa i:si kurwo kumenya Ratabugenyi no Mukisya Yesu Kristo, nawe bakasuba okukomwa omwo nibaigwa, mbe ebyebwe bya ku bute:ro ebibiya kukira ebyo kwamba.

²¹ Okuba bwakabee kwa bwana okusiga okumenya injira yo burenge:resi, kukira okwamba okuimenya nibasuba inyuma okusiga eciragiro ece:ru cinu bayabirwe.

²² Cabaku:miriye cijekekanyo ce cimari ati, Imbwa yasubi:ye amatanake gayo, na ingurube inu yo:sibwe yasubire okwigaragasya mu rutoto.