2 Petero 1 - INDAGANO INYA:YA

¹ Anye Simoni Petero, unu ndi mugaya na intumwa ya Yesu Kristo, enandikira banu babwene okwikirisya kwo bugusi burambu aamwi neswe mu bure-nge:resi bwa Nyamuanga no Mukisya weswe, niwe Yesu Kristo.

² Ecigongo no murembe biyongesyega kwimwe mu kumenya Nyamuanga na Ratabugenyi Yesu.

³ Rwa kutyo obuinga bwa Bunyamuanga bwaciyae eswe byone ebyo buanga no bwiyami kurwo kumumenya Unu acibirikiye kurwa rikusyo ryae no bwira bwae omwene.

Kutyo okwikirisya okwiyongesya

⁴ Kwibyo cayabirwe emirago jo bugusi burambu ne minene muno, korereki kurwebyo musangire obusimuka bwa Nyamuanga, wejire mwamara okuona mu bunyamuke bunu buri mu ca:ro kurwo kurigira.

⁵ Mbe nikwo kutyo mukome:rega okwongesya obwira mu kwikirisya kwemwe. Na mu bwira bwemwe mwongesyega okumenya.

⁶ Na mu kumenya kwemwe mwongesyega okwibaririra. Na mu kwibaririra kwemwe mwongesyega okwigumirisya. Na mu kwigumirisya kwemwe mwongesyega obwiyami.

⁷ Na mu bwiyami bwemwe mwongesyega okwendana na ba:na banyu. Na mu kwendana na ba:na banyu mwongesyega okwenda.

⁸ Okuba emisango ejo jikaba mwimwe no kufura, ejibakora banu mutari barenga, amwi mutari banu batana matwasyo mu kumenya Ratabugenyi Yesu Kristo.

⁹ Okuba unu atana misango ejo ni muofu, karora eu:ja, arabiywe kutyo e:sibwe ebibi:bi byae ebya kara.

¹⁰ Mbe ba:na ba:su, mukome:rega muno okurumya okubirikirwa kwemwe no kusorwa kwemwe, okuba ejo mukajikora, mutari:ku:jura na katyari.

¹¹ Okuba nikwo kutyo muriyanwa okwingira cikama mu bukama bwa kajanende obwa Ratabugenyi no Mukisya weswe, niwe Yesu Kristo.

Binu byandikirwe birumire

¹² Nikwo enikora nimaririye kusiku okube:cukya ejo, nakabee mujimenyere, nimuruma mu kumasya kunu munakwo.

¹³ Nawe eni:ganirisya ati ni kwa kisi, nikaba nicari mwiuna rinu, nibakungirisyega nimbe:cukya.

¹⁴ Okuba nimenyere ati, nitakuko:ra kuso:ka mwiuna rinu, rwa kutyo Ratabugenyi Yesu Kristo ambarikisisisye.

¹⁵ Nawe enikome:raga, korereki ariba namara okufwa, muturega okwicuka ejo kusiku.

¹⁶ Okuba eswe cita:ru:bire sumo jinu jate:me:kerwe mu bwengebwenge anu cariga nicibamenyesya obuinga bwa Ratabugenyi Yesu Kristo no ku:ja kwae, nawe carorere amakanyo gae na me:so geswe.

¹⁷ Okuba Nyamuanga Rata a:muyanire ecibaro na rikusyo, wejire riraka ryaso:ka mwikusyo ryafu nirimwaika ati, Unu niwe Omwana wani omwendwa unu enikondererwa muno.

¹⁸ Neswe conguywe riraka eryo niriso:ka mu rwire, anu cariga ciri aamwi nage ku ci:ma ece:ru.

¹⁹ Rindi eswe ciri no musango gwo buragi gunu gurumire muno. Omukora kwa bwana mukategeresya omusango ogwo, rwa itara inu eya:kira mu cisu:te, kukinga anu obwire burice:ra, na risonde nirise:ka:na mu mitima jemwe.

²⁰ Okwamba mumenye ati, omusango gwone ogwo buragi gwa mu binu byandikirwe, gutakugajurwa gwenyere:ra,

²¹ Okuba gutario musango gwo buragi gunu gware:terwe mu kwenda kwa ba:nu anu cikabe:reega, nawe aba:nu ba:ikaga binu byaso:kaga ku Nyamuanga, nibagegwa no Mwoyo Mweru.