2 Batesalonika 3 - INDAGANO INYA:YA

¹ Ebya ku bute:ro, ba:na ba:su, mucisabirwega, omusango gwa Ratabugenyi guswire no kukusibwa, rwa kutyo guri mwimwe.

² Neswe munsabirwe cionyibwe mu ba:nu abe:koti na banyamusi okuba batari bo:ne banu bari no kwikirisya.

³ Nawe Ratabugenyi ni mwiikanyibwa, ka niwe aribarumya no kubarindaga ku mubi:bi.

⁴ Neswe eci:ikanya Ratabugenyi kubwemwe ati omukora binu ecibaragirira na ka murabikoraga.

⁵ Ratabugenyi atangasye emitima jemwe mu kwenda kwa Nyamuanga, na mu kwigumirisya kwa Kristo.

⁶ Ba:na ba:su, ecibakomeresya mwisi:na rya Ratabugenyi Yesu Kristo, ati, mwiyaurega ku wa:su wo:ne unu atakuribata kisi rwa jintungwa jinu mwayabirwe eswe.

⁷ Okuba mumenyere emwe abene rwa kutyo kube:ire okucirorerako eswe, okuba eswe citaribatire buyagayaga mwimwe.

⁸ Amwi cita:ri:ye biryo bya mu:nu wo:ne kutyo era, nawe cakoraga emirimu mu ngeta na mu mwisi, nicinya:ka no kwikome:sya, korereki cisige kutamirisya mu:nu wo:ne.

⁹ Tari ati citakutura, nawe nici:tegayo cibe co kurorerako korereki muciru:be.

¹⁰ Okuba anu cariga ciri aamwi nemwe cabaragiriye ati, omu:nu wo:ne akarema okukora emirimu, no kurya asige kurya.

¹¹ Okuba ecungwa ati, bariyo abandi mwimwe banu batakuribata kisi, amwi batakukora mirimu na katyari, nawe abe:tu:ra mu bya bandi.

¹² Ecibaragirira no kubakomeresya mu Ratabugenyi Yesu Kristo ati, banu bari kutiyo bakorega emirimu bacore:rere, no kurya ebiryo byebwe abene.

¹³ Nawe emwe, ba:na ba:su, mutaigwaga okukora ebyo bwana.

¹⁴ Omu:nu wo:ne akarema okworobera omusango gweswe mu nyaruba inu, oyo mumubarikisye, amwi mwasiga kuyengyanya nage, korereki e:sware.

¹⁵ Amwi mutamutogaga rwo muremo, nawe mumutongerega rwo mwana wanyu.

Nabasabirwa ribando

¹⁶ Ratabugenyi wo murembe omwene abayanega omurembe siku jo:ne mu njira jo:ne. Ratabugenyi abega nemwe bo:ne.

¹⁷ Anye Paulo enandika okuke:sya kwani no kuboko kwani anye omwene, nico ecibarikisyo cani mu nyaruba jani jo:ne. Nikwo kutyo enandika anye.

¹⁸ Ecigongo ca Ratabugenyi Yesu Kristo cibega nemwe bo:ne.