2 Bakorinto 9 - INDAGANO INYA:YA

Abakorinto babe be:ra:bire okugaba

¹ Mbe mu byo kufurubendera abe:ru, nitakenere anye okubandikira.

² Okuba nimenyere okwenda kwemwe, kunu enibaku:isyamo ku ba Makedonia ati, aba Akaya bamarire mwaka be:ra:bire. No kukome:ra kwemwe kwakungirisisye ba:fu mwabo.

³ Nawe nabatumire aba:su, korereki okuku:ya kweswe kurwemwe kwasiga kuba kwa kutyo era mu bigambo binu, nemwe mube mwira:bire rwa kutyo na:ikire.

⁴ Abamakedonia abandi baka:ja aamwi nanye, eswe, citakwaika ati emwe, eswe casiga kwiswara mu kwiikanya kunu, cikabasanga mute:ra:bire.

⁵ Kwonakorere nini:ganirisya ati, kunyiire okubwira aba:su batangate oku:ja kwimwe, bambe bakofye ebiyanwa bya ribando binu mwaragire kara, korereki bibe bimaririye rwa binu ebiyanwa mu kwenda, tari mu bununu.

Okugaba okure:ta omuri:ro

⁶ Nawe cinu ena:ika ciri ati, Unu kabiba bikeere arigesa bikeere, na unu kabiba byafu arigesa byafu.

⁷ Omu:nu wo:ne akorega rwa kutyo akarariye mu mutima gwae, tari mu busurumbae amwi mu kusinyirisibwa, okuba Nyamuanga kenda unu kagaba akondeywe.

⁸ Mbe Nyamuanga katura okutarasya amabando gome kwimwe, korereki emwe mube na binu ebibamara byone mu misango jo:ne kusiku, korereki musagirire mu bikorwa byone ebyo bwana.

⁹ Rwa kutyo byandikirwe ati, Anyaraganyisye, agabiye abataka, no burengeresi bwae buri:kara kajanende.

¹⁰ Nawe Unu kayanaga omubibi imbibo ne biryo byo kurya, niwe arabayanaga no kubongesyagako imbibo yo kubiba, ka aratarasyaga amatwasyo go burengeresi bwemwe.

¹¹ Muni:bibwe mu byone korereki mukore obugabi bwafu, bunu obukora Nyamuanga nasi:mwa mwiswe.

¹² Okuba okufurubenda kunu kwo kugaba kutakwi jusyara indengo ya binu bakenere abe:ru, nawe okusagirira nikumure:tera Nyamuanga okusi:ma kwafu.

¹³ Okuba mu kusakwa kwemwe okwa mu kufurubenda kunu, abamukusya Nyamuanga kurwo kworoba kwemwe mu kutogora Ebigambo byo bwana ebya Kristo na kurwo bugabi bwemwe obwafu ku be:ne na ku bo:ne.

¹⁴ Abe:ne ababasabirwa no kubajirira jiŋumbu, okuba ecigongo ca Nyamuanga cisagiriye mwimwe.

¹⁵ Nyamuanga asi:mwe kurwe ciyanwa cae cinu citakwaikwa.