2 Bakorinto 8 - INDAGANO INYA:YA

Ebiyanwa bya jikanisa ja Makedonia

¹ Mbe bama ba:su, ecibabwira ebye cigongo ca Nyamuanga cinu cagabiywe mu kanisa ja Makedonia.

² Ati, mu kusakwa kwafu kwa jinya:ko, okukonderwa kwebwe okwafu no butaka bwebwe bwafu byasagiriye mu bwafu bwo bufura bwebwe.

³ Okuba eniba:ika ati, bagabire bi:nu byebwe abe:ne:ra rwa kutyo baturire no kukira amanaga gebwe.

⁴ Nibacisabwa no kwiremberesya kwafu ati, babone ribando ryo kusangira mu murimu gwo kufurubendera abe:ru.

⁵ Byariga bitari rwa kutyo nariga nini:ikanya, nawe batangatire okwitegayo abe:ne ku Ratabugenyi na kwiswe mu kwenda kwa Nyamuanga.

⁶ Kwocakorere nicikomeresya Tito, ati, rwa kutyo ambire kara, nikwo kutyo aku:misye omurimu gunu gwa ribando mwimwe.

⁷ Nawe rwa kutyo mufufi:fye mu byone mu kwikirisya, na mu kwaika, na mu bwenge, na mu kukome:ra kwone, na mu kwenda kwemwe kwiswe, mbe musagirirega na mu murimu gunu gwa ribando one.

⁸ Nitakwaika eco ati ni ciragiro, nawe korereki nisake okumasya kwo kwenda kwemwe kurwo kukome:ra kwa bandi.

⁹ Okuba mumenyere ecigongo ca Ratabugenyi Yesu Kristo ati, nakabee ariga:ri muni:bi, nawe naba mutaka kurwemwe, korereki emwe mube bani:bi kurwo butaka bwae.

¹⁰ Mu musango gunu enibabwira okwiganirisya kwani ati, kube:ire emwe okukumusya omurimu gunu mwatangatire okwamba, kutari kukora era, nawe no kukondererwa one, na wori mwamarire mwaka.

¹¹ Nawe woryanu mukumisye okukora. Rwa kutyo mwariga mwanguire okwenda, mbe nikwo kutyo mwangue okuku:misya rwa kutyo omutura.

¹² Okuba okwenda kukaba kurio, omu:nu ke:kirisibwa, rwa binu anabyo kutyo biri, tari rwa binu atanabyo.

¹³ Okuba nitakwaika kutyo korereki abandi banguirwe nemwe musitoerwe,

¹⁴ Nawe korereki byone biriŋanirire. Mu mwanya gunu okufufya kwemwe kusakire okukena kwebwe. Andi, okufufya kwebwe one kusakire okukena kwemwe, korereki muriŋanirire,

¹⁵ rwa kutyo byandikirwe ati, Unu ariga akofifye byafu atasagisye, na unu akofyifye bito:to atagerukiywe.

¹⁶ Nawe asi:mwe Nyamuanga, unu atee mu mutima gwa Tito ati akome:rega okwigana emwe.

¹⁷ Okuba ni cimari e:kirisisye cigambo ceswe, nawe e:mukire okubaja:ko okuba akarae mu kwenda kwae omwene.

¹⁸ Nicituma owa:su aamwi nage, unu kakuibwa mu Bigambo byo bwana mu kanisa jo:ne.

¹⁹ Amwi bitari ebyo era, nawe oyo asorerwe na jikanisa aribatega aamwi neswe kurwo murimu ogwo gwa ribando, nigwo gunu ecikorera eswe, korereki Ratabugenyi abonemo rikusyo, no kwenda kweswe kumenyeke.

²⁰ Eci:kenga ati, omu:nu wo:ne ataja kuciyana esoro kurwo bwafu bwe biyanwa binu ecikofya.

²¹ Ecicumacuma ebyo bwana, tari imbere ya Ratabugenyi era, nawe na imbere ya ba:nu one.

²² Aamwi nabo ecituma owa:su unu cirarorere kwiya ka:fu ati ni mukome:e muno mu misango myafu. Nawe woryanu ni mukomee muno, okuba abe:ikanyisye emwe muno muno.

²³ Mumenye ebya Tito ati, niwe asangiye nanye ka niwe omukosi we:ja:su kurwemwe. Ne bya ba:su, mumenye ati, nibo jintumwa ja jikanisa, abo niryo rikusyo rya Kristo.

²⁴ Mbe, mube:resye okumasya kwo kwenda kwemwe no kwo kwiku:ya kweswe kurwemwe. Mube:resye imbere ya jikanisa.