2 Bakorinto 7 - INDAGANO INYA:YA

¹ Mbe abendwa, okuba ciri ne mirago ejo, ciyesyega obujabi bwone obwo mubiri no bwo mwoyo, niciku:misya obweru mu ku:baya Nyamuanga.

Okwenda kwa Paulo ku Bakorinto

² Muci:gurire myoyo jemwe. Cicariga kujimya mu:nu. Cicariga kunyamura mu:nu wo:ne. Cicariga kurya ca mu:nu wo:ne.

³ Nitakwaika kutyo korereki nibatoge bakai, kwo kuba na:ikire kara ati, muri mu mitima jeswe ati cifwire aamwi nemwe, amwi cibe baanga nemwe.

⁴ Ena:ika mwimwe no buba:si bwafu, nini:ku:ya muno kurwemwe. Ni:juye okusi:ri:ka. Nisagiriye okukonderwa mu nya:ko jeswe jo:ne.

⁵ Okuba wejire cakinga mu Makedonia, emibiri jeswe jitafuŋamire, nawe nicinya:sibwa ei nei, okurwana kwariga kucisingiye, obu:ba bwarigamo munda.

⁶ Nawe Nyamuanga unu kasi:ri:sya abasurumbae, acisi:ri:sisye eswe kurwo ku:ja kwa Tito.

⁷ Amwi tari kurwo ku:ja kwae era, nawe kurwo kusi:ri:sibwa kunu asi:ri:sibwe mwimwe, ejire acibwira ebyo kukumbura kwemwe, no kurira kwemwe, no kukome:ra kwemwe kubwani, ndijei ninongesya okukonderwa.

Obusurumbae bwa Bakorinto kurwe bibi:bi

⁸ Kwo kuba nakabee nabasurumbasisye na inyaruba yani, nitakwigarura, nakabee ne:garuye, okuba nabwene ati inyaruba eyo yabasurumbasisye, nakabee kari ka:nya era.

⁹ Mbe woryanu nikondeywe. Nitakondeywe okuba mwasurumbasibwe, nawe okuba mwasurumbae ndijei nimuta. Okuba mwasurumbae rwa kutyo kwiire ku Nyamuanga, korereki musige kufwirwamo ci:nu come kubweswe.

¹⁰ Kwo kuba okusurumbara rwa kutyo Nyamuanga kenda, nikwo okure:taga okuta kunu okurena omweruro. Okuta okwo kutakwigarurwa. Nawe okusurumbara kwa mu:si okurena okufwa.

¹¹ Okuba okusurumbara rwa kutyo Nyamuanga kenda, murore rwa kutyo kwabare:tee emwe okukome:ra kwafu, ka no kwirwanirira, ka no kubiirwa, ka no bu:ba, ka no kukarara, ka no kwikome:sya, ka no kusubya orusi:ma! Mu byone mweeresisye ati, muri be:ru mu cigambo eco.

¹² Mbe nakabee nabandikiye, nitandikire kurwoyo akorere kubi:bi, nakabee kurwoyo akoreywe kubi:bi, nawe nandikire korereki okukomena kwemwe kwiswe kubu:risibwe kwimwe imbere ya Nyamuanga.

¹³ Kwocakorere nicisi:ri:ka. Na mu kusi:ri:ka kweswe nici:yongesya okukondererwa kurwo kukonderwa kwa Tito, okuba emwe bo:ne mwafuŋamisye omwoyo gwae.

¹⁴ Araba nabaku:isye ku mwene mu cigambo come, mbe nite:swarire. Nawe rwa kutyo cababwiriye byone bye cimari, nikwo kutyo ebyo cabaku:isye ku Tito one ni bya cimari.

¹⁵ No kwenda kwae kwimwe nikwiyongesya muno, wora e:cuka okworoba kwemwe, rwa kutyo mwamukumire no bu:ba no kuyarara.

¹⁶ Enikonderwa okuba mu byone enibe:ikanya cimari.