2 Bakorinto 6 - INDAGANO INYA:YA

Jintungwa ja bakosi ba Nyamuanga

¹ Mbe, eswe banu ecikorera aamwi nage, enibaremberesya ati, musige kuramira ecigongo ca Nyamuanga kutyo era.

² Okuba omwene a:ikire ati, Nakunguywe mu mwanya gunu gwikirisibwe, ka nakusakiye ku rusiku rwo mweruro. Mbe woryanu ni mwanya gunu gwikirisibwe. Mbe wori ni rusiku rwo mweruro.

³ Citakurertera mu:nu wo:ne ci:ku:juro mu musango gwone, emirimu jeswe jisige kugambwa kubi:bi.

⁴ Nawe mu byone eci:ku:ya rwa bakosi ba Nyamuanga, mu kwigumirisya okwafu, na mu kunyasibwa, na mu bukene, na mu bataka.

⁵ Mu kubumwa, mu kuboywa, mu njogere, mu kwikome:sya, mu kutengeja, mu kusara:rira,

⁶ Mu bweru, mu bwenge, mu kwigumirisya, mu cigongo, mu Mwoyo Mweru, mu kwenda kunu kutarimo burigerige,

⁷ Mu musango gwo kumasya, mu managa ga Nyamuanga, kurwe bigwato byo burengeresi ku kuboko kwe buryo no kwe bumosi,

⁸ Kurwe cibaro no kugaywa, kurwo kwaikwa kubi:bi no kwaikwa kisi, rwa banu ababebeya, ke:nu ciri ba cimari,

⁹ Rwa banu batakumenywa, ke:nu amenyekere kisi, rwa banu abafwa, ke:nu ciri baanga. Cabee rwa banu abatongerwa, ke:nu citakwitwa.

¹⁰ Cabee rwa basurumbae, nawe ecikonderwa kusiku. Cabee rwa bataka, nawe ecini:bya ba:fu. Cabee rwa banu batari na ci:nu, ke:nu ciri na byone.

Okwaukana kunu kwaragiriywe

¹¹ Eminwa jeswe ja:samisye kwimwe, Abakorinto, emitima jeswe jagariyae.

¹² Mutafundire mwiswe, nawe mwafundire mu mitima jemwe.

¹³ Nawe nemwe mugariye korereki mundiye kutyo. Enibabwira rwa ba:na bani.

¹⁴ Mutaboywaga ku ngurwema imwi aamwi na banu bateikirisisye, ?okuba oburengeresi no bwikoti ebisangira kutiki? ?Amwi obweru ne cisuite ebyungwana atiki?

¹⁵ ?Mbe Kristo na Beriari abaroma gumwi kutiki? ?Omwikirisya ari na mugabo ki aamwi na unu atakwikirisya?

¹⁶ ?Na iyekaru ya Nyamuanga ebi:yanya atiki ne biusano? Okuba emwe muri yekaru ya Nyamuanga omuanga. Rwa kutyo Nyamuanga a:ikire ati, Ndibe:karamo, nimbaribatiramo, nanye ndabaga Nyamuanga webwe, na bene barabaga bamu ba:ni.

¹⁷ Mbe nikwo kutyo muso:ke aagati yebwe, mwaukane, kutyo ka: ika Ratabugenyi, amwi mutakuniaga ku ci:nu ecijabi, nanye ndibakuma.

¹⁸ Niriba Esomwana kwimwe, nemwe murabaga bama ba:ni abamura na bayara, nikwo kutyo ka:ika Ratabugenyi Unu katura byone.