2 Bakorinto 5 - INDAGANO INYA:YA

Omubiri gwa mu rwire

¹ Okuba cimenyere ati, inyumba yeswe eya mu:si, eya riuna rinu, ikakamburwa, mbe ciri na inu yombakirwe eiso:ka ku Nyamuanga, niyo inyumba inu bakorerwe na maboko, niyo eya kajanende mu rwire.

² Okuba eca:sibwa mu nyumba inu, nicisigombera okufwafibwa inyumba yeswe inu eiso:ka mu rwire.

³ Ariba cafwafibwa citarisangwa ciri tuyu.

⁴ Okuba eswe banu ciri mwiuna rinu eca:sibwa nicisitoerwa, tari ati ecenda okufu:rwa, nawe ati cifwafibwe, korereki gunu ogufwa gumirwe no buanga.

⁵ Nawe unu acikorere kurwo musango gunu ni Nyamuanga, unu aciyae Omwoyo rwe co kugwatirisya.

⁶ Kwecikora nicikome:ra kusiku, nicimenya ati, cikaba ci:kae mu mubiri, mbe ciri kura na Ratabugenyi.

⁷ Okuba eciribata mu kwikirisya amwi tari kurwo kurora

⁸ Nawe ecikome:ra, na cinu ecenda muno ni kuso:ka mu mubiri ci:kare na Ratabugenyi.

Omurimu gwa banu bacari mu mubiri

⁹ Kwecikora nicikararira okumukondisya Omwene cikaba cicari anu amwi cikaba caso:kereo.

¹⁰ Okuba eswe bo:ne ni busibusi cibu:risibwe imbere ye citebe ca Kristo eco kutemera ecima, korereki mu:nu wo:ne ayabwe rwa binu akorere mu mubiri rwa kutyo akoraga, bikaba biri bya kisi amwi biri bibi:bi.

¹¹ Mbe okuba cimenyere amakanyo ga Ratabugenyi, kwecikora nicikongya abamu, nawe ecibu:risibwa ku Nyamuanga. Eciikanya ati ecibu:risibwa mu mitima jemwe one.

¹² Citakusuba kwiku:ya kwimwe rindi, nawe ecibayana emwe omwanya gwo kwikuisya kurweswe, korereki mubega no gwo kuindurira banu abe:kuisya ku bya inguru era, tari ku bya mu mutima.

¹³ Okuba cikaba cisarire, mbe cisarire ku Nyamuanga. Cikaba ciri no bwenge, ni kubwemwe.

¹⁴ Kwo kuba okwenda kwa Kristo okucisinyirisya, okuba cimenyere ati, oumwi afwiriye bo:ne, nikwo kutyo bo:ne bafuiye.

¹⁵ Mbe afwiriye bo:ne korereki abaanga basigega kuba baanga rindi kubwebwe abe:ne:ra, tari kubwa Unu afu:ye nasu:ka kubwebwe.

¹⁶ Kwecikora okwambira woryanu citacamumenya mu:nu wo:ne rwa kutyo ari mu mubiri. Nakabee cariga cimenyere Kristo rwa kutyo ari mu mubiri, nawe citacamumenya rindi kutyo.

¹⁷ Mbe omu:nu wo:ne akaba ari mu Kristo, ni cimogwa ciya:ya. Ebya kara byone byaoeo, rora byabee biya:ya.

¹⁸ Nawe byone ebiso:ka ku Nyamuanga, unu aca:ikanyisye no mwene kubwa Kristo, naciyana eswe omurimu gwo kwaikanya.

¹⁹ Ati Nyamuanga ariga:ri mu Kristo, na:ikanya abe Cairo no mwene, atababariye bikayo byebwe, naciyana eswe omusango gwo kwaikanya.

²⁰ Kwecikora niciba ntumwa kurwe ja Kristo. Ni uti Nyamuanga karemberesisya mwiswe. Ecibaremberesya kubwa Kristo ati, mwaikanyibwe na Nyamuanga.

²¹ Okuba unu ariga atamenyere bibi:bi amukorere kuba bibi:bi kurweswe, korereki cibe burengeresi bwa Nyamuanga mu Mwene.