2 Bakorinto 4 - INDAGANO INYA:YA

Obweru ne cisu:te

¹ Kwecikora nicirema okufwa omutima, okuba ciri no kufurubenda kunu rwa kutyo cafwiriywe cigongo.

² Nawe ciraremere ebyo bumbise ebya maswaro, amwi citakuribata mu burigerige, amwi citakwikotya musango gwa Nyamuanga. Nawe eci:kuya eswe abe:ne ku mitima ja ba:nu bo:ne imbere ya Nyamuanga, nice:resya ebye cimari.

³ Nawe Ebigambo byeswe ebyo bwana bikaba biswikiye, mbe biswikiye ku banu ababura.

⁴ Mungu wa magoro ganu aofufifye ame:so go bwenge bwebwe banu batakwikirisya, basige kwakirwa obweru bwe Bigambo byo bwana ebya rikusyo rya Kristo, niwe orususo rwa Nyamuanga.

⁵ Kwo kuba citakwiyaika eswe abe:ne:ra, nawe ni Yesu Kristo ati, niwe Ratabugenyi, neswe ciri bagaya bemwe kubwa Yesu.

⁶ Kwo kuba Nyamuanga unu a:ikire ati, Obweru buryaka mu cisuite, niwe a:ikire mu mitima jeswe, are:te obweru bwo kumenya rikusyo rya Nyamuanga rinu riri mu busu bwa Yesu Kristo.

Okufwa no buanga kutyo ebikora mu Bakristo

⁷ Nawe ciri no buni:bi bunu mu nyungu ja rimoga, korereki obwafu bwa managa bube bwa Nyamuanga, amwi butari bweswe.

⁸ Eci:iganyibwa mbara jo:ne, nawe citakurumatanyibwa. Eciwa Omwoyo nawe citakufwa mutima.

⁹ Eciirisibwa nawe citakweseranyibwa. Ece:swa a:si nawe citakusimagisibwa.

¹⁰ Eciribata kusiku ciri no kwitwa kwa Yesu mu mibiri jeswe.

¹¹ Okuba eswe abaanga eciso:sibwa okufwa kubwa Yesu kusiku, korereki obuanga bwa Yesu one bubu:risibwe mu mibiri jeswe jinu ejifwa.

¹² Nikwo kutyo okufwa okukora mwiswe, nawe obuanga obukora mwimwe.

¹³ Nawe ciri no mwoyo guriya ogwo kwikirisya, rwa kutyo byandikirwe ati, Ne:kirisisye, kwonakorere ninaika. Neswe one eci:kirisya, kwecikora nica:ika.

¹⁴ Cimenyere ati, Oyo asu:ruye Ratabugenyi, neswe one aricisu:rura aamwi na Yesu, ka aricitu:ra abweru aamwi nemwe.

¹⁵ Okuba byone birio kubwemwe, korereki ecigongo cinu eciyongesya kurwo kusima kwa ba:nu ba:fu, congesyega rikusyo rya Nyamuanga.

¹⁶ Kwecikora nicirema okufwa omutima, nawe nakabee omu:nu weswe owa inguru arawao, nawe omu:nu weswe owa munda kakorwa muya:ya kusiku:siku.

¹⁷ Okuba okunya:ka kweswe kunu kwanguire okwo mwanya omuto:to, okucikorera rikusyo ryafu muno erya kajanende.

¹⁸ Eswe citakurore:rera binu ebiboneka, okuba binu ebiboneka ni bya kasinjeke, nawe binu bitakuboneka ni bya kajanende.