2 Bakorinto 3 - INDAGANO INYA:YA

Jinyaruba jinu jandikirwe mu myoyo

¹ ?Mbe ecamba rindi okwikuya eswe abe:ne:ra? ?Tere amwi cikenere jinyaruba ja jikuma kwimwe rwa bandi, tere amwi jinu ejiso:ka kwimwe?

² Inyaruba yeswe ni:mwe, inu yandikirwe mu mitima jeswe inu imenyerwe no kusomwa na ba:nu bo:ne.

³ Nimubu:risibwa okuba inyaruba ya Kristo, inu eswe cabakoreemo, inu itandikirwe na bwino nawe yandikirwe Omwoyo wa Nyamuanga omuanga, tari ku mbau ja mabui, nawe ni ku mbau je mitima ja ba:nu.

⁴ Mbe nikwo kutyo eciikanya Nyamuanga kurwa Kristo.

Indagano inya:ya ne ya kara

⁵ Tari ati eswe abe:ne:ra ecitura okwiganirisya omusango gwone ati oguso:ka mwiswe abe:ne, nawe okutura kweswe okuso:ka ku Nyamuanga.

⁶ Niwe unu aciyae amanaga go kukorera indagano inya:ya. Citari bakosi ba nyuguta nawe abo mwoyo. Okuba inyuguta eita, nawe omwoyo ogure:ta obuanga.

⁷ Nawe okukora kwo kufwa okwa jinyuguta, kunu kwariga kukamirwe ku mabui, kukaba kwejiye mwikusyo ndijei aba:na ba Israeli bataturire kwikomeresya obusu bwa Musa kurwa rikusyo ryo busu bwae, niryo rikusyo rinu ryariga ndija okuwao,

⁸ ?Okukora kwo mwoyo kutarikira muno okuba na rikusyo?

⁹ Okuba okukora kwa intambara kukaba na rikusyo, mbe okukora kwo burengeresi okwiyongesya okusagirisya rikusyo.

¹⁰ Okuba ne:jo jariga nijikusibwa jitabee na rikusyo, kurwa rikusyo rinu rikirire eryo.

¹¹ Okuba araba cinu caoeo cariga na rikusyo, mbe cinyataso:kao ecikira muno okuba na rikusyo.

¹² Mbe okuba ciri no kwiikanya kwejabo okwo, eca:ika no buba:si bwafu,

¹³ Amwi atari rwa Musa unu e:swikiye mu busu bwae, korereki aba:na ba Israeli basige kwikomeresya obute:ro bwa cinu cariga cajo:kuwao.

¹⁴ Nawe ame:ganirisyo gebwe nigakome:ra, okuba okukinga rero eco kuswikirako ciriya cicariwo, cicaswikiye wora basoma indagano ya kara. Eco kuswikirako eciso:sibwao mu Kristo.

¹⁵ Nawe okukinga rero ebya Musa wora byasomwa, eco kuswikirako cicari ku mitima jebwe.

¹⁶ Nwae wora bacu:ka ku Ratabugenyi eco kuswikirako eciso:sibwao.

¹⁷ Nawe Ratabugenyi niwe Omwoyo oyo. Mbe anu kaba Mwoyo wa Ratabugenyi, nuwo eci:bure ciri.

¹⁸ Nawe eswe bo:ne, citaswikiye busu, ecirora rikusyo rya Ratabugenyi rwa mwirore, niciindurwa okususana no mwene, nicongesibwako rikusyo kwikusyo rwa rinu riso:kere ku Ratabugenyi, niwe Omwoyo.