2 Bakorinto 2 - INDAGANO INYA:YA

¹ Nawe cinu nakarariye mu mutima gwani ciri ati, nisige ku:ja kwimwe rindi na busurumbae.

² Okuba anye nikabasurumbasya, ?kambe niga unu kankondisya anye, tari unu anye enisurumbasya?

³ Nabandikiye eco, korereki ariba nakinga, banu be:ire okunkondisya basige kunsurumbasya. Okuba eniikanya emwe bo:ne ati, okukonderwa kwani nikwo okwemwe bo:ne.

⁴ Okuba nabandikiye mu kunya:ka kwafu na mu kurumwa omutima, nindira na masiga ma:fu. Tari ati nuwo musurumbare, nawe korereki mumenye okwenda kunu ndinakwo kwimwe kutyo kufurire muno.

Bamwiswaririre unu e:garuye

⁵ Nawe akaba omu:nu asurumbasisye, atansurumbasisye anye era, tari emwe bo:ne, amwi mutari bo:ne, nisige kubatamirisya muno.

⁶ Omu:nu we:ja:bo oyo, intambara inu ayaywe na ba:fu imwiire.

⁷ Nikwo kube:ire emwe okumwiswaririra no kumusi:ri:sya unu ari kutyo, asige kumirwa no butaka bwafu muno.

⁸ Kwenikora nimbaremberesya murumye okwenda kwemwe ku:yo.

⁹ Okuba nikwo nakorere nimbandikira, korereki nibasake nimenye araba omungwa mu misango jo:ne.

¹⁰ Okuba unu omwiswaririra, anye one enimwiswaririra. Okuba anye nikamwiswaririra omu:nu omusango gwone gwone, namwiswaririye kubwemwe imbere ya Kristo.

¹¹ Syetani asige kuciiga, okuba citari banu batamenyere burigerige bwae.

Paulo nasi:ma Nyamuanga kurwo kuiga

¹² Mbe anu nejire Tiroa kurwe Bigambo byo bwana ebya Kristo, Ratabugenyi nanyigurira orwigi one.

¹³ Nitabwene kufuŋama mu mwoyo gwani, okuba nitamusangireo mwana wa:su Ti:to. Nawe nimbaraga ningenda Makedonia.

¹⁴ Nawe Nyamuanga asi:mwe unu kacikora niciiga mu Kristo kusiku, nakora mwiswe okuswisya orurango rwo kumumenya wone wone.

¹⁵ Okuba ciri rurango rwa kisi orwa Kristo mu banu abakisibwa na mu banu ababura.

¹⁶ Ku banu ababura ciri ruunyo runu oruso:ka mu kufwa nirure:ta okufwa. Nawe ku bandi ciri ruunyo runu oruso:ka mu buanga nirure:ta obuanga. ?Ka niga unu e:ire ku bigambo binu?

¹⁷ Okuba citari rwa ba:fu, banu abakama Omusango gwa Nyamuanga nibaguco:tora. Nawe eca:ika mu Kristo imbere ya Nyamuanga, rwa ba:nu be cimari na rwa ba:nu ba Nyamuanga.