2 Bakorinto 13 - INDAGANO INYA:YA

Abanyamusi bariramurwa

¹ Runu nirwo orwa kasatu anye okuja kwimwe. Omusango gwone gwone gurume mu kanwa ka ba:iki babiri amwi basatu.

² Nambire okubabwira banu banyamuye kara, na bandi bo:ne, na ka wori nicababwira anu nitariyo, rwa kutyo nababwiriye ku rugendo rwa kabiri anu nariga nemwe ati, anye ariba naja nitaribafwira cigongo,

³ okuba omuyenja ecibarikisyo ca Kristo unu ka:ikira mwanye. Oyo atakuburwa managa kwimwe nawe ari na managa mwimwe.

⁴ Okuba nakabee abambirwe atana managa, nawe ni muanga kurwa managa ga Nyamuanga. Okuba mu mwene eswe one citana managa, nawe kwimwe ciri baanga aamwi nage kurwa managa ga Nyamuanga.

⁵ Mwisake emwe abene araba muri mu kwikirisya, mwiregeje abe:ne. ?Tere amwi mutakwimenya ati Yesu Kristo ari mwimwe, tari muremerwe?

⁶ Nawe eniikanya ati, murimenya ati eswe citaremerwe.

⁷ Enisabwa Nyamuanga ati, emwe musigega kukora bubi:bi bwone. Tari ati eswe korereki cibe rwa banu abasi:mwa, nawe emwe mukorega ebye kisi, nakabee eswe ciri rwa banu baremerwe.

⁸ Okuba ritakutura kuingirira ebye cimari, tari okusakira ebye cimari.

⁹ Okuba ecikonderwa eswe cikaba citana managa ke:nu emwe muri na managa. Na cinu ecisabwa ciri ati, emwe mukurmire.

¹⁰ Kwonakora ninandika ebyo nitariyo, korereki ariba naja nisige kubakorera bururu rwa managa ganu Ratabugenyi ananire kutyo gari ago kumbaka, tari ga kukambura.

Ebyo kuraga

¹¹ Ku bute:ro, bama ba:su, mubega kwa bwanabwana. Muku:mire, musi:ri:ke, mwiganirisyega gumwi. Mube no murembe, na Nyamuanga wo kwenda no murembe arabaga nemwe.

¹² Muke:syanyega no kunyunyana okweru.

¹³ Abe:ru bo:ne ababake:sya.

¹⁴ Ecigongo ca Ratabugenyi Yesu Kristo, no kwenda kwa Nyamuanga, no kusangira kwo Mwoyo Mweru bibega nemwe bo:ne.