2 Bakorinto 12 - INDAGANO INYA:YA

Paulo kutyo ariga asirirwe mu rwire

¹ Kunyiire okwiku:ya, nakabee kutakondere. Nawe enikinga mu biroro na mu kuswerurirwa kwa Ratabugenyi.

² Nimenyere omu:nu mu Kristo, jaturireo myaka ekumi ne:na. Amwi ariga:ri mu mubiri nitakumenya, amwi ariga atari mu mubiri, nitakumenya. Nyamuanga niwe amenyere. Omu:nu uyo agegerwe nasirwa mu rwire rwa kasatu.

³ Mbe nimenyere omu:nu uyo, amwi ariga:ri mu mubiri nitakumenya, amwi a:iga atari mu mubiri nitakumenya. Nyamuanga amenyere.

⁴ Oyo agegerwe nasirwa mu Paradiso, nongwa ebigambo binu bitakutura kwaikwa, binu biganyisye omu:nu okwaika.

⁵ Eniku:isya ku byo mu:nu oyo, nawe nitakwiku:isya ku byani omwene:ra, tari mu byo kuburwa managa kwani.

⁶ Kwo kuba nakendere okwikuya nitakabee mutamutamu, okuba naka:ikire ebye cimari. Nawe eni:remera:ra mu:nu wo:ne asige kunyiganirisya kukira kutyo kandora, amwi kutyo kongwa kwanye.

Riwa mu mubiri

⁷ Nawe okuba binu nasweruriywe byariga byafu, kwonakorere niyabwa riwa mu mubiri, niyo intumwa ya Syetani yo ku:nya:sya, nisige kwikuya nisagiriye.

⁸ Naremberesisye Ratabugenyi kwiya kasatu, ecirnu eco cinso:keko anye.

⁹ Omwene nambwira ati, Ecigongo cani cikumarire, okuba amanaga gani agakumirira mu binu bitana managa. Kwenikora nini:ku:isya mu kuburwa amanaga ninkonderwa muno, korereki amanaga ga Kristo ge:kare kwanye.

¹⁰ Kwenikora ninkondererwa mu kuburwa amanaga, na mu kujimibwa, na mu bukene, na mu kunyasibwa, na mu nya:ko, binu enibona kurwa Kristo. Okuba wora naburwa managa, niwo eniba na managa.

Ebibarikisyo byo butumwa

¹¹ Nabee mutamutamu, emwe mwansinyirisisye. Okuba nariga ni:ire okuku:ibwa nemwe. Kwo kuba nariga nitakirirwe na jintumwa je cibaro mu musango gwone, nakabee anye nitari ci:nu.

¹² Ni cimari ebibarikisyo byo butumwa byakorerwe mwimwe mu kwiguniirisya kwone, na mu bibarikisyo, na mu biruguiro, na mu bya managa.

¹³ ?Okuba emwe mwakirirwe jikanisa ejindi mu musango ki, tari anye omwene kutyo naremere okubatamirisya? Munyiswaririre ecikayo eco.

Paulo ke:resya ebyo kubaja:ko

¹⁴ Rora, ndwa kasatu woryanu nimaririye okuja kwimwe, amwi nitaribatamirisya, okuba nitakuyenja byemwe, tari:mwe. Okuba kute:ire aba:na okubi:kiraga abe:busi, nawe abebusi nibo be:ire okubi:kiraga aba:na.

¹⁵ Mbe enikonderwa okugaba no kwigaba kurwe myoyo jemwe. ?Nikasagirisya okubenda muno, omunyenda kutoito?

¹⁶ Mbe nawe bibe kutyo. Anye nitabatamirisisye. Nawe anu nariga mwengemwenge nabategere mu burigerige.

¹⁷ ?Anye nabwene muri:ro kwimwe ku mu:nu wo:ne unu nabatumiye?

¹⁸ Namukomeresisye Tito, nintuma owa:su aamwi nage. ?Mbe Tito ababweneko muri:ro gwone gwone? ?Citaribatiye mu mwoyo gumwi? ?Citaribatiye mu rugere rumwi?

Nabakabusya ebyo kubiya kwa ikanisa

¹⁹ ?Amwi omwiganirisya ati, eswe eci:bambarira imbere yemwe? Eca:ikira mu Kristo imbere ya Nyamuanga. Nawe binu byone ni byo kubombaka emwe, abendwa.

²⁰ Okuba enu:baya ati, ariba na:ja, nasiga kubasanga mutari rwa kutyo nendere, nanye one mwasiga kunsanga rwa kutyo mutakwenda. Bisige kubao amwi rwango, amwi rifuwa, amwi risungu, amwi butoŋana, amwi kubeeresya, amwi biwewe amwi cigundu, amwi njogere.

²¹ Anye ariba nasubo:ku:ja, Nyamuanga wani asiga kunkeya imbere yemwe, nanye nasiga kubasurumbarira aba:fu banu banyamuye kara, nibarema okuta obujabi bwebwe no buromesi ne bya maswaro binu bakorere.