2 Bakorinto 11 - INDAGANO INYA:YA

Omurimu no kunyaka kwa Paulo

¹ Enenda munyigumirisisye kuto:to mu bumu:mu. Mbe munyigumirisisye.

² Okuba enibafuira na rifuwa rya Nyamuanga, okuba nabatwaranyisye no murume umwi, nibare:te ku Kristo rwo muyara unu e:baririye.

³ Nawe enu:baya, ame:ganirisyo gemwe gasige kunyamurwa no kusiga obwororo no bweru bunu buri mu Kristo, rwa injoka kutyo yabebe:isye Ewa mu burigerige bwayo.

⁴ Nawe aka:ja mu:nu nasimura Yesu undi unu citasimuye eswe, amwi mukayabwa omwoyo gundi gunu mutayabirwe, amwi Ebigambo byo bwana bindi binu mute:kirisisye, mbe omukora kisi okwigumirisya.

⁵ Kwo kuba eni:ganirisya ati, jintumwa je cibaro jitankirire anye na katyari.

⁶ Nawe nakabee anye ndi unu atakumenya kwaika, nawe mu kumenya nitari kutyo. Nawe ecibu:risibwa mwimwe mu byone.

⁷ ?Tere amwi nanyamuye wejire ne:keya korereki emwe mukusibwe? Okuba nabasimuriye Ebigambo byo bwana ebya Nyamuanga nitana muye:ro.

⁸ Nasa:kuye jikanisa ejindi, niyabwa omuyero nibafurubendere emwe.

⁹ Na ao nariga niri aamwi nemwe, anu nakenere, nitatamirisisye mu:nu wo:ne, okuba aba:su banu basomere Makedonia banae binu nariga nikenere. Na mu jo:ne ne:rindire nisige kubatamirisya, ka nikwo kutyo nde:rindaga.

¹⁰ Rwe je cimari eja Kristo kutyo jiri mwanye, atario unu arinyingirira okwikuya mu ca:ro ca Akaya.

¹¹ ?Kubaki? ?Ni kwo kuba nitakubenda emwe? Nyamuanga amenyere.

¹² Nawe rwa kutyo enikora, nikwo ndakoraga korereki nibabutukisye banu abayenja omwanya, gubabure, korereki babarore rweswe mu cinu abe:ku:isyamo.

¹³ Okuba abe:ja:bo abo ni ntumwa jo rurimi, nibo abakosi bo burigerige banu abe:susanya na jintumwa ja Kristo.

¹⁴ Amwi eco citari cirugu:ro, okuba Syetani omwene one ke:susanya rwa maraika wo bweru.

¹⁵ Mbe gutari musango munene abakosi bae okwi:susanya rwa bakosi bo burengeresi. Obute:ro bwebwe buriba rwe bikorwa byebwe.

¹⁶ Ena:ika rindi ati, Omu:nu wo:ne asige kunyiganirisya ati, ndi mutamutamu, Nawe araba omunyiganirisya kutyo, mbe munkume rwo mutamutamu, korereki anye one ni:kuyeko kuto:to.

¹⁷ Cinu ena:ika, nitakwaika rwo musango gwa Ratabugenyi, nawe rwo mutamutamu, mu buba:si bunu obwo kwiku:ya.

¹⁸ Okuba ba:fu abe:ku:ya mu mubiri, anye one eni:ku:ya.

¹⁹ Emwe omwigumirisya abatamutamu mukondeywe, nakabee muri ba bwenge.

²⁰ Okuba omwigumirisisya omu:nu akabakora bagaya, amwi akabarya, amwi akabagwata ngwatwa, amwi ake:ku:ya, amwi akabasasa amai mu busu.

²¹ Ena:ika ebyo kwiswasya rwa banu batana managa. Nawe omu:nu wo:ne akaba no buba:si, anye one ndi muba:si. Ena:ika mu butamutamu.

²² ?Abe:ne ni Baeburania? Nanye one. ?Abe:ne ni Baisiraeli? Nanye one. ?Abe:ne ni rwiburo rwa Iburaimu? Nanye one.

²³ ?Abe:ne ni bakosi ba Kristo? Ena:ika rwo musasi. Anye enibakira. Mu mirimu jo kunya:ka nibakirire, mu kubumwa nisagiriye muno, mu kuboywa nibakirire, mu kufwa kwiya ka:fu.

²⁴ Nabumirwe na Bayaudi kwiya kata:nu jisanyu makumi gasatu ne:ta:nu ne:na (39).

²⁵ Nabumirwe ji:simbo kwiya kasatu. Narasirwe amabui rumwi. Na:tikiywe ingaraba kwiya kasatu, nibuca ndigwa ndi mu busiba.

²⁶ Mu gendo kwiya ka:fu, mu masika ge misima, mu masika ga basa:kusi, mu masika ganu agaso:ka mwiyanga ryasu, mu masika ganu agaso:ka mu ba:maanga, mu masika ga mu misi, mu masika ga mwibara, mu masika ga mu nyanja, mu masika ga ba:su abo rurimi.

²⁷ Mu mirimu na mu nya:ko, mu kutengeja kwiya ka:fu, na mu mweko na mu bwiro, na mu kusara:rira kwiya ka:fu, na mu mbeo no kuba tuyu.

²⁸ No kusiga ebyo ebiboneka abweru, birio binu ebinsitoera kusiku, nikwo okuweraga omwoyo jikanisa jo:ne.

²⁹ ?Niga unu kaburwa amanaga, nanye one nindema okuburwa amanaga? ?Niga unu ke:ku:jusibwa nanye one nitakubiirwa?

³⁰ Araba kunyiire okwikuya, nde:ku:isyaga mu byo kuburwa amanaga kwani.

³¹ Nyamuanga Esemwene Ratabugenyi Yesu, unu kasi:mwa kajanende ko:ne niwe amenyere ati nitakubeya.

³² Mu Damasiko omusiba wo mukama Areto ariga narinda omusi gwa Damasiko korereki angwate anye,

³³ nibantusya mu ndorero ndi mu ri:bo ku ndugu, niona mu maboko gae.