2 Bakorinto 10 - INDAGANO INYA:YA

Paulo naburwanirira obutumwa bwae

¹ Nawe anye Paulo enibaremberesya kurwo bufura no bwororo bwa Kristo, anye unu ndi mwikeya wora naba aamwi nemwe, nawe nikaba nitariyo ndi muba:si kwimwe.

² Mbe enibaremberesya ati, orwo ndibao nireme okuba no buba:si bunu eni:ganirisya okuba nabwo ku bandi banu abe:ganirisya ati eswe eciribata okuru:ba omubiri.

³ Okuba nakabee eciribatira mu mubiri, citakurwana okuru:ba omubiri.

⁴ Kwo kuba ebigwato byo buremo bweswe bitari bya mubiri, nawe ni bya managa ga Nyamuanga go kufumya obwikingo.

⁵ Ecifumya ame:ganirisyo ne bi:nu byone bya inguru binu ebi:kusya okurwana no bumenyi bwa Nyamuanga, niciinya ame:ganirisyo gome gamungwe Kristo.

⁶ Cimaririye okusubya orusima ku butongwa bwone, ariba okworoba kwemwe kwaku:mira.

⁷ Omurorerrera binu biri imbere yemwe. Omu:nu wo:ne ake:iikanya omwene ati, ni wa Kristo, mbe asube okwiganirisya omwene:ra ati, rwa kutyo omwene ni wa Kristo, neswe one nikwo kutyo ciri ba Kristo.

⁸ Okuba nakabee ndongesya okwiku:yamo kuto:to mu managa geswe, ganu Ratabugenyi aciyae korereki cibombake, tari kubakambura, nawe nitakujira swaro.

⁹ Nisige kuboneka rwa unu kabo:baisya na jinyaruba jani.

¹⁰ Okuba aba:ika ati, Jinyaruba jae ni gome:e na ja managa, nawe akaba ariwo mu mubiri, atana managa, no kwaika kwae ni kwa kutyo era.

¹¹ Unu ari kutyo, e:ganirisye ati, rwa kutyo ciri mu misango ja jinyaruba ke:nu citariyo, nikwo kutyo eciba ciri mu bikorwa, cikaba ciri:yo.

¹² Okuba citakuba:siara okwibara aamwi na banu abe:ku:ya abe:ne:ra, nakabee kuri kwiriŋanya nabo, nawe abo abe:renga abe:ne:ra, nibe:riŋanya abe:ne:ra, mbe batari na bwenge.

¹³ Mbe nawe eswe citari:ku:ya kukira indengo yeswe, nawe ni mu ndengo yo rubibi runu Nyamuanga acigabiye okuba indengo yo kukinga kwimwe.

¹⁴ Okuba citakwitabirisya kukira indengo yeswe, rwa banu citakukinga kwimwe, okuba cakingire na kwimwe mu Bigambo byo bwana ebya Kristo.

¹⁵ Citakwikuisya mu mirimu ja bandi kukira indengo, nawe eciikanya ati, okwikirisya kwemwe kukakura, no mugabo gweswe mwimwe guriyongesya okufura,

¹⁶ korereki nisimurega Ebigambo byo bwana mu byaro byenderya, nisige kwikuisya mu mirimu jo undi jinu akorere mu ca:ro cae.

¹⁷ Nawe unu ke:ku:ya, mbe e:ku:isye mu Ratabugenyi.

¹⁸ Okuba unu kasimwa, atari unu ke:ku:ya omwene:ra, nawe ni unu Ratabugenyi kaku:ya.