1 Timoteo 6 - INDAGANO INYA:YA

¹ Banu baboyerwe ingurwema yo bugaya babarega be:sebugenyi ne cibaro co:ne, korereki risi:na rya Nyamuanga risige kufumwa no kwiigisya kweswe kusige kufumwa.

² Banu bari na be:sebugenyi banu abe:kirisya, basiga kubagaya, okuba ni ba:na ba:su. Nawe akiri babakorerega okuba banu ababona amabona mu mirimu je kisi, nibo abe:kirisya na bendwa. Wiigisyega ebyo no kukomeresya.

³ Omu:nu wo:ne ake:igisya kundi, amwi akarema okwikirisya emisango jinu ji:mire, nijo eja Ratabugenyi Yesu Kristo, ne jo kwiigisya kunu kwiire oku:baya Nyamuanga.

⁴ Oyo ke:ku:ya, nawe atana cinu asombo:keywe, nawe ni murwae wa mamba no kubambasyanya kwe misango, munu oruso:ka orwiso, no kuyomba, no kufuma, no kubarikisya kubi:bi mu mutima,

⁵ no kukarasyanya kwa ba:nu baranyamukire obwenge, banu balaso:sibweko ebye cimari, nibe:ganirisya ati oku:baya Nyamuanga ni kuboneramo muri:ro.

⁶ Nawe oku:baya Nyamuanga aamwi no kwiywa ni muri:ro mwafu.

⁷ Okuba citare:tere ci:nu mu:si, amwi citakutura kuso:kamo na ci:nu.

⁸ Nawe cikaba ne biryo ne bifwaro, ebyo bicimarega.

⁹ Nawe banu abenda okuni:ba abagwa mu kusakwa na mu muye:to, na mu kurigira okwafu okwo bumu:mu na kunu okunyamura. Okurigira okwo okutubisya aba:nu mu kusimagira no kubura.

¹⁰ Okuba okwenda jimpirya niryo risina rye bibi:bi byone, jinu abandi abe:sigombera, nibayabibwa okuso:ka mu kwikirisya, nibe:soma kata no busurumbae bwafu.

¹¹ Nawe awe, omu:nu wa Nyamuanga, wiruke ebyo, mubega oburenge:resi, no bweru, no kwikirisya, no kwenda, no kwigumirisya, no bwororo.

¹² Rwanaga oburemo bwe kisi obwo kwikirisya. Ugwate obuanga bwa kajanende bunu wabirikiriywe, nutogora okutogora kwe kisi imbere ya banu bariga nibarora bari ba:fu.

¹³ Enikukomeresya imbere ya Nyamuanga unu kayana byone obuanga, na imbere ya Kristo Yesu unu a:ikire okwaika kwe kisi imbere ya Pontio Pilato, ati,

¹⁴ Ugumyega eciragiro cinu, utariko ebara amwi esoro, kukinga ku kuboneka kwa Ratabugenyi Yesu Kristo,

¹⁵ kunu aryeresya mu mwanya gwakwo, niwe owo buinga enyere:ra, unu kakuibwa, niwe Mukama wa bakama no Mukuru wa bakuru,

¹⁶ Unu ari no butafwa enyere:ra, e:kae mu bweru bunu butakufugerwako, unu atario mu:nu unu aramubwene, amwi atario unu katura okumurora. Niwe ayabwega rikusyo na managa kajanende. Amina.

¹⁷ Ukomeresyega abani:bi ba mu magoro ganu ati, basigega kwikuya, amwi kwiikanya obuni:bi bunu butari bwo kwikara, nawe be:ikanyega Nyamuanga unu kaciyanaga bi:nu byone mu bwira, korereki cibikondererwega.

¹⁸ Bakorega ebye kisi, babega bani:bi mu bikorwa byo bwana, babega bangu kugaba, no kusangira ebi:nu.

¹⁹ Nikwo kutyo abe:bi:kira orufuka rwo bwana kurwa jisiku jinu ejenda oku:ja, bakorereki bagwate obuanga bwe cimari.

²⁰ Awe Timoteo, yama cinu wabi:kisibwe, wikenge okuromaroma kwa kutyo era kunu kutakwiya mu kwikirisya. Wikenge okurwana kwo bwenge, bunu obutogwa kutyo mu rurimi.

²¹ Obwenge obwo abandi wejire babwikirisya, nibayaba mu kwikirisya. Ecigongo cibega nemwe.