1 Timoteo 5 - INDAGANO INYA:YA

Ebya ba mu kanisa

¹ Utagonyaga mukaruka, nawe wamuremberesya rwesomwana, na bamura rwa ba:na banyu,

² Abakwekuru ubaremberesye rwa banyokomwana, na bagasi abato:to rwa basubati.

³ Ubayanega ecibaro abatumba banu barabee batumba kata kata.

⁴ Nawe omutumba wo:ne akaba ari na ba:na amwi be:cukuru, batangatega okwiigira jintungwa jo kwikirisya mu nyumba jebwe, babariye abe:busi bebwe, okuba eco nico ecikondera Nyamuanga.

⁵ Nawe unu kaba mutumba kata, nasigwa enyere, niwe ke:ikanya Nyamuanga, nakome:ra okusabwa no kuremberesya mu mwisi na mu ngeta.

⁶ Nawe unu kanurirwa orumura, niwe afu:ye acari muanga.

⁷ Ubakomeresye ebyo, basigega kufumwa.

⁸ Nawe omu:nu wo:ne akarema okwama abae, no kukira akarema okwama aba mu nyumba yae, oyo okwikirisya akuremere, atakwikirisya.

⁹ Omutumba wo:ne atandikwa acari kwiya myaka makumi gata:nu na rimwi, unu atwaywe murume umwi.

¹⁰ Abe unu ka:ikwa kisi kurwe bikorwa byo bwana, araba arerere aba:na, araba akumire abagenyi, araba aro:sisye ebigere bya be:ru, araba arasakiye banu abanya:sibwa, araba e:kome:sisye mu bikorwa byone byo bwana,

¹¹ Nawe nuremega abatumba banu bacari bato:to, okuba bakatamwa ebya Kristo, abasuba okururu:ka nibenda okutwarwa.

¹² Nibajira intambara okuba be:sere okwikirisya kwebwe okwo kwamba.

¹³ Rindi abe:igira okurengaara, nibeindainda mu misi. Batakurengaara era, nawe ababa barongoji na banu abe:tu:ra mu bya bandi, niba:ika binu bite:ire.

¹⁴ Kwenikora ninenda banu bacari bato:to batwarwega, be:burega aba:na, batungega jinyumba, basige kuyana omuremo omwanya gwo kugombana.

¹⁵ Okuba abandi bario woryanu banu baindukire okuru:ba Syetani.

¹⁶ Omu:nu wo:ne unu ke:kirisya akaba na batumba, abasakirega, ikanisa isige kusitoerwa, korereki isakirega abatumba cimwi cimwi.

Ebyo kusora abakuru

¹⁷ Abakaruka banu abatunga kisi, be:ire okuyanwa ecibaro kwiya kabiri, okukira muno ni banu abakome:ra mu kusimura na mu kwiigisya.

¹⁸ Okuba binu byandikirwe ebyaika ati, Utaboyaga munwa iŋa inu eitajirira ni:ura oburo. Na rindi ati, Unu kakora omurimu e:ire omuyero gwae.

¹⁹ Omukaruka akabu:rwa, ute:kirisyaga, tari ba:iki bario babiri amwi basatu.

²⁰ Banu abanyamura, ubagonye imbere ya bo:ne, korereki abandi bo:bayega.

²¹ Enikukomeresya imbere ya Nyamuanga, na imbere ya Yesu Kristo, na imbere ya bamaraika abasorwa, ati, ukorega kutiyo, wasiga kuba na soro:re, amwi utakwitiriranya mu musango gwone.

²² Utanguirisyaga kuterako mu:nu wo:ne amaboko, amwi utasangira mu bibi:bi bya bandi. Wirinde ubega mweru.

²³ Siga kunywa manji genyere, nawe nunyweko amanji ge mijabibu mato:to kurwa inda yao, na kurwo burwae bunu ourwaraga kwiya ka:fu.

²⁴ Ebibi:bi bya ba:nu abandi ebiboneka, nibitangatira okuramurwa. Nawe ebya bandi ebibaru:ba inyuma.

²⁵ Nikwo kutyo ebikorwa bye kisi ebya bandi ebiboneka abweru, na binu bitari kutyo bitakutura kubiswa.