1 Timoteo 3 - INDAGANO INYA:YA

Ebya bafurubendi na bakaruka

¹ Gunu nigwo omusango mwiikanybwa ati, omu:nu akenda oburo:ji kenda omurimu gwo bwana.

² Mbe omuro:ji kumwiire kuba mu:nu unu atariko esoro, abega murume wa mugasi umwi, abe mwibaririsi no wo bwenge, no mwirenge:resi, omukumi wa bagenyi, unu amenyere okwiigisya,

³ atari mukorwa, atari mubumi, nawe ni mwororo, atari muyombi, atakurigira mpirya.

⁴ Abe unu atungire kisi inyumba yae, unu ana ba:na bae bamworobee mu tungwa ja kisi.

⁵ Nawe omu:nu araba atamenyere okutunga inyumba yae, ?katura kutiki okucuma ikanisa ya Nyamuanga?

⁶ Ataba unu amara kwikirisya wori wori, asiga kwiku:ya nefura nagwa mu ntambara ya Syetani.

⁷ Kumwiire one okwaikwaga kisi na be mwira, asiga kugwa mu kufumwa na mu mutego gwa Syetani.

⁸ Nikwo kutyo na bafurubendi kube:ire okuba banu be:inyire, tari ba nyaikira ebiri, banu batakunywa bwarwa bwafu, batakungwa jimpirya,

⁹ banu abagwata obumbise bwo kwikirisya mu mutima gwo bwana.

¹⁰ Mbe, abo batangate okuregejwa, niwo bakore obufurubendi batariko esoro.

¹¹ Nikwo kutyo na bagasi bebwe kube:ire, kuba banu be:inyire, banyatabeeresya, banyatakorwa, na be:ikanyibwa mu byone.

¹² Abafurubendi babega na mugasi umwi, banu batungire kisi aba:na bebwe na jinyumba jebwe abene.

¹³ Okuba banu abakora kisi emirimu jo bufurubendi, nibo ababona ecibaro, no buba:si bwafu mu kwikirisya kunu kuri mu Kristo Yesu.

¹⁴ Enikwandikira binu, nakabee eniikanya okukujako bwangu.

¹⁵ Nawe nikako:ra, enikwandikira ukorereki umenye kutyo kukwiire okukoraga mu nyumba ya Nyamuanga, niyo ikanisa ya Nyamuanga omuanga, niyo iŋingi no rufuka ebye cimari.

¹⁶ Rwa kutyo ecitogora, obumbise bwo kuramya Nyamuanga ni bukuru, ati, Oyo niwe abu:risibwe mu mubiri, Naba murenge:resi mu mwoyo, Narorwa bamaraika, Nasimurwa mu ba:maanga, Ne:kirisibwa mu ca:ro, Nagegerwa mwikusyo.