1 Timoteo 2 - INDAGANO INYA:YA

Binu babwiriywe okusabwa

¹ Mbe, kukira byone, enibakomeresya ati, mubaremberesisye bo:ne aamwi no kusabwa, no kutongerera, no kusi:ma.

² Musabirwe abakama na bakuru bo:ne, korereki cibega no buanga bucore:re no bwo murembe, mu ku:baya Nyamuanga na mu kwibaririra.

³ Eco nico ece kisi, cinu cikondere imbere ya Nyamuanga Omukisya weswe,

⁴ unu kenda ba:nu bo:ne bakisibwe no kumenya ebye cimari.

⁵ Okuba ariwo Nyamuanga umwi, no mwaikanya wa Nyamuanga na ba:nu ni umwi, niwe omu:nu Yesu Kristo,

⁶ unu e:tegereyo acungure bo:ne, orusingiro rubeo mu mwanya gwarwo.

⁷ Ena:ika ebye cimari, nitakubeya ati, Anye nateyweo nibe musimusi we bigambo ebyo na intumwa no mwiigisya wa ba:maanga mu kwikirisya no kumasya.

Ebya barume mbya bagasi mu kanisa

⁸ Kwenikora ninenda abarume basabwega wo:ne wo:ne, be:musisye amaboko ame:ru, batari ne:sungu na jimamba.

⁹ Nikwo kutyo na bagasi, be:cumega mu bifwaro binu bi:ire, aamwi na jintungwa ja kisi no kwibaririra, tari kuyasyaga nfwiri, amwi kufwara ijaabu, amwi myenda ja bugusi burambu.

¹⁰ Nawe be:cume ne bikorwa byo bwana, rwa kutyo kwiire abagasi banu abe:toga baramya ba Nyamuanga.

¹¹ Omugasi e:igirega mu bucore:re na mu kworoba kwone.

¹² Nawe nitakwikirisisya mugasi okwiigisya, amwi okutunga omurume, nawe abega mu bucore:re.

¹³ Okuba Adamu niwe atangatire okuyangwa, Ewa nasingirira.

¹⁴ Ka na Adamu tari niwe abebeibwe, nawe omugasi niwe abebeibwe, naba mu kunyamura.

¹⁵ Nawe arionyibwa kurwo kwibura aba:na, baka-kome:ra mu kwikirisya na mu kwenda na mu burenge:resi aamwi no kwibaririra.