1 Timoteo 1 - INDAGANO INYA:YA

Omurimu gwa Timoteo mu Efeso

¹ Anye Paulo, intumwa ya Kristo Yesu rwa kutyo aragiriye Nyamuanga Omukisya weswe na Yesu Kristo, niwe okwiikanya kweswe,

² Ku Timoteo, omwana wani kata mu kwikirisya. Ecigongo no bwira no murembe bibega kwawe, binu ebiso:ka ku Rata Nyamuanga, na ku Ratabugenyi Yesu Kristo.

³ Ubega mu Efeso, rwa kutyo nakubwiriye anu nariga ningenda Makedonia, korereki ukomeresyega abandi basigega kwiigisya binu bita:syanyisye ne byeswe.

⁴ Amwi basigega kungwa sumo ne bitabo byo kwiburwa binu bitana bute:ro. Ebyo ebire:ta jimamba, nawe bitakusakira kumbaka kwa Nyamuanga kunu kuri mu kwikirisya.

⁵ Nawe obute:to bwe ciragiro nikwo okwenda kunu okuso:ka mu mutima omweru, na mu nwoyo gwe kisi, na mu kwikirisya kunu kutarimo burigerige,

⁶ Abandi bata:sisye mwibyo, nibacu:kira ebisimuro bya kutyo era.

⁷ Nibenda okuba be:igisya be biragiro, ke:nu batakumenya binu abasimura, nakabee biri binu ababambara.

Omurimu gwe biragiro

⁸ Nawe cimenyere ati, ebiragiro ni bya kisi, omu:nu akabikorera rwa kutyo byaragiriywe.

⁹ Cimenyere ati, ebiragiro bitatereyweo barenge:resi, nawe banu batari barenge:resi na be:koti, banu bataku:baya Nyamuanga na be bibi:bi, banu bate:rere na banu abarema Nyamuanga, banu abe:ta be:semwene na banyiramwene, na be:ti ba ba:nu,

¹⁰ na baromesi, na banu abaro:sya abarume be:ja:bo, na banu abe:ba ba:nu, na bo rurimi, na banu abaraira kutyo era, ne bindi byone binu bita:syanyisye no kwiigisya kunu kwimire,

¹¹ rwe Bigambo byo bwana ebya rikusyo rya Nyamuanga omukuibwa, binu ankomeresisye.

Paulo nasi:ma ecigongo ca Nyamuanga

¹² Enisi:ma unu anae amanaga, niwe Yesu Kristo Ratabugenyi, okuba anyiganirisisye ati ndi mwiikanyibwa nantu:rao ku murimu gwae.

¹³ Nariga mufumi kara, no munya:sya, no wa imangire, nawe nafwiriywe ecigongo, okuba nakoraga mu butamenya na mu bute:kirisya.

¹⁴ Nawe ecigongo ca Ratabugenyi niciongesya okufura aamwi no kwikirisya no kwenda, binu biri mu Kristo Yesu.

¹⁵ Gunu nigwo omusango omwiikanyibwa na ka gunu gwiire okwikirisibwa na ba:nu bo:ne ati, Kristo Yesu ejire mu ca:ro korereki aonye abe bibi:bi, mwabo anye nibakirire.

¹⁶ Kwakorere Yesu Kristo nanfwira ecigongo, korereki e:resye okwigumirisya kwae kuku:miye. E:resye mwanye owo kwamba, nibega eco kurorerako ku banu abajo:kwikirisya kukinga mu buanga bwa kajanende.

¹⁷ Mbe, Omukama wa kajanende, Unu atakubora, ka Unu atakuboneka, niwe Nyamuanga umwi enyere, niwe ayabwega cibaro na rikusyo kajanende na kajanende.

¹⁸ Awe mwana wani Timoteo, enikukomeresya eciragiro rinu, rwo buragi bunu bwatangatire okubao, korereki urwanirega oburemo bwe kisi kurwebyo,

¹⁹ Urumyega okwikirisya no mutima gwe kisi, abandi wejire baku:rira ebyo kura, niba:tikirwa obwato mu kwikirisya.

²⁰ Mwabo niwe Humenayo na Alekisanda, banu nayae Syetani, korereki be:igisibwe basigega kufuma.