1 Petero 5 - INDAGANO INYA:YA

Omurimu gwa bakaruka ba ikanisa

¹ Mbe enibabwira abakaruka ba ikanisa banu bari mwimwe, okuba anye ndi mukaruka we:ja:nyu, na unu narorere jinya:ko ja Kristo, na ka nisangiye rikusyo rinu eryenda okuswerurwa.

² Mure:bega nijo rya Nyamuanga rinu riri mwimwe, nimuriro:jaro:ja, tari kurwo kusinyirisibwa, nawe mu kwenda, rwa kutyo Nyamuanga kenda, amwi tari kurwo kurigira amabona go burigerige, nawe no mutima gunu gumaririye.

³ Mutatungira managa obutunge bwemwe, nawe mubega co kurorerwako kwiijo.

⁴ Mbe Omure:fi omukuru ariba aswerurwa, muriyabwa orutenga rwa rikusyo runu rutakuotoka.

Obwororo

⁵ Nyaburiko, nemwe abato:to mworoberega abakaruka. Mbe emwe bo:ne mwiboega obwororo, nimukorerana emwe abene:ra. Okuba Nyamuanga kayajana na be cigundu, nawe abo:roro kabayana ecigongo.

⁶ Mbe mwikeyega emwaro yo kuboko kwa managa kwa Nyamuanga, korereki abakusye mu mwanya gunu gwiire.

⁷ Okuwa omwoyo kwemwe kwone mumutwikega Omwene, okuba Omwene kabe:gana emwe.

Syetani asusene ntare

⁸ Mutengeje, okuba omuremo wemwe Syetani ke:indainda rwa intare inu eibu:ta ni:yenja unu irarya.

⁹ Oyo mumuingirire murumire mu kwikirisya kwemwe, okuba mumenyere ati jinya:ko ejo ejo jiswirire aba:na banyu banu bari mu ca:ro co:ne.

¹⁰ Mbe ariba mwamara okunya:sibwako mwanya muto:to, Nyamuanga aribaku:misya, nabarumya, nabayana managa. Niwe Nyamuanga we cigongo co:ne, unu ababirikiye mu Kristo korereki mwingire mwikusyo ryae rya kajanende.

¹¹ Oyo ayabwega obuinga kajanende na kajanende. Amina.

¹² Nabandikira inyaruba ye misango mito:to mu maboko ga Silwano owa:su omwikanyibwa rwa kutyo eni:ganirisya, nimbatongera, nimbabwira ati eco nico ecigongo ce cimari eca Nyamuanga. Mwimereguru murumire mu cigongo eco.

¹³ Omugasi unu ari Babuloni, omusorwa we:ja:nyu kabake:sya. Omwana wani Mariko one kabake:sya.

¹⁴ Muke:syanye no kunyunyana kwo kwenda. Omurembe gubega nemwe bo:ne banu bari mu Kristo.