1 Petero 4 - INDAGANO INYA:YA

Nabakome:sya mu bikorwa byo bwana

¹ Okuba Kristo anya:si:bwe mu mubiri kurwemwe, mbe nemwe one mufwarega okwiganirisya okwo rwe bigwato. Okuba unu anya:si:bwe mu mubiri asigire ebibi:bi.

² Mukore kutyo korereki mumare ji:siku jemwe mu mubiri jinu jicasigaeo, tari rwa kutyo aba:nu abarigira, nawe rwa kutyo Nyamuanga kenda.

³ Okuba ji:siku jinu jiraturire nijo jabe:ire okukora rwa kutyo aba:maanga abenda, no kuribatiraga mu buromesi, na mu namba, na mu kukorwa, na mu kuyerwa, na mu kunywanywa, no kuramya ebisusano ebibi:bi.

⁴ Mu bigambo ebyo abarugu:ra okuba emwe mutakubirima amwi nabo mu rumura runu rutana ndengo, nibabafuma.

⁵ Abo bariroma eci:na ku Unu amariri:ye okutemera eci:na abaanga na bafu:ye.

⁶ Okuba kwobakorere abafu:ye one nibabwirwa Ebigambo byo bwana, korereki batemerwe eci:na rwa ba:nu ba mu mubiri, nawe babe baanga mu mwoyo rwa Nyamuanga.

⁷ Nawe obute:ro bwa byone buri yei. Mbe mwibaririrega nimutengeja mu kusabwa.

⁸ Okukira jo:ne mukome:rega okwendana, okuba okwenda nikwo okuswikira ebibi:bi byafu.

⁹ Mukumanega, kwitoŋanira uri.

¹⁰ Rwa kutyo buri mu:nu agabiywe eciyanwa, mufurubenderane emwe abene:ra, rwa babiki be kisi abe cigongo ca Nyamuanga ecindi ne cindi.

¹¹ Omu:nu wo:ne akasimura, a:ikega rwo kwaika kwa Nyamuanga. Omu:nu wo:ne akafurubenda, afurubende rwa managa ga Nyamuanga ganu amuyae. Nyamuanga akusibwega mu jo:ne kubwa Yesu Kristo, unu ari na rikusyo kajanende na kajanende. Amina.

Ebyo kubasi:ri:sya mu nya:ko

¹² Abendwa, mutarugu:raga okusakwa kunu kuri mwimwe, kunu okubasaka rwo muriro, uti mwarora ci:nu cigenyi.

¹³ Nawe mukonderwega okuba musangiye mu kunya:sibwa kwa Kristo, korereki mukonderwe no kusandabira mu kusweruka kwa rikusyo ryae.

¹⁴ Mukafumwa kurwa risi:na rya Kristo, muri na ribando, okuba Omwoyo wa rikusyo na wa Nyamuanga e:kae kwimwe.

¹⁵ Nawe omu:nu wo:ne kwimwe atanya:sibwa okuba ni mwiti, amwi mwifi, amwi mukosi wa bibi:bi, amwi unu ke:tu:ra mu ja bandi.

¹⁶ Nawe omu:nu wo:ne akanya:sibwa okuba ni Mukristo, asigega kwiswara, nawe akusyega Nyamuanga kurwa risi:na eryo.

¹⁷ Okuba omwanya gweire okuramura okwambira mu nyumba ya Nyamuanga. Mbe araba kukambira kwiswe, ?obute:ro bwa banu batakworobera Ebigambo byo bwana bya Nyamuanga buriba kutiki?

¹⁸ Araba ni kukome:e omurenge:resi okuona, ?mbe abarangirangi na banyamusi bariboneka a:ki?

¹⁹ Mbe na banu abanya:sibwa rwa kutyo Nyamuanga kenda, mbakorega ebyo bwana nibabi:kira Omumogi Omwiikanyibwa emyoyo jebwe.