1 Petero 3 - INDAGANO INYA:YA

Jinu ji:ire omurume no mugasi

¹ Nyaburiko, emwe abagasi, mworoberega abarume bemwe, korereki bakaba bario abarume banu bate:kirisisye omusango gwa Nyamuanga, abo baindurwe na jintungwa ja bagasi bebwe, nakabee batonguywe omusango,

² Okuba abarora jintungwa jemwe ejo bwana ne jo ku:baya.

³ Obure:re bwemwe butabaga bwa inguru era, obwo kusyonga ji:fwiri amwi kunanika jijaabu, amwi kufwara ebifwaro,

⁴ nawe bube bwo mu:nu unu abisirwe mu mutima, mwicume ne ci:nu rinu citakunyamuka, nigwo omwoyo mwororo no mucore:re, okuba ni gwa bugusi burambu imbere ya Nyamuanga.

⁵ Okuba nikwo kutyo kara one abagasi abe:ru banu be:ikanyaga Nyamuanga kutyo be:cumaga, nibo:robera abarume bebwe.

⁶ Rwa Sara kutyo o:roberaga Iburaimu, namutoga Ratabugenyi. Nemwe muri ba:na bae, mukaba nimukora ebyo bwana, nimurema okukangwa na bu:ba bwone.

⁷ Nemwe abarume, nyaburiko mubega na bagasi bemwe no bwenge, nimuyana omugasi ecibaro, rwe ci:nu citakome:e, okuba one ni baribomwandu be:janyu abe ciyanwa co buanga, korereki okusabwa kwemwe kusige okuingirirwa.

Jintungwa ejindi eja be:kirisya

⁸ Ebya ku bute:to, mubega bo:ne no kwiganirisya kumwi, mufwirane ecigongo, mwendane rwa ba inda eimwi, mubega bafura na bo:roro.

⁹ Mutasubisyanya cibi:bi ne ce:ja:bo, amwi cifumo ne ce:ja:bo, nawe mube banu abasabirwa ribando. Okuba eco nico mwabirikiririywe, korereki murye omwandu gwa ribando.

¹⁰ Okuba, Unu kenda obuanga, amwi kenda okubona ji:siku jo bwana, Aingirirega orurimi rwae mu bubi:bi, no munwa gwae gusige kwaika burigerige.

¹¹ Aso:ke mu bubi:bi, akorega ebye kisi. Ayenjega omurembe, aguru:bega.

¹² Okuba ame:so ga Ratabugenyi agarora abarenge:resi. Na matwi gae agategeresya okusabwa kwebwe. Nawe obusu bwa Ratabugenyi busisinyariye banu abakora obubi:bi.

¹³ Mukakome:ra okukora ebye kisi, ?mbe niga unu arabakoraga kubi:bi?

¹⁴ Nawe mukanya:sibwa kurwo burenge:resi, mu na ribando. Muto:bayaga kukanga kwebwe, amwi mutawaga mwoyo.

¹⁵ Nawe mu mitima jemwe mubarega Kristo ati, ni Ratabugenyi. Mubega mumaririye kusiku okuindura mu:nu wo:ne unu kababu:sya ebyo kwiikanya kunu kuri mwimwe, nawe mwaike mu bufura no bu:ba.

¹⁶ Mubega no mutima gwo bwana, korereki banu ababa:ikako kubi:bi be:swa-rega, nibo banu abafuma jintungwa jo bwana jinu munajo mu Kristo.

¹⁷ Okuba Nyamuanga akenda, ni kwa kisi emwe okunya:sibwa nimukora ebye kisi, kukira okunya:sibwa nimukora kubibi.

¹⁸ Okuba na Kristo one anya:sibwe rumwi era kurwe bibi:bi. Omurenge:resi nanya:sibwa kubwa banu batari barenge:resi, korereki acire:te ku Nyamuanga. E:tirwe mu mubiri, nawe nakorwa muanga mu mwoyo.

¹⁹ Mu mwoyo ogwo agendeemo nasimurira emyoyo jinu jiboyerwe mwiboyero,

²⁰ banu baremere okungwa kara, anu okwigumirisya kwa Nyamuanga kwariga nikurindirira mu siku ja Nuu, anu ingaraba yariga icakonjwa, munu aba:nu baonyibwe mu manji, batari ba:fu nawe ni ba:nu bata:nu na basatu era.

²¹ Nemwe one woryanu omuonyibwa mu cijekekanyo ce:ja:bo eco, nikwo okubatijibwa, tari kuso:syao riko ku mubiri, nawe ni kusabwa omutima gwe kisi ku Nyamuanga, kurwo kusu:ka kwa Yesu Kristo.

²² Niwe agendere mu rwire, ari ku kuboko kwe buryo okwa Nyamuanga, bamaraika na batungi na ba managa nibai:nywa emwaro yae.