1 Petero 2 - INDAGANO INYA:YA

Kristo ni:bui

¹ Mbe mutega kura orwango rwone no burigerige bwone, no rurimi, na rifuwa, no kwaika kubi:bi kwone.

² Mube rwa ba:na baja:re banu abamara okwiburwa, nimurigira amata go mwoyo ganu gatarimo burigerige, korereki gabakusye okukinga ku mweruro.

³ Araba mwarabire nimurora ati, Ratabugenyi ni wo bufura.

⁴ Mwejire ku:yo, niwe ribui rianga, rinu aba:nu baremere nawe Nyamuanga niwe arisorere, eryo bugusi burambu.

⁵ Mbe, emwe one omumbakwa rwa mabui amaanga mube nyumba yo mwoyo, na ka mube bagabisi abe:ru banu abaso:sya ebyogo byo mwoyo, binu ebikondera Nyamuanga kubwa Yesu Kristo.

⁶ Okuba binu byandikirwe biriwo binu ebyaika ati, Rora, enitu:ra mu Sayuni ebui ekuru erya ku sonde, rinu risorerwe ne ryo bugusi burambu. Mbe unu mwamwikirisya atariswasibwa na katyari.

⁷ Mbe kwimwe banu mwekirisisye oyo ni wa bugusi burambu. Nawe ku banu batakwikirisya abee Ribui rinu abombasi baremere, Niryo ryabee ribui rinene rya ku sonde.

⁸ Na rindi ati, Ribui rinu eri:ku:jurwako no rutare runu orugwisya. Abe:ku:juraga ku musango, okuba batagunguywe, rwa kutyo batereyweo.

Kutyo cabee mu Kristo

⁹ Nawe emwe muri rwiburo rusorwa, muri bagabisi be cikama, abo ruganda rweru, ka muri ba:nu bo butunge, korereki mukumusyega ebyo bwana bya Unu ababirikiye okuso:ka mu cisu:te mwingire mu bweru bwae obwo kurugu:ra.

¹⁰ Emwe kara mwariga mutari ba:nu, nawe woryanu muri ba:nu ba Nyamuanga. Mwariga mutakufwirwa cigongo, nawe woryanu mwafwiriywe ecigongo.

Jintungwa ja be:kirisya

¹¹ Abendwa, enibaremberesya rwa baitiŋani na baribasi, ati, mwiŋange okurigira kwo mubiri kunu okurwana no mwoyo.

¹² Mube na jintungwa jemwe je kisi mu ba:maanga, korereki nakabee ababa:ikako rwa bakosi be bibi:bi, nawe bakusye Nyamuanga mu rusiku rwo kurorwa, okuba barorere ebikorwa byemwe ebyo bwana.

¹³ Mworoberega ciragiro co:ne eca ba:nu kubwa Ratabugenyi. Nakabee ari mukama, mumworobere okuba ni mukuru.

¹⁴ Nakabee bari basi:ba, mubo:robere rwa banu batumirwe korereki batongerega banu abakora kubi:bi, no kusi:ma banu abakora kisi.

¹⁵ Okuba nikwo kutyo Nyamuanga kenda ati, mukore kisi korereki mujibisyega obumu:mu bwa ba:nu banu batana bwenge.

¹⁶ Mube rwa be:bure, nawe ci:bure cemwe cisige kuba co kubisa obubi:bi, nawe mube rwa bagaya ba Nyamuanga.

¹⁷ Mubarega ba:nu bo:ne. Mwendega aba:su. Mu:bayega Nyamuanga. Mubarega omukama.

Ebyo kwigumirisya

¹⁸ Emwe abagaya, mworoberega be:sobugenyi mu bu:ba bwone, tari ba kisi era na bo:roro, nawe na baruru one.

¹⁹ Okuba cinu nico ecisi:mwa, omu:nu unu kanya:sibwa kutyo era, ake:gumirisya okwasibwa okuba ke:cuka Nyamuanga.

²⁰ Okuba mukakora kubi:bi nimubumwa amai, mukaba nimwigumirisya, ?Omuba na kusi:mwa ki? Nawe mukakora ebye kisi no kunya:sibwa, mukaba nimwigumirisya, mbe eco nico ecisi:mwa na Nyamuanga.

Okunya:sibwa kwa Kristo ni co kurorerako

²¹ Okuba ebyo nibyo mwabirikiririywe. Okuba Kristo one anya:si:bwe kurwemwe, nabasigira eco kurorerako, korereki muru:be orugere rwae.

²² Ariga atakorere bibi:bi, nakabee burigerige butabonekere mu kanwa kae.

²³ Wejire bamufuma, atasubaga kufuma. Wejire anya:sibwa atakangire, nawe e:teeo ku Unu katema eci:na mu burenge:resi.

²⁴ Niwe agegere ebibi:bi byeswe kwiti mu mubiri gwae omwene, eswe banu cafu:ye ku bibi:bi korereki cibega baanga ku burenge:resi. Mwaonyibwe kurwa mauta gae.

²⁵ Okuba mwariga muri rwa jina:ma jinu jiburire, nawe woryanu mwasubire ku Mure:fi no Muro:ji we myoyo jemwe.