1 Petero 1 - INDAGANO INYA:YA

¹ Anye Petero, unu ndi ntumwa ya Yesu Kristo, enibandikira emwe abasorwa banu Munyarambukire no kwikara mu:si inu itari yemwe, mu Ponto na Mu Galatia na Kapadokia, na mu Asia, na mu Bitunia.

² Banu mwasorerwe rwa kutyo Nyamuanga Rata ambire okubamenya kara, nimwesibwa no Mwoyo, korereki mumworobere Yesu Kristo no kumijirwako amanyinga gae. Ecigongo no murembe biyongesye kwimwe.

Okwiikanya kweswe

³ Asi:mwe Nyamuanga Esemwene Ratabugenyi Yesu Kristo, unu aci:buye orwa kabiri kurwe cigongo cae ca:fu, korereki cibega no kwiikanya kunu kutakuwao, okuba Yesu Kristo asu:kire mu bafu:ye,

⁴ korereki cirye omwandu gunu gutakubora, na gunu gutana bujabi, gunu gutakuotoka, nigwo gunu mubi:kiywe mu rwire,

⁵ emwe banu omurindwaga no buinga bwa Nyamuanga kurwo kwikirisya, korereki mubone omweruro gunu gumaririye okuswerurwa mu siku ja ku bute:ro.

Okwikirisya okuku:mira mu kunya:sibwa

⁶ Omweruro ogwo nigwo omusandabira, nakabee kube:ire okusurumbasibwa okusakwa kwafu mwanya mutyari ogwa woryanu.

⁷ Korereki okusakwa kwo kwikirisya kwemwe kuboneke kuri no kusi:ma, na rikusyo ne cibaro mu kusweruka kwa Yesu Kristo. Okusakwa kwo kwikirisya ni kwa kisi okukira okwa ijaabu inu eiwao nakabee eisakwa mu muriro.

⁸ Yesu Kristo niwe unu omwenda nakabee mucari kumurora. Niwe unu nakabee mutakumurora woryanu, ke:nu omumwikirisya, nimusandaba kusandaba kunu kutakwaikwa, na kunu kwijuye rikusyo,

⁹ nimuyabwa cinu cakorere nimwikirisya, nigwo omweruro gwe myoyo jemwe.

Abaragi bariga nibenda okusombo:kerwa

¹⁰ Abaragi banu baragaga ebye cigongo cinu cendaga oku:ja kwimwe, nibo bayenjaga muno no kutatirisya ebyo mweruro gunu,

¹¹ Nibayenja okumenya amagoro kutyo gari amwi kutyo agasusana, ago ge:resibwe no Mwoyo wa Kristo unu atangatire okwaika ebyo kunya:sibwa kwa Kristo na rikusyo rinu erisingirira.

¹² Bariga basweruriywe ati, bata:ikire misango ejo kubwebwe abene, nawe ni kurwemwe. Nijo emisango jinu mwabwiriywe wori na banu bababwiriye Ebigambo byo bwana kurwo Mwoyo Mweru unu atumirwe okuso:ka mu rwire. Ne:jo bamaraika one abenda okusunguriramo no kurora.

Abe:kirisya babega be:ru

¹³ Mbe mwiboega ebibunu byo bwenge bwemwe, mwikenge, nimwiikanya kata ecigongo cinu murire:terwa orwo Yesu Kristo arisweruka.

¹⁴ Mube rwa ba:na abo:roro, musige kwisusanya rwo kurigira kwemwe kwa kara okwa mu butamenya bwemwe.

¹⁵ Nawe mubega be:ru mu ntungwa jo:ne rwa kutyo Oyo ababirikiye ni mweru.

¹⁶ Okuba byandikirwe ati, Mubega be:ru, okuba anye ndi mweru.

Cacunguywe no bugusi bunene

¹⁷ Mbe Unu karamura rwe bikorwa bya ba:nu kutyo biri, kwitiriranya uri, mbe mukamutoga oyo Rata, muribatega no bu:ba mu siku jemwe ejo kuitiŋana mu:si.

¹⁸ Mumenyere ati, okucungurwa kwemwe mu ntungwa jemwe eja kutyo era, jinu mwayabirwe basaja wanyu, mbe mutacunguriywe na bi:nu binu ebiwao, rwa jimpirya amwi jaabu,

¹⁹ Nawe mwacunguriywe na manyinga go bugusi oburambu aga Kristo, rwa go mwana wa ina:ma unu atariko esoro nakabee riri:komo.

²⁰ Unu ariga amenyerwe kara, i:si icari kutu:rwako rufuka, nawe nabu:risibwa kurwemwe ku bute:ro bwa ji:siku.

²¹ Kubwae emwe mwekirisisye Nyamuanga unu amusu:ruye mu bafu:ye namuyana rikusyo, korereki okwikirisya kwemwe no kwiikanya kwemwe bibe ku Nyamuanga.

Emisango ja Nyamuanga jitariwao

²² Mwamarire okwiyesya emyoyo jemwe mu kworobera ebye cimari, nimukinga mu kwendana na ba:na ba:su kunu kutarimo burigerige. Mukome:rega okwendana mu mutima gwerere.

²³ Okuba mwebuywe orwa kabiri, tari na mbibo inu eibora, nawe ni inu itakubora, kurwo musango gwa Nyamuanga gunu guri muanga, gunu guri:kara kajanende.

²⁴ Okuba, Abo mubiri bo:ne bari rwo bunya:si, Na rikusyo ryebwe uti bwaso bwa manya:si. Obunya:si obuotoka, no bwaso nibuunguruka

²⁵ Nawe omusango gwa Ratabugenyi guri:kara kajanende na kajanende. Nigwo Omusango gwo bwana gunu mwasimuriywe.