1 Batesalonika 4 - INDAGANO INYA:YA

Baribate mu bweru na mu kwenda

¹ Ebya ku bute:ro, ba:na ba:su, ecibaremberesya no kubabwira mu Ratabugenyi Yesu, ati, mwiyongesyega muno okuribata rwa kutyo mwayabirwe kwiswe rwa kutyo kube:ire okuribataga no kukondisya Nyamuanga, ka na rwa kutyo omuribata.

² Okuba mumenyere ebiragiro binu cabaragiriye kubwa Ratabugenyi Yesu.

³ Okuba Nyamuanga kenda cinu ati, mwiŋaŋe oburomesi, nikwo okwesibwa kwemwe.

⁴ Omu:nu wo:ne kwimwe amenye okukinga omubiri gwae omwene mu bweru na mu cibaro,

⁵ tari mu muru:ru gwo kurigira, rwa ba:maanga banu batamenyere Nyamuanga.

⁶ Omu:nu wo:ne asige kumuri:ririra owabo nakabee, kumukaya mu cigambo cinu, okuba Ratabugenyi kabisubisya orusi:ma ebyo byone, rwa kutyo cambire okubabwira no kubakomeresya.

⁷ Okuba Nyamuanga atacibirikiriye bujabi nawe ce:sibwe.

⁸ Mbe, unu karema, atakurema mu:nu nawe karema Nyamuanga unu kabayana emwe Mwoyo Mweru wae.

⁹ Nawe mutakenere nibandikire ebyo kwendana, okuba emwe abene mweigisibwe na Nyamuanga okwendana,

¹⁰ Okuba nikwo kutyo omukora ku ba:su bo:ne abende Makedonia yo:ne. Nawe ecibaremberesya, ba:na ba:su, mwiyongesyega okufufya.

¹¹ Mukome:re okucore:ra, no kukora emirimu jemwe, nimukora na maboko rwa kutyo nabaragiriye,

¹² korereki muribatega mu ntungwa je kisi ku be mwira, mu:nu wo:ne asige kukena.

Okusuba kwa Yesu

¹³ Nawe ba:na ba:su, citakwenda mureme okusombo:kerwa ebya banu baongee musige kusurumbara rwa bandi banu batana kwiikanya.

¹⁴ Okuba cike:kirisya ati, Yesu afu:ye nasu:ka, nikwo kutyo na banu baongee mu Yesu one Nyamuanga aribare:ta aamwi nage.

¹⁵ Okuba ecibabwira kurwo musango gwa Ratabugenyi ati, eswe abaanga banu cirisigarao kukinga oku:ja kwa Ratabugenyi, citaritangatira banu baraongee.

¹⁶ Okuba Ratabugenyi omwene ari:ka okuso:ka mu rwire, no kuragirisya no buraka bwa maraika omukuru, na iŋombi ya Nyamuanga, na banu bafwiriye mu Kristo nibo baritangata okusu:ka.

¹⁷ Neswe abaanga banu cirisigarao mbe niwo cirigegerwa aamwi nabo mu me:re, cimuramire Ratabugenyi mu rutumba. Nikwo kutyo ciriba na Ratabugenyi kajanende.

¹⁸ Mbe, musi:ri:syanyega ne misango jinu.