1 Bakorinto 9 - INDAGANO INYA:YA

Omukosi e:ire omuye:ro gwae

¹ ?Anye nitari mwibure? ?Anye nitari ntumwa? ?Nitarorere Yesu Kristo Ratabugenyi? ?Ka emwe mutari murimu gwani mu Ratabugenyi?

² Araba nitari ntumwa kubandi, nawe ndi ntumwa kwimwe, okuba nemwe ecibarikisyo co butumwa bwani mu Ratabugenyi.

³ Nikwo kutyo eni:bagira binu ku banu abambu:siri-sya.

⁴ ?Eswe citakwikirisibwa okurya no kunywa?

⁵ ?Eswe citakwikirisibwa okutwara omugasi unu ari muiri no kuribata nage, rwa jintumwa ejindi, na bamura ba:bo Ratabugenyi, na Kefa kutyo abakora?

⁶ ?Tere amwi anye nanye era na Barinaba citakutura kurema okukora emirimu?

⁷ ?Ni musirikare ki unu kaja ku buremo ne:riira omwene? ?Niga unu kayamba risambu rye mijabibu, naremo:kurya matwasyo gendemo? ?Amwi niga unu kare:ba riijo, naremo:kunywa amata gendemo?

⁸ ?Ebyo na:ika ni bya ba:nu? ?Tere amwi ne biragiro bitakwaika kutyo?

⁹ Okuba byandikirwe mu biragiro bya Musa ari, Utaboyaga omunwa gwa iŋa inu eitajirira oburo ni:ura. ?Mbe Nyamuanga ke:gana ebya jiŋa era, Tere amwi ka:ika kubweswe kata kata?

¹⁰ Byandikirwe kubweswe, korereki unu karima, arime no kwiikanya, na unu kaura oburo, kumwiire okwiikanya okurya binu kanya:kirira.

¹¹ Araba eswe cababibiremo ebyo mwoyo, ?mbe, ni musango munene eswe cikagesa ebyemwe ebyo mubiri?

¹² Araba abandi bari na managa ago kwimwe, ?eswe citabakirire abo? Nawe citakoree amanaga ago. Nawe eci:gumirisya byone korereki Citaja kutao cinu eciingirira Ebigambo byo bwana ebya Kristo.

¹³ ?Mutakumenya ati, banu abafurubendera ebyeru bya mu yekaru, nibo abarya ebya mu yekaru, na banu abakorera ecigabiro, bari no mugabo ku bya ku cigabiro.

¹⁴ Nikwo kutyo Ratabugenyi aragiriye ati, banu abasimura Ebigambo byo bwana bari:sibwega ku binu ebiso:ka mu Bigambo byo bwana.

Jintungwa ja Paulo kubwe Bigambo byo bwana

¹⁵ Nawe anye nitakoraga ebyo na katyari, amwi nitandikire ebyo korereki nikorerwe kutyo uri. Okuba akiri anye nifwe, okukira omu:nu wo:ne akore okwikuya kwani kuba kutyo era.

¹⁶ Okuba norwo kutyo enisimura Ebigambo byo bwana, nitari na ca kwikuisya, okuba enisinyirisibwa, okuba jirimbona nikarema okusimura Ebigambo byo bwana.

¹⁷ Okuba nikakora kutiyo no kwenda, enibona omuye:ro. Nawe nikaba nitakukora no kwenda, mbe nasigiywe omurimu gwo kukora era.

¹⁸ ?Mbe ndi na muye:ro ki? Ni ati, era ninsimura Ebigambo byo bwana, nisimure kutyo era nitana muye:ro, nitaja kukorera ebyo ne:kirisi:bwe mu Bigambo byo bwana.

¹⁹ Kwo kuba nakabee nitari mugaya wa mu:nu wo:ne ne:korere mugaya wa bo:ne nikorereki nibonega ba:fu.

²⁰ Na ku Bayaudi nabee Muyaudi, nikorereki nibabone Abayaudi. Na ku banu batungirwe ebiragiro, nabee rwa unu atungirwe biragiro, nikorereki nibone banu batungirwe ebiragiro.

²¹ Ku banu batari na biragiro, nabee rwa unu atana biragiro, nikorereki nibone banu batana biragiro. Tari ati nitana biragiro ku Nyamuanga, nawe niri mu biragiro bya Kristo.

²² Ku barenga nabee murenga, korereki nibone abarenga. Nabee wa ntungwa jo:ne ku ba:nu bo:ne, nibaonyega ba:fu mu njira jo:ne.

²³ Ka enikora ebyo byone kurwe Bigambo byo bwana, korereki nisangirega aamwi na bandi mwibyo.

²⁴ ?Mutakumenya ati, banu ababirima nibatangirana, ababirima bo:ne, kata, nawe unu abafu:wa ni umwi ?Mutangiranega kutiyo korereki mubone.

²⁵ No mu:nu wo:ne unu katangirana, ke:baririra mu byone. Mbe abene abakora bakorereki bayabwe orutenga runu orunyamuka, nawe eswe runu rutakunyamuka.

²⁶ Anye kwenikora nimbirima kutiyo, tari rwa unu ke:tima:ta. Enitu:syanya ebifu:fi, tari rwa unu kabuma orutumba.

²⁷ Nawe enitu:sya omubiri gwani, ningutunga, korereki nikamara okubwira abandi, anye omwene nitaja kuba wa kuremwa.