1 Bakorinto 8 - INDAGANO INYA:YA

Abe:kirisya bataja kuyabya abairi mu Kristo

¹ Ku bigambo bya binu abatambira ebisusano, cimenyere ati, bo:ne ciri no bumenyi. Obumenyi obure:ta ecigundu, nawe okwenda okumbaka.

² Omu:nu ake:ganirisya ati, nimenyere kata, mbe acari kumenya musango gwone rwa kutyo kumwiire okumenya.

³ Nawe omu:nu akenda Nyamuanga, oyo kaba amenyekere ku Mwene.

⁴ Mbe ku bigambo ebyo kurya binu abatambira ebisusano, cimenyere ati, ecisusano citari ci:nu mu ca:ro, na rindi atariwo undi, ni Nyamuanga umwi era.

⁵ Okuba norwo kutiyo bario banu abatogwa bamungu, amwi mu rwire, amwi mu:si, rwa kutyo bario bamungu ba:fu na bakuru ba:fu.

⁶ Nawe kwiswe ariwo Nyamuanga umwi, niwe Rata, munu ebiso:ka byone, neswe cirio baanga kubwae. Na rindi ariwo Ratabugenyi umwi niwe Yesu Kristo, unu byone biriwo kurwa managa gae, neswe one ciriwo kurwa managa gae.

⁷ Nawe obumenyi bunu butari mu ba:nu bo:ne. Nawe abandi banu banarire ebisusano, abarya binu abatambira ebisusano na ka wori. Ne mitima jebwe nijijira jisonyo okuba jitakomee.

⁸ Nawe ebiryo bitakucikondisya ku Nyamuanga. Okuba cikarya, citakwongesibwa ci:nu, amwi cikaremo:kurya, citakugerukirwako ci:nu.

⁹ Nawe mwirindega, amanaga gemwe gataja kwiku:jusya banu batakomee.

¹⁰ Okuba omu:nu akakurora awe unu uri no bumenyi, wiyanjire ku biryo mu yekaru ye cisusano co kuramya, ?omutima gwa oyo gutakujira obuba:si okurya binu abatambira ebisusano, okuba atakomee?

¹¹ No:yo atakomee nasimagira kurwo bumenyi bwao, niwe omwana wa:su unu Kristo afwiriye.

¹² Mbe nikwo kutyo, mukakaira aba:na ba:su, no kuutasya emitima jebwe jinu jitakomee, mbe kutyo mwakaira Kristo.

¹³ Mbe, ebiryo bike:ku:jusya Omwana wa:su, nitarirya nyama anu ciribe:ra, korereki nitaja kwiku:jusya mwana wa:su.