1 Bakorinto 7 - INDAGANO INYA:YA

Ebyo kutwara no kuta:na

¹ Mbe nawe ku binu mwanyandikiye, kutari kwa bwana omurume okukuma ku mugasi.

² Nawe, kubwo kwikenga oburomesi, buri murume abega no mugasi wae omwene, na buri mugasi abega no murume wae omwene.

³ Omurume ayanega omugasi wae binu bimwiire. Nikwo kutyo omugasi one ayanega omurume wae binu bimwiire.

⁴ Omugasi atakutunga omubiri gwae omwene, tari omurume wae. Na ka omurume one kutiyo atakutunga omubiri gwae omwene, tari omugasi wae.

⁵ Mute:managa, tari amwi mwaikene kutao omwanya, mukorereki mubega no mwanya gwo kusabirwamo, nimusuba okuba bumwi rindi, Syetani asigega kubasaka kurwo kurema okwiingirira.

⁶ Nawe ena:ika binu nini:kirisya:ra, tari ati natao ciragiro.

⁷ Nawe anye mu kwenda kwani, nendere abamu bo:ne babega rwanye. Nawe omu:nu wo:ne ari ne ciyanwa cae omwene cinu caso:kere ku Nyamuanga, oundi cindi, oundi cindi.

⁸ Nawe banu batatwae na batumba enibabwira ati, Ni kwa bwana abo babega rwanye.

⁹ Nawe araba batakutura kwingirira, batware, okuba ni akiri kutwara kukira okwaka inamba.

¹⁰ Nawe enibaragirira banu batwarene ati, omugasi asigega kutama no murume wae. Tari anye unu eniragirira nawe ni Ratabugenyi.

¹¹ Nawe akata:na nage abegao era kutwarwa uri, amwi basubyanyega no murume wae. Ka no murume atajaga kutama no mugasi wae.

¹² Nawe abandi enibabwira anye, atari Ratabugenyi, ati, Omuiri wo:ne akaba no mugasi unu ate:kirisisye, mbe omugasi ake:kirisya okwikara nage, asige kutama no mugasi wae.

¹³ No mugasi akaba no murume wae.

¹⁴ Okuba omurume unu ate:kirisisye ke:sibwa no mugasi, no mugasi unu ate:kirisisye ke:sibwa no murume. Kwenda bitari kutyo, aba:na bemwe batake:rere, nawe woryanu ni be:ru.

¹⁵ Nawe unu ate:kirisisye akagenda, mu:nusige agende. Omuiri omurume amwi mugasi ataboyerwe no musango ogwo. Nawe Nyamuanga acibirikiriye mu murembe.

¹⁶ Okuba awe omugasi, ?utamenyere ati amwi urionya omurume wao? Amwi awe murume, ?utamenyere ati, amwi urionya omugasi wao?

¹⁷ Mbe nawe bibe ku mu:nu wo:ne rwa kutyo Ratabugenyi amugabiye. Mu:nu wo:ne aribatega rwa kutyo Nyamuanga amubirikiye. Nikwo kutyo eniragirira na mu kanisa jo:ne.

¹⁸ Omu:nu wo:ne akabirikirwa atenderwe, atasubaga kuba unu atatenderwe. Omu:nu wo:ne akabirikirwa atatenderwe, asigega kutendwa.

¹⁹ Okutendwa kutari ci:nu, no kuremo:tendwa kutari ci:nu, nawe ni kugwata ebiragiro bya Nyamuanga.

²⁰ Buri mu:nu abega mu kubirikirwa kunu abirikiriywemo.

²¹ ?Wabirikiywe uri mugaya ?Utabuweraga mwoyo. Nawe ukaba nu:tura okwigururura, ni kwa kisi ukore kutyo.

²² Okuba mu Ratabugenyi, unu abirikiywe ari mugaya, ni mwibure wa Ratabugenyi. Nyaburiko unu abirikiywe ari mwibure, oyo ni mugaya wa Kristo.

²³ Mwagurirwe na bugusi burambu, mbe mutaindukaga kuba bagaya ba ba:nu.

²⁴ Bairi, Buri mu:nu wo:ne abega mu kubirikirwa kunu abirikiriywemo, aamwi na Nyamuanga.

²⁵ Nawe ku bya bayara nitana ciragiro ca Ratabugenyi. Nawe enibabwira kutyo eni:ganirisya, rwo mu:nu unu Ratabugenyi anfwiriye cigongo nibe mwiikanyibwa.

²⁶ Mbe eni:ganirisya gunu ati, ni kwa bwana omu:nu abega rwa kutyo ari, kurwo kunyaka kwa woryanu.

²⁷ ?Waboyerwe ku mugasi? Utayenjaga kusurumurwa. ?Utaboyerwe ku mugasi ?Utayenjaga mugasi.

²⁸ Nawe ukatwara utakukaya. No muyara akatwarwa, one atakukaya. Nawe banu bari kutyo barabaga na nyako mu mubiri. Nawe nenda jisige kubabona.

²⁹ Nawe, ba:na ba:su, ena:ika ati, jisiku jakeere. Kuso:ka wori, banu bari na bagasi babe rwa banu batanabo.

³⁰ Na banu abarira babe rwa banu batakurya. Na banu abakonderwa babe rwa banu batakukonderwa. Na banu abagura babe rwabo batana ci:nu.

³¹ Na banu abakorere ebya i:si inu, babe rwa banu batakubikora muno, okuba ebya i:si inu byajo:kuwao.

³² Nawe enenda emwe mube banu batakuwa mwoyo. Unu atatwae ke:gana ebya Ratabugenyi, kutyo arakondisyaga Ratabugenyi.

³³ Nawe unu atwae ke:gana ebya mu:si, kutyo arakondisyaga omugasi wae.

³⁴ Buriwo butasyanya omutwaywe no muyara. Unu atatwaywe ke:gana ebya Ratabugenyi, abega mweru mu mubiri na mu mwoyo. Nawe unu atwaywe ke:gana ebya mu:si kutyo arakondisyega omurume wae.

³⁵ Enaika kutyo korereki nibasakire emwe abene. Tari ati enibatega muyeto, nawe mu bufura, mukorereki mukorerega Ratabugenyi mutana bya kubaugya.

³⁶ Nawe omu:nu ake:ganirisya ati atakukorera kisi muyasya wae, akaba agu:nire, raba kwiire okuba kutyo, akorega rwa kutyo kenda, atakukaya. Batwarane.

³⁷ Nawe unu arumire mu mutima gwae, atana bukene, nawe katura okukora binu kenda. Ake:ganirisya mu mwoyo gwae ati, ni kwa kisi okurinda omuyasya wae, kakora kisi.

³⁸ Mbe unu katwarisya omuyasya wae, kakora kisi. Nawe ka unu atakutwarisya niwe kakora kisi muno.

³⁹ Omugasi no murume baboerwe aamwi bacari baanga. Nawe omurume wae akafwa, omugasi asurumuywe, katura okutwarwa omu:nu wo:ne unu kenda, nawe ni mu Ratabugenyi era.

⁴⁰ Nawe akaba rwa kutyo ari era, niwo kaba na ribando ryafu, rwa kutyo anye eni:ganirisya. Ka eni:ganirisya ati, anye one ndi no Mwoyo wa Nyamuanga.