1 Bakorinto 6 - INDAGANO INYA:YA

Abakristo basige kubu:rana mu ci:na ca be ca:ro

¹ Omu:nu wo:ne kwimwe akaba no musango ku we:ja:bo, ?kaya:ra okuroma ecima imbere ya banu batari barengeresi, kamwi tari imbere ya be:ru?

² ?Tere amwi mutakumenya ati, abe:ru baritemera i:si ecima? Ka raba emwe muritemera i:si eci:na, ?muteme okutema ebi:na ebito:to?

³ ?Si mutakumenya ati, eswe ciritemera ba:naraika ecima? ?Mbe ke:cirema kutiki okuramura ebyo buanga bunu?

⁴ Mbe mukaba ne bi:na ebye misango jo buanga bunu, ?niki cinu omukora nimubatao banu bagairwe mu kanisa?

⁵ Ena:ika ebyo kubaswasya. ?Angu, atario mwimwe omu:nu umwi owo bwenge, unu katura okutemera aba:bo ecima?

⁶ Nawe omuiri ebiromanwa no muiri, ka na imbere ya banu bate:kirisisye!

⁷ Mbe nikwo muri na riko:mo kata, okuba omubu:rana emwe abene:ra. ?Atari akiri mwikirisye okukorwa kubi:bi? ?Atari akiri mwikirisye okusa:kurwa ebi:nu byemwe?

⁸ Nawe emwe omubakorera abamu kubi:bi, no kusa:kura ebi:nu byebwe, ka na banu omukorera kutyo ni banyu.

Omubiri ni yekaru ya Mwoyo Mweru

⁹ ?Si mutakumenya ati abarangirangi batarirya omwandu gwo obukama bwa Nyamuanga? Mutabebeibwaga. Abasengani batarirya mwandu gwo bukama bwa Nyamuanga, amwi banu abaramya ebisusano, amwi baromesi, amwi abecigasi, amwi banu abarosya barume be:ja:bo,

¹⁰ Amwi be:fi, amwi barigisi, amwi bakorwa, amwi bafumi, amwi basa:kusi, abo batarirya omwandu gwo obukama bwa Nyamuanga,

¹¹ Ka na bandi mwimwe mwariga muri kutyo, nawe mwosibwe, nimwesibwa, nimuyabwa oburengeresi kurwa risi:na rya Ratabugenyi Yesu Kristo, na kubwo Mwoyo wa Nyamuanga weswe.

¹² Byone bitaganyibwe kwanye, nawe bitari byone binu ebinsakira. Byone bitaganyibwe kwanye, nawe anye nitakwikirisya okutungwa na come come.

¹³ Ebiryo ni kubwa inda, na inda ni kubwe biryo, nawe Nyamuanga arimarao byone ku bubiri. Nawe omubiri gutabeeo kurwo buromesi, nawe ni kurwa Ratabugenyi. Na Ratabugenyi one ni kubwo mubiri.

¹⁴ Nyamuanga asu:ruye Ratabugenyi neswe one aricisu:rura kurwa managa gae.

¹⁵ ?Si mutakumenya ati, emibiri jemwe ni ŋingo ja Kristo? ?Mbe nigege jiŋingo ja Kristo nijikore ŋingo ja muromerwa? Na katyari uri!

¹⁶ ?Si mutakumenya ati, unu kagwatana no muromerwa ni mubiri gumwi nage? Okuba ka:ika ati, Ku bubiri barabaga mubiri gumwi.

¹⁷ Nawe unu kagwatana na Ratabugenyi ni mwoyo gumwi nage.

¹⁸ Mwiŋaŋe oburomesi. Cibi:bi come cinu omu:nu kakora, ca:ukene no mubiri. Nawe unu karomera, niwe kanyamura omubiri gwae omwene.

¹⁹ ?Si mutakumenya ati, omubiri gwemwe niyo iyekaru yo Mwoyo Mweru unu ari mwimwe, unu mwayabirwe na Nyamuanga?

²⁰ Amwi emwe mutari kubwemwe, okuba mwagurirwe no bugusi burambu. Nikwo kutyo mukusyega Nyamuanga mu mibiri jemwe.