1 Bakorinto 5 - INDAGANO INYA:YA

Nibabwirwa okwaura omu:nu mubi:bi

¹ Byakumukire wo:ne wo:ne ati, mwimwe burimo buromesi, ka ni buromesi obwejabo obwo butarimo mu ba:maanga, ati omu:nu okutwara omugasi we:semwene.

² Nemwe mwatunu:nire, amwi mutasurumbae, nawe kwari kwiire oyo akorere kutyo aso:sibwe mwimwe.

³ Okuba anye norwo nitario mu mubiri, nawe eniba ndiwo mu mwoyo. Mbe oyo akorere ecikorwa eco anye ndamarire okumutemera eci:na mwisima rya Ratabugenyi Yesu, niri uti ndiwo.

⁴ Emwe ariba mwekofyanya, aamwi no mwoyo gwani, na managa ga Ratabugenyi Yesu.

⁵ Omu:nu uyo mu:nuso:sisye Syetani, omubiri gunyamuke, korereki omwoyo gukisibwe ku rusiku rwa Ratabugenyi Yesu.

⁶ Okwikuya kwemwe kutakondere. ?Mutakumenya ati, ecifwimbya cito:to ecifwimbya ecirengo come?

⁷ Mbe muso:syemo ecifwimbya ca kara korereki mwere, mube cirengo ciyaya, mutarimo cifwimbya. Okuba eswe catambiywe eco:go ceswe ca Ipasaka niwe Kristo.

⁸ Mbe cikore amarya, atari ne cifwimbya ca kara, nakabee ciri ecifwimbya co rwango no bubi:bi, nawe ni biryo binu bitarimo cifwimbya, nibyo ebye cimari no kumasya.

Abakristo ba:ukane no Mukristo mubi:bi

⁹ Ndabandikiye mu nyaruba yani ati, mutasasikanaga na baromesi.

¹⁰ Nitakwaika ati mwiŋaŋe kata abaromesi ba mu:si inu, amwi abarigisi, amwi abasa:kusi, amwi banu abaramya ebisusano. Kwenda biri kutyo, kwakabe:ire okuso:ka mu:si.

¹¹ Nawe woryanu enibandikira ati, mutasasikana na mu:nu wo:ne unu katogwa muiri, akaba muromesi, amwi murigisi, amwi muramya we bisusano, amwi mufumi, amwi mukorwa, amwi inusa:kusi, nakabee kuri kurya, omu:nu we:ja:bo oyo mwasiga kurya nage.

¹² ?Okuba anye aganjamo ki okutemera eci:na abe mwira? ?Emwe mutakuramura aba mu nyumba?

¹³ Nawe abe mwira, Nyamuanga niwe aribatemera eci:na. Nawe omubi:bi uyo mu:nuso:sye mwimwe.