1 Bakorinto 4 - INDAGANO INYA:YA

Nyamuanga karenga emirimu ja bakosi bae

¹ Omu:nu wo:ne acimenye ati, ciri bakosi ba Kristo, na babi:ki bo bumbise bwa Nyamuanga.

² Na rindi, kube:ire ababi:ki ati, babe be:ikanyibwa.

³ Nawe kwanye ni musango muto:to nikaramurwa nemwe, amwi mu ci:na ca ba:nu. Ka nanye nitakwiramura omwene.

⁴ Okuba nitakwimenya ati, ni nerkomo, nawe ogwo gutakunana burengeresi, nawe unu kandamura ni Ratabugenyi.

⁵ Mbe mutatemaga eci:na co musango gwone jisiku jicari kwiya, okukinga runu Ratabugenyi ari:ja, unu arimurika binu bibisirwe ebya mu cisu:te, ka aribukisya okurwaja okwa mu mutima. Mbe niwo buri mu:nu aribona okusi:mwa kwae ku Nyamuanga.

⁶ Nawe, bairi, emisango ejo najijekekanyisye kwanye na ku Apolo kurwemwe, korereki mwiigirire kwiswe, mutasa:girira mu jinu jandikirwe, omunu wo:ne asigega kwikuisya kubwo umwi kukira oundi.

⁷ ?Okuba niga unu kakukora ati ukirire oundi? ?Ka uri na ki cinu utayanirwe? Nawe araba wayanirwe, ?niki cinu oukora niwikuisya uti araba utayanirwe?

⁸ Mwegutire, mwani:bire. Mutungire rwa bakama, neswe citario. Mwakatungire kwakabee kwa kisi korereki eswe one citunge aamwi nemwe.

⁹ Okuba eni:ganirisya ati, Nyamuanga aciteeo eswe jintumwa cibe aba ku bute:ro, rwa banu batemeywe eci:na co kufwa, okuba cabee eco kurorerako ku ca:ro, na ku ba:naraika, na ku ba:nu.

¹⁰ Eswe ciri ba:nu:nu kurwa Kristo, nawe emwe muri bengeso mu Kristo. Eswe cirengaae, nawe emwe muri ba managa. Emwe muri be cibaro, nawe eswe ciri bagaywa.

¹¹ Ecirumwa omweko no kwitwa obwiro kukinga woryanu. Ka eciba tuyu, no kubumwa ebifu:fi, na ka citana bwikaro eciyenga:ra.

¹² Ka ecinyaka, nicikora emirimu na maboko geswe. Era bacifuma, ecibasabirwa ribando. Era canya:sibwa eci:gumirisya.

¹³ Cikabeeresibwa eciremberesya, cakorerwe kuba rwa ifwere ya i:si, na rwa binu ebisosojibwa ebye bi:nu byone, kukinga na ka wori.

Paulo nabakomeresya rwa ba:na

¹⁴ Nitakwandika binu ati nibaswasye, nawe enibatongera rwa ba:na ba:ni abendwa.

¹⁵ Okuba nakabee muri na be:igisya bisira ekumi mu Kristo, nawe mutari na be:somwana ba:fu. Okuba anye nabe:buye mu Kristo Yesu kurwe Bigambo byo bwana.

¹⁶ Mbe enibaremberesya, mundu:bega.

¹⁷ Kwonakorere nintuma Timoteo kwimwe, niwe Omwana wani omwendwa, no mwiikanyibwa mu Ratabugenyi. Niwe aribe:cukya jintungwa jani jinu ninajo mu Kristo, rwa kutyo eniigisyaga wo:ne wo:ne mu kanisa jo:ne.

¹⁸ Nawe bario abandi banu abe:kuya uti nitaca:ja kwimwe.

¹⁹ Mbe nawe eni:ja kwimwe bwangu Ratabugenyi akenda. Niwo ndimenya amanaga ga banu abe:kuya, amwi kutari kwaika kwebwe era.

²⁰ Okuba obukama bwa Nyamuanga butari mu kwaika, nawe mu managa.

²¹ ?Omwenda guya? ?Niba:jeko na isimbo, tere amwi mu kwenda no mwoyo gwo bufura?