1 Bakorinto 2 - INDAGANO INYA:YAPaulo atasimuye mu bwenge bwae omwene 1 Nanye, ba:na ba:su, wejire na:ja kwimwe, nite:jire kusimura ebyo bumbise bwa Nyamuanga mu bukonde bwo kwaika, amwi mu bwenge. 2 Okuba anye nakarariye ati, nisige kumenya musango gwone mwimwe, tari Yesu Kristo, na rwa kutyo abambirwe ku musaraba. 3 Nanye nabaga nemwe mu burenga, na mu bu:ba na mu kuyarara kwafu. 4 No kwaika kwani no kusimura kwani bitabee mu misango jo kukongyakongya mu bwenge bwa ba:nu, nawe byabee mu kweresya kwo Mwoyo no kwa managa. 5 Korereki okwikirisya kwemwe kusigega kuba mu bwenge bwa ba:nu, nawe mu managa ga Nyamuanga. 6 Mbe eca:ikaga obwenge mu banu bakome:e, nawe butari bwenge bwa riimbo rinu, ka butari bwa bakuru ba riimbo rinu banu abajo:kuwao. 7 Nawe eca:ika obwenge bwa Nyamuanga mu bumbise, nibwo bwenge bunu bwabisirwe, bunu Nyamuanga aragiriye kara kurwa rikusyo ryeswe, ne ca:ro cariga cicari kubao. 8 Nibwo obwenge abakuru ba riimbo rinu bariga batabumenyere na umwi. Okuba bakabumenyere, batakamubambire Ratabugenyi wa rikusyo ku musaraba. 9 Nawe rwa kutyo byandikirwe ati, Binu eri:so ricariga kurora, na binu okutwi kucariga kungwa, na bicariga kwingira mu mutima gwo mu:nu, nibyo ebyo Nyamuanga e:ra:biye banu abamwenda. Omwoyo Mweru kaswerura ebyo mwoyo 10 Nawe Nyamuanga acisweruriye eswe ebyo kubwo Mwoyo, okuba Omwoyo niwe katatirisya byone, yee na binu bibisire ebya Nyamuanga, 11 ?Okuba ni mu:nu ki unu kamenya ebyo mu:nu, tari omwoyo gwo mu:nu gunu guri mu mwene? Nyaburiko ne bya Nyamuanga atario unu kabimenya, tari Mwoyo wa Nyamuanga. 12 Nawe eswe citayabirwe mwoyo gwa i:si, nawe ni Mwoyo unu aso:kere ku Nyamuanga, cikorereki cimenyega binu Nyamuanga kaciyana kutyo era. 13 Nibyo ebyo eswe eca:ika, tari mu misango jinu ejiigisibwa no bwenge bwa ba:nu, nawe ni jinu ejiigisibwa na Mwoyo Mweru, nicigajura ebigambo byo mwoyo mu njira yo mwoyo. 14 Nawe omu:nu wo busimika atakungwa ebyo Mwoyo wa Nyamuanga, okuba ni bya bumu:mu ku mwene, atakutura kubimenya okuba ebi:tege:resibwa no mwoyo. 15 Nawe omu:nu unu karu:ba omwoyo ke:tege:resya byone, nawe omwene atakusombo:kerwa na mu:nu undi. 16 ?Okuba niga unu aramenyere okwiganirisya kwa Ratabugenyi, ati amwiigisye? Nawe eswe ciri no kwiganirisya kwa Kristo. |
Kijita New Testament © The British and Foreign Bible Society and The Bible Society of Tanzania, 1960.
Bible Society of Tanzania