1 Bakorinto 2 - INDAGANO INYA:YA

Paulo atasimuye mu bwenge bwae omwene

¹ Nanye, ba:na ba:su, wejire na:ja kwimwe, nite:jire kusimura ebyo bumbise bwa Nyamuanga mu bukonde bwo kwaika, amwi mu bwenge.

² Okuba anye nakarariye ati, nisige kumenya musango gwone mwimwe, tari Yesu Kristo, na rwa kutyo abambirwe ku musaraba.

³ Nanye nabaga nemwe mu burenga, na mu bu:ba na mu kuyarara kwafu.

⁴ No kwaika kwani no kusimura kwani bitabee mu misango jo kukongyakongya mu bwenge bwa ba:nu, nawe byabee mu kweresya kwo Mwoyo no kwa managa.

⁵ Korereki okwikirisya kwemwe kusigega kuba mu bwenge bwa ba:nu, nawe mu managa ga Nyamuanga.

⁶ Mbe eca:ikaga obwenge mu banu bakome:e, nawe butari bwenge bwa riimbo rinu, ka butari bwa bakuru ba riimbo rinu banu abajo:kuwao.

⁷ Nawe eca:ika obwenge bwa Nyamuanga mu bumbise, nibwo bwenge bunu bwabisirwe, bunu Nyamuanga aragiriye kara kurwa rikusyo ryeswe, ne ca:ro cariga cicari kubao.

⁸ Nibwo obwenge abakuru ba riimbo rinu bariga batabumenyere na umwi. Okuba bakabumenyere, batakamubambire Ratabugenyi wa rikusyo ku musaraba.

⁹ Nawe rwa kutyo byandikirwe ati, Binu eri:so ricariga kurora, na binu okutwi kucariga kungwa, na bicariga kwingira mu mutima gwo mu:nu, nibyo ebyo Nyamuanga e:ra:biye banu abamwenda.

Omwoyo Mweru kaswerura ebyo mwoyo

¹⁰ Nawe Nyamuanga acisweruriye eswe ebyo kubwo Mwoyo, okuba Omwoyo niwe katatirisya byone, yee na binu bibisire ebya Nyamuanga,

¹¹ ?Okuba ni mu:nu ki unu kamenya ebyo mu:nu, tari omwoyo gwo mu:nu gunu guri mu mwene? Nyaburiko ne bya Nyamuanga atario unu kabimenya, tari Mwoyo wa Nyamuanga.

¹² Nawe eswe citayabirwe mwoyo gwa i:si, nawe ni Mwoyo unu aso:kere ku Nyamuanga, cikorereki cimenyega binu Nyamuanga kaciyana kutyo era.

¹³ Nibyo ebyo eswe eca:ika, tari mu misango jinu ejiigisibwa no bwenge bwa ba:nu, nawe ni jinu ejiigisibwa na Mwoyo Mweru, nicigajura ebigambo byo mwoyo mu njira yo mwoyo.

¹⁴ Nawe omu:nu wo busimika atakungwa ebyo Mwoyo wa Nyamuanga, okuba ni bya bumu:mu ku mwene, atakutura kubimenya okuba ebi:tege:resibwa no mwoyo.

¹⁵ Nawe omu:nu unu karu:ba omwoyo ke:tege:resya byone, nawe omwene atakusombo:kerwa na mu:nu undi.

¹⁶ ?Okuba niga unu aramenyere okwiganirisya kwa Ratabugenyi, ati amwiigisye? Nawe eswe ciri no kwiganirisya kwa Kristo.