1 Bakorinto 16 - INDAGANO INYA:YA

Ebyo kuso:sya ebiyanwa

¹ Mbe ku byo kusorosisya abe:ru ebi:nu emwe one mukore rwa kutyo naragiriye jikanisa ja Galatia.

² Ku rusiku rwo kwamba ku bwoyo, buri mu:nu mwimwe abi:ke ewae ku bi:nu binu amabona, bisige kusorosibwa ariba na:ja.

³ Ariba nakinga, ndibatuma banu murisora na inyaruba, basire ebiyanwa byemwe Yerusalemi.

⁴ Kukaba kunyiire anye one okugenda, mbe cirigenda nabo.

Ebyo kumarisya ne byo kuke:sya

⁵ Nawe ariba namara okuitiŋana mu Makedonia, ndi:ja kwimwe, kwo kuba ndiitiŋana mu Makedonia.

⁶ Amwi ndi:kara kwimwe, no kumarayo jisiku ja imbeo, korereki munsakire mu rugendo rwani eyo wo:ne ndigenda.

⁷ Kwo kuba nitakwenda kubake:sya emwe woryanu rwo mwiitiŋani, okuba eniikanya okumarao nemwe omwanya, ariba Ratabugenyi e:kirisya.

⁸ Nawe ndiko:rayo mu Efeso okukinga ku Pentekote.

⁹ Kwo kuba ne:guriyweo orwigi runene orwe mirimu myafu, na banu abenda okunyitirira ni ba:fu.

¹⁰ Mbe Timoteo akabakingako, mumwigane abega mwimwe ku:baya uri, kwo kuba kakora omurimu gwa Ratabugenyi rwanye kutyo enikora.

¹¹ Mbe omu:nu wo:ne atamugayaga. Nawe mu:nusakire mu rugendo aje kwanye no murembe, okuba enimurindirira aamwi na ba:su abandi.

¹² Nawe ebya Apolo owasu, namuremberesisye muno aje kwimwe aamwi na bairi, nawe atendere kata okuja woryanu, nawe ariba abona omwanya ari:ja.

¹³ Mutengeje, murume mu kwikirisya, mukorega cirume, mubega na managa.

¹⁴ Mukorega byone mu kwenda.

¹⁵ Mbe, ba:na ba:su, mumenyere inyumba ya Stefana ati, nigwo omutongoro gwa mu Akaya, be:tegereyo okukorera abe:ru.

¹⁶ Enibaremberesya mungwega be:ja:bo abo no mu:nu wo:ne unu kakorera aamwi nabo no kukome:ra

¹⁷ Enikondererwa oku:ja kwa Stefana na Foritunato na Akaiko, okuba abene baku:misisye binu byaburire kurwemwe.

¹⁸ Kwo kuba bafuŋamisye Omwoyo gwani ne mwoyo jemwe. Mbe mubarega abamu be:ja:bo abo.

¹⁹ Jikanisa ja Asia ejibake:sya. Akura na Pirisika ababake:sya muno mu Ratabugenyi, aamwi na ba ikanisa inu iri mu nyumba yebwe.

²⁰ Aba:su bo:ne ababake:sya. Muke:syanyega no kunyunyana okweru.

²¹ Kunu nikwo okuke:sya kwani anye Paulo no kuboko kwani.

²² Omu:nu wo:ne akarema okwenda Ratabugenyi Yesu Kristo, oyo e:imwe. Ratabugenyi ka:ja.

²³ Ecigongo ca Ratabugenyi Yesu Kristo cibega nemwe.

²⁴ Okwenda kwani kubega nemwe bo:ne mu Kristo. Amina.