1 Bakorinto 14 - INDAGANO INYA:YA

Okura:nya kukirire jinyaika

¹ Muru:bega okwenda, nawe mwisigomberega ebiyanwa byo mwoyo, nawe kukirao muragega.

² Okuba unu ka:ika inyaika eindi, atakwaika ku ba:nu tari ku Nyamuanga, okuba atario unu kongwa, nawe ka:ika mu mwoyo ebyo bumbise.

³ Nawe unu karaga kabwira abamu ebyo kubakome:sya, ne byo kubasi:ri:sya ne byo kubasimbi:sya.

⁴ Unu ka:ika inyaika eindi ke:kome:sya omwene:ra, nawe unu karaga kakome:sya ikanisa.

⁵ Mbe anye enenda emwe bo:ne mwaikega jindimi jindi nawe okukirao muragega. Unu karaga akirire unu ka:ika jindimi jindi, tari nagajura, korereki ikanisa ikome:sibwe.

⁶ Mbe, ba:na ba:su, ariba na:ja kwimwe nika:ika jindimi jindi, ?murimbonamo:ki, atari na:ike nemwe mu byo kuswerurirwa, amwi mu byo bwenge amwi mu byo buragi, amwi mu byo kwiigisya?

⁷ Ka na binu bitarimo mwoyo binu ebirira, amwi rukuri amwi rukana, bikarema okutasyanya mu kurira, ?abamenya kutiki orwimbo runu ababuma ku rukuri amwi ku rukana?

⁸ Okuba iŋombi one ikarira oburaka bunu butakumenyeka, ?niga unu arimari:rira okuja ku buremo?

⁹ Nikwo kutyo emwe one mukarema okwaika oburaka bunu obungwibwa bwangu mu nyaika, ?barimenya kutiki binu ebyaikwa? Okuba omuba nimwaikira mu rutumba.

¹⁰ Amwi gario maraka ga nyami nyafu muno mu:si, nawe butario bunu butarimo bugajure.

¹¹ Mbe nikaremo:kumenya obugajuro eniba mujogorimi ku unu ka:ika, no mwene kaba mujogorimi kwanye.

¹² Nikwo kutyo, okuba omwisigombera ebiyanwa byo mwoyo, mwendega muno okwiyongesya okukome:sya ikanisa.

¹³ Mbe unu ka:ika orurimi orundi, asabwe korereki agajure.

¹⁴ Okuba nikasabwa mu rurimi orundi, omwoyo gwani ogusabwa, nawe obwenge bwani butakutwasya.

¹⁵ ?Mbe ka niki? Enisabwa mu mwoyo, enisabwa mu bwenge one. Enimba mu mwoyo, enimba mu bwenge one.

¹⁶ ?Okuba ukasabwa ribando mu mwoyo, unu eyanjire ku ciyanjo ca banu bate:igisibwe kajumi:rira kutiki ati, Amina, kurwo kusi:ma kwao, akaba atakumenya cinu owaika?

¹⁷ Kwo kuba awe ousi:ma kisi, nawe oundi atakumbakwa.

¹⁸ Enisi:ma Nyamuanga nimbakira emwe bo:ne okwaika jindimi ejindi,

¹⁹ Nawe mu kanisa enenda okwaika misango eta:nu no bwenge bwani, korereki niigisye abandi okukira okwaika misango bisira ekumi mu rurimi orundi.

²⁰ Ba:na ba:su, mutabaga ba:na mu kwiganirisya kwemwe. Nawe mu rwango mube bija:re, nawe mu kwiganirisya mubega bakuru.

²¹ Byandikirwe mu biragiro ati, Ndyaika na ba:nu banu mu ba:nu ba jindimi ejindi ne minwa ejindi, nawe nakabee biri kutyo, batarinyungwa, nikwo kutyo ka:ika Ratabugenyi.

²² Jindimi jindi ni cibarikisyo, tari ku banu abe:kirisya, nawe ni ku banu bate:kirisisye. Nawe okuraga kutakuba ku banu bate:kirisisye tari ku banu abe:kirisya.

²³ Mbe ikanisa yo:ne ikaba ikofyanyisisye aamwi na bo:ne baka:ika jindimi jindi, mbe bakengiramo banu batakumenya amwi banu bate:kirisisye, ?batakwaika ati, musarire?

²⁴ Nawe bo:ne bakaba mbaraga, akengira unu ate:kirisisye amwi unu atakumenya, kabu:risibwa na bo:ne, naramurwa na bo:ne.

²⁵ Obumbise bwo mutima gwae obubu:risibwa. Mbe kafukama naramya Nyamuanga, na:ika ati, Nyamuanga ari mwimwe cimari.

²⁶ ?Mbe ka niki, ba:na ba:su? Era mwekofyanya, omu:nu wo:ne akaba ari no rwimbo, akaba ari no kwiigisya, akaba ari no kuswerura, akaba ari no rurimi orundi, akaba ari no kugajura, mbe byone bikorwega kurwo kukome:sya.

²⁷ Omu:nu aka:ika mu rurimi orundi ba:ikega babiri amwi basatu nibabaranwa, no undi agajurega.

²⁸ Nawe akaba atario wa kugajura, ajibire mu kanisa, a:ikire mu mwoyo gwae na ku Nyamuanga.

²⁹ Na baragi one ba:ike babiri amwi basatu, na bandi basombo:rega.

³⁰ Nawe oundi unu enyanjire akaswerurirwa omusango, unu amba ajibire.

³¹ Okuba bo:ne omutura okuraga umwi-umwi, korereki bo:ne be:igirega ka bo:ne basi:ri:sibwega.

³² Ne myoyo ja baragi jitungirwe baragi.

³³ Kwo kuba Nyamuanga atari wa njogere, nawe ni wo murembe. Nikwo kutyo jiri mu kanisa jo:ne eja be:ru.

³⁴ Abagasi bajibirega mu kanisa, okuba bate:kirisibwe kwaika, nawe bo:robega, rwa kutyo ebiragiro one ebyaika.

³⁵ Bakenda okwiigira omusango, babu:syega barume bebwe ika, kwo kuba ni nswaro omugasi okwaika mu kanisa.

³⁶ ?Si, omusango gwa Nyamuanga gwambiye kwimwe, tere amwi gwakingire kwimwe abe:ne:ra?

³⁷ Omu:nu wo:ne ake:iganirisya okuba muragi, amwi we byo mwoyo, amenye ati, binu enibandikira nibyo ebiragiro bya Ratabugenyi.

³⁸ Nawe omu:nu wo:ne akaremo:menya, na:bao.

³⁹ Kwo kutyo, ba:na ba:su, mwisigombere okuraga, nawe mutaingiriraga okwaika jindimi jindi.

⁴⁰ Nawe byone bikorwega kisiki:si, bitondere.