1 Bakorinto 12 - INDAGANO INYA:YA

Ebiyanwa byo Mwoyo Mweru

¹ Mbe ba:na ba:su, nitakwenda mureme okumenya ebye biyanwa byo mwoyo.

² Mumenyere ati, anu mwariga mucari ba:naanga, mwayabibwaga nimuru:ba ebisusano binu bitakwaika, rwa kutyo mwagegwaga ei nei.

³ Kwenikora nimbe:resya ati, atario mu:nu unu ka:ika mu Mwoyo wa Nyamuanga, unu katura okwaika ati, Yesu e:imirwe. Anwi atario mu:nu unu katura okwaika ati, Yesu niwe Ratabugenyi, tari mu Mwoyo Mweru.

⁴ Nawe burio obutasyanya bwe biyanwa, nawe Mwoyo ni umwi.

⁵ Ka burio obutasyanya bwe mirimu, nawe Ratabugenyi ni umwi.

⁶ Ka burio obutasyanya bwo kukora, nawe Nyamuanga ni umwi, unu kakora byone mu bo:ne.

⁷ Nawe omu:nu wo:ne kayabwa okweresibwa kwo Mwoyo kurwo kusakirana.

⁸ Kwo kuba Omwoyo kayana oundi omusango gwo bwenge, no undi kayabwa omusango gwo kusombo:kerwa kubwo Mwoyo oyo.

⁹ Oundi kayanwa okwikirisya kubwo Mwoyo oyo, no undi kayanwa ebiyanwa byo kuosya barwae kubwo Mwoyo umwi.

¹⁰ No undi kayanwa okukora ebirugu:ro, oundi okuraga, no undi okwauraga emyoyo, oundi jinyami ja jindimi, no undi kayanwa okugajura jindimi.

¹¹ Nawe ebyo byone Omwoyo oyo umwi niwe kabikora, nagabira buri mu:nu rwa kutyo kenda omwene.

Abe:kirisya ni mubiri gumwi

¹² Kwo kuba rwa kutyo omubiri ni gumwi, ke:nu guri na ŋingo nyafu, na jiŋingo jo mubiri norwo kutyo ni nyafu, nawe omubiri ni gumwi. Na Kristo one nikwo kutyo ari.

¹³ Okuba mu Mwoyo umwi eswe bo:ne cabatijibwe okwingira mu mubiri gumwi, cikaba ciri Bayaudi, amwi Bagiriki, amwi bagaya, amwi be:bure bo:ne nicinywesibwa mu Mwoyo oumwi.

¹⁴ Okuba omubiri gutari ŋingo imwi nawe ni nyafu.

¹⁵ Okuguru kuka:ika ati, Anye nitari wa ku mubiri okuba nitari kuboko, ?mbe okuba kutari kwa ku mubiri?

¹⁶ Kamwi okutwi kuka:ika ati, Anye nitari wa ku mubiri okuba nitari ri:so, ?mbe okuba kutari kwa ku mubiri?

¹⁷ ?Omubiri gwone gwakabee ri:so, okungwa kwakabee a:ki? ?Omubiri gwone gwakabee kutwi, okuunyirisya kwakabee a:ki?

¹⁸ Mbe nawe Nyamuanga ateemo jiŋingo mu mubiri imwi-imwi rwa kutyo endere.

¹⁹ ?Mbe byone kumba ni ŋingo imwi, omubiri gwakabee a:ki?

²⁰ Nawe woryanu jiŋingo ni nyafu, nawe omubiri ni gumwi.

²¹ Mbe eri:so ritakutura kubwira okuboko ati, Awe nitakukenere. Amwi omutwe gutakutura kubwira amaguru ati, Emwe nitabakenere.

²² Nawe okukira muno, jiŋingo jo mubiri jinu eji:ganirisibwa ati, jitana managa, nijo jikenerwe muno.

²³ Na jiŋingo jo mubiri binu eci:ganirisya ati, jitana cibaro, nijo ecikusya kukira ejindi.

²⁴ Na jiŋingo jeswe ejikonde jinu jitakenerwe, nawe Nyamuanga aimbanyisye aamwi kuba mubiri, nayana ecibaro iŋingo inu irebere.

²⁵ Korereki isigega kubao soro:re mu mubiri, nawe jiŋingo jisakiranega ejene:ra.

²⁶ Na iŋingo eimwi ika:sibwa, jiŋingo jone nijasibwa aamwi nayo. Amwi iŋingo eimwi ikakusibwa, jiŋingo jone nijikonderwa aamwi nayo.

²⁷ Nawe emwe muri mubiri gwa Kristo, ka muri ŋingo jendeko.

²⁸ Nyamuanga ateeo abandi mu kanisa, okwamba jintumwa, aba kabiri abaragi, aba kasatu abeigisya, rindi banu abakora ebirugu:ro, na banu abaosya abarwae, na basakisi, na batungi, na ba:iki ba jinyami ja jindimi.

²⁹ ?Bo:ne ni ntumwa? ?Bo:ne ni baragi? ?Bo:ne ni be:igisya? ?Bo:ne abakora ebirugu:ro?

³⁰ ?Bo:ne bari ne biyanwa byo kuosya abarwae? ?Bo:ne aba:ika jindimi? ?Bo:ne abagajura?

³¹ Nawe mwisigomberega ebiyanwa byo bwana. Nawe enibe:resya injira yo bwana kukirao.