1 Bakorinto 10 - INDAGANO INYA:YA

Nabakabusya ku bya Baisraeli

¹ Ba:na ba:su, nitakwenda emwe mureme okumenya ati, basaja bo:ne bariga emwaro ye ri:re, na bo:ne baitiŋene mu nyanja.

² Na bo:ne babatijibwe ku Musa mu ri:re na mu nyanja.

³ Na bo:ne bari:ye ebiryo biriya ebyo Mwoyo.

⁴ Bo:ne banywee ecokunywa cimwi eco mwoyo, okuba banywaga ku nengo yo mwoyo inu yabaru:baga. Na inengo eyo niwe Kristo.

⁵ Nawe ba:fu kwabo Nyamuanga atabakondereywe, okuba abasimagisisye mwibara.

⁶ Nawe ebyo byariga byo kurorerako kwiswe, cisigega kurigira binu bite:ire, rwa kutyo abo barigiraga.

⁷ Amwi mutaba banu abaramya ebisusano, rwa bandi mwabo kutyo bariga bari. Okuba byandikirwe ati, Abamu nibenyanja okurya no kunywa, nibe:muka okubina.

⁸ Ka cisigega kusengana rwa bandi mwabo kutyo basengene, nibagwa ku rusiku rumwi bisira makumi gabiri na bisatu.

⁹ Amwi citasakaga Ratabugenyi, rwa bandi mwabo kutyo bamusakire, nibasimagisibwa na jinjoka.

¹⁰ Amwi mutertoŋaniraga, rwa bandi mwabo kutyo bertoŋaniye, nibasimagisibwa no musimagisya.

¹¹ Nawe ebyo byababwene abo bibe byo kurorerako, ka byandikirwe ebyo kucikengya eswe banu obute:ro bwa magoro bwakingireko.

¹² Mbe unu ke:ganirisya ati cimereguyu, akabuke asiga kugwa.

¹³ Okusakwa kutakubabona tari kunu oku:ja ku ba:nu bo:ne. Nawe Nyamuanga ni mwiikanyibwa, atakubasiga musakwe kukira kutyo omutura, nawe aamwi no kusakwa kakora injira yo kuonera, korereki muture okwigumirisya.

Batasangira na Ratabugenyi ne misambwa

¹⁴ Mbe abendwa, mwirukega okuramya ebisusano.

¹⁵ Enaika rwa ku ba:nu bo bwenge. Mwiganirisyega binu ena:ika.

¹⁶ Ecikombe ca ribando cinu ecisabirwa ribando, ?tari nikwo okusangira kwa manyinga ga Kristo? Omukate gunu ecibegana, ?tari nikwo okusangira kwo mubiri gwa Kristo?

¹⁷ Okuba omukate ni gumwi, neswe ciri ba:fu nawe ciri mubiri gumwi, okuba eswe bo:ne ecisangiraga mukate gumwi.

¹⁸ Murore ebya Baisraeli bo mubiri. ?Angu banu abarya ku byogo batasangiye ne cigabiro?

¹⁹ Mbe ena:ika ki? ?Amwi ati, ecisusano ni ci:nu? ?Amwi ati, cinu ecitambwa ku cisusano ni ci:nu?

²⁰ Uri. Nawe ena:ika ati, aba:naanga binu abatamba, abatambira emisambwa, tari Nyamuanga. Nanye nitakwenda emwe musangire ne misambwa.

²¹ Mutakutura kunywa ku cikombe ca Ratabugenyi na ku cikombe ce misambwa one. Mutakutura kusangira ku nenda ya Ratabugenyi na ku nenda ye misambwa one.

²² ?Tere amwi ecijisya Ratabugenyi rifuwa? ?Tere amwi cimukirire amanaga?

Cikorega byone byo kukusya Nyamuanga

²³ Ci:kirisibwe okukora byone, nawe tari ati byone ebicisakira. Ci:kirisibwe okukora byone, nawe tari ati byone ebicikome:sya.

²⁴ Omu:nu wo:ne atayenjaga byae era, nawe ne byo we:ja:bo.

²⁵ Cinu come abakama mu sokoni, muryega:ra, kubu:sirisya uri, kurwo mutima.

²⁶ Okuba, I:si ni ya Ratabugenyi na binu bi:juyemo.

²⁷ Mbe, unu ate:kirisisye akabafugesya, nemwe mukenda okugenda, mbe cinu abata imbere yemwe, murye era, kubu:sirisya uri, kurwo mutima.

²⁸ Nawe omu:nu wo:ne akakubwira ati, Inu yatambirwe eco:go, mbe wasiga kuirya kubwoyo akweresya na kurwo mutima. Okuba, I:si ni ya Ratabugenyi na binu bi:juyemo.

²⁹ Omutima gunu ena:ika gutari gwao mwene nawe ni gwo undi. ?Kubaki obwibure bwani buramurwe no mutima gwo undi?

³⁰ Anye nikarya no kusi:ma, ?mbe niki cinu ecikora ninfumwa kubwa eco nasi:miye?

³¹ Mbe mukaba nimurya, amwi nimunywa, amwi nimukora musango gwone gwone, mukorega jo:ne kurwa rikusyo rya Nyamuanga.

³² Mutare:taga ci:ku:juro ku Bayaudi, nakabee ku Bagiriki, nakabee ku kanisa ya Nyamuanga.

³³ Rwa kutyo anye one enikondisya bo:ne mu bigambo byone, nitakuyenja muri:ro gwani omwene, nawe ni muri:ro gwa ba:fu, bakorereki bakisibwe.